അമേരിക്കൻ കർഷകശ്രീ ന്യൂയോർക്കിന്റെ പുരസ്കാര ജേതാക്കളെ പ്രഖ്യാപിച്ചു; ശ്രീകുമാർ ഉണ്ണിത്താന് കർഷക ശ്രീയും ലാലി കളപ്പുരയ്ക്കലിന് പുഷ്പശ്രീയും

ന്യൂയോർക്ക് ∙ ന്യൂയോർക്കിലെ ക്വീൻസ് - ലോങ്ങ് ഐലൻഡ് കേന്ദ്രീകൃതമായി പ്രവർത്തിക്കുന്ന മലയാളി കാർഷിക കൂട്ടായ്മയായ അമേരിക്കൻ കർഷകശ്രീ ന്യൂയോർക്കിന്റെ 2024 ലെ കർഷകശ്രീ - പുഷ്‌പശ്രീ ജേതാക്കളെ പ്രഖ്യാപിച്ചു.

ഫൊക്കാനാ നാഷണൽ ജനറൽ സെക്രട്ടറി ശ്രീകുമാർ ഉണ്ണിത്താനാണ് ഈ വർഷത്തെ കർഷകശ്രീഅവാർഡ് ജേതാവ്. ലോങ്ങ്ഐലൻഡ് മലയാളി സമൂഹത്തിൽ വിവിധ സംഘടനകളിലൂടെ സാമൂഹിക പ്രവർത്തനങ്ങളിൽ സജീവയായ ലാലി കളപ്പുരക്കലിനാണ് പുഷ്‌പശ്രീ അവാർഡ് ലഭിച്ചത്. മുൻ കായിക താരവും അത്ലറ്റിക്സിൽ ഏഷ്യൻ ഗെയിംസ് ജേതാവുമായ ബെന്നി ജോണിനാണ് കർഷകശ്രീ അവാർഡ് രണ്ടാം സ്ഥാനം ലഭിച്ചത്.

ലോങ്ങ് ഐലൻഡ് ഭാഗത്തെ സ്ഥിര താമസക്കാരനും കൃഷിയിൽ തല്പരനുമായ റോയി മാണി കർഷകശ്രീ മൂന്നാം സ്ഥാനം കരസ്ഥമാക്കി.  ബാബിലോണിൽ താമസിക്കുന്ന കാത്തലിക് ഹെൽത്ത് കെയറിൽ നഴ്‌സായ സുഷമാ സ്വർണ്ണകുമാർ പുഷ്‌പശ്രീ രണ്ടാംസ്ഥാനം കരസ്ഥമാക്കി. ക്വീൻസ് ബെല്ലറോസിൽ താമസക്കാരിയായ ഷേർളി പ്രാലേൽ പുഷ്‍പശ്രീ മത്സരത്തിൽ മൂന്നാം സമ്മാനാർഹയായി.

കർഷകശ്രീക്കുള്ള ഒന്നാം സമ്മാനമായ എവർ റോളിങ്ങ് ട്രോഫി  വ്യവസായിയും എറിക് ഷൂസ്, ഹാനോവർ ബാങ്ക് എന്നിവയുടെ സാരഥിയുമായ വർക്കി എബ്രഹാമാണ് സ്പോൺസർ ചെയ്തിരിക്കുന്നത്. പുഷ്പശ്രീയുടെ ഒന്നാം സമ്മാനമായിഎവർ റോളിങ്ങ് ട്രോഫി ഡാലസിലുള്ള വ്യവസായിയും യാക്കോബായ സഭാ കമാൻഡറുമായ വർഗീസ് ചാമത്തിലാണ് സ്പോൺസർ ചെയ്തിരിക്കുന്നത്. അവാർഡ്ജേതാക്കൾക്ക് പ്രത്യേക സമ്മാനദാന ചടങ്ങിൽ വച്ച്  ട്രോഫികൾ സമ്മാനിക്കും.

പരിമിത കാലാവസ്ഥയിലും പച്ചക്കറി കൃഷിയിൽ താൽപര്യമുള്ളവരെയും വീടുകളിൽ മനോഹരമായ പൂന്തോട്ടം ഒരുക്കുന്നവരെയും  പ്രോത്സാഹിപ്പിക്കുന്നതിനായി 2009 ൽ രൂപീകൃതമായ   മലയാളീകൂട്ടായ്മയാണിത്.