സ്ത്രീകളുടെ കായിക മത്സരങ്ങളിൽ ട്രാൻസ്‌ജെൻഡർ അത്​ലീറ്റുകളെ വിലക്കി യുഎസ്

വാഷിങ്ടൻ ഡിസി ∙ സ്ത്രീകൾക്കും പെൺകുട്ടികൾക്കുമുള്ള കായിക ഇനങ്ങളിൽ ട്രാൻസ്‌ജെൻഡർ അത്​ലീറ്റുകൾ പങ്കെടുക്കുന്നതിന് യുഎസിൽ വിലക്ക് ഏർപ്പെടുത്തി. പ്രസിഡന്റ് ഡോണൾഡ് ട്രംപ് ഇതു സംബന്ധിച്ച ഉത്തരവിൽ ഒപ്പിട്ടു. ഈ നടപടി സ്ത്രീകളുടെ കായിക ഇനങ്ങളിൽ നിന്ന് പുരുഷന്മാരെ അകറ്റി നിർത്തുന്നതായിട്ടാണ് ഉത്തരവിൽ പറയുന്നത്. 

ഫെഡറൽ ഫണ്ടിങ് ലഭിക്കുന്ന സ്ഥാപനങ്ങൾ ഉത്തരവ് പാലിക്കുന്നുണ്ടെന്ന് ഉറപ്പാക്കാൻ നീതി, വിദ്യാഭ്യാസ വകുപ്പുകൾ ഉൾപ്പെടെയുള്ള ഫെഡറൽ ഏജൻസികളെ ചുമതലപ്പെടുത്തി. ജനനസമയത്ത് ഒരാൾക്ക് നിയോഗിക്കപ്പെട്ട ലിംഗഭേദം 'ലൈംഗികത'യാണെന്ന് ഉത്തരവ് വ്യക്തമാക്കുന്നു. ഈ പുതിയ ഉത്തരവ് ട്രാൻസ്ജെൻഡർ കായികതാരങ്ങളുടെ പങ്കാളിത്തത്തെക്കുറിച്ചുള്ള ചർച്ചകൾക്ക് തുടക്കമിട്ടുണ്ട്.