കെസിഎസ് ഷിക്കാഗോ വാലന്റൈൻസ് ഡേ ആഘോഷം സംഘടിപ്പിച്ചു

ഷിക്കാഗോ∙ കെസിഎസ് ഷിക്കാഗോ വാലന്റൈൻസ് ഡേ ആഘോഷം സംഘടിപ്പിച്ചു. വൈകുന്നേരം 6ന് ആരംഭിച്ച് അർധരാത്രി വരെ നീണ്ടുനിന്ന പരിപാടിയിൽ 300ൽ അധികം ആളുകൾ പങ്കെടുത്തു. മുൻ വർഷങ്ങളിലെ പങ്കാളിത്തത്തെ അപേക്ഷിച്ച് ഈ വർഷം ആളുകളുടെ പങ്കാളിത്തം വളരെ കൂടുതലായിരുന്നു. 

കെസിഎസ് പ്രസിഡന്റ് ജോസ് ആനമലയുടെ പ്രസംഗത്തോടെയാണ് ചടങ്ങുകൾ ആരംഭിച്ചത്. തുടർന്ന് ബലൂൺ പറത്തി ആഘോഷം ഉദ്ഘാടനം ചെയ്തു. എംസിമാരായ മേരി ആൻ നെല്ലാമറ്റം, മരിയ കിഴക്കേകുട്ട്, റൊണാൾഡ് പൂക്കുമ്പൻ എന്നിവരുടെ അവതരണം ശ്രദ്ധേയമായിരുന്നു. ഗായകൻ ഫ്രാങ്കോ സൈമണിന്റെ ഗാനമേളയായിരുന്നു പ്രധാന ആകർഷണം. ലിഡിയ മ്യാൽക്കരപുറം, ബിനി ചാലുങ്കൽ, സെൽമ നെല്ലാമറ്റം, ജെയ്‌റോസ് പതിയിൽ, സാജു കാപറമ്പിൽ തുടങ്ങിയ സംഗീതജ്ഞർ ഗാനമേളയിൽ പങ്കുചേർന്നു.

അബിനും രശ്മി മുണ്ടുപാലത്തിങ്കലും ചേർന്ന് അവതരിപ്പിച്ച ദമ്പതികളുടെ സ്ലൈഡ്‌ഷോ ശ്രദ്ധേയമായി. കഹൂട്ട്, സാരി ഗെയിം, ബലൂൺ ഗെയിം തുടങ്ങിയ വിനോദ പരിപാടികളും ഉണ്ടായിരുന്നു. മരിയ കുന്നുംപുറത്ത്, നീതു ഐക്കരപറമ്പിൽ, മിന്ന പള്ളിക്കുന്നേൽ എന്നിവർ ഗെയിം പ്രവർത്തനങ്ങൾക്ക് നേതൃത്വം നൽകി. ഡൊമിനിക് ചൊല്ലെംബെലിന്റെ നേതൃത്വത്തിലുള്ള ഡി.സി ഫൊട്ടോഗ്രഫി വാലന്റൈൻസ് തീം ചിത്രങ്ങൾ പകർത്തി.

കെസിഎസ് സെക്രട്ടറി ഷാജി പള്ളിവീട്ടിൽ നന്ദി പ്രകാശിപ്പിച്ചതോടെ ആഘോഷം സമാപിച്ചു.
ഷാജി പള്ളിവീട്ടിൽ