എച്ച്-1ബി വീസ അപേക്ഷകരിൽ നിന്ന് അപ്രതീക്ഷിത വിവരങ്ങൾ തേടി യുഎസ്; ആശങ്ക

വാഷിങ്‌ടൻ, ഡിസി ∙ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യുഎസ്സിഐഎസ്) എച്ച്-1ബി വീസ അപേക്ഷകരിൽ നിന്ന് അവരുടെ താമസ സ്ഥലത്തിന്റെ വിശദാംശങ്ങളും ബയോമെട്രിക് വിവരങ്ങളും ആവശ്യപ്പെടാൻ തുടങ്ങിയത് ഇമിഗ്രേഷൻ അഭിഭാഷകരെ ആശങ്കയിലാക്കിയിരിക്കുകയാണ്. മുൻപ് ഇങ്ങനെയൊരു രീതി ഉണ്ടായിരുന്നില്ല. ഈ നടപടി ട്രംപ് ഭരണകൂടത്തിന്റെ ശക്തമായ നിയമനടപടികളുടെ സമയത്താണ് എന്നത് അമേരിക്കയിലെ 240 ലധികം കോളജുകളിലും സർവകലാശാലകളിലുമായി പഠിക്കുന്ന രാജ്യാന്തര വിദ്യാർഥികൾക്ക് വലിയ പ്രശ്നങ്ങൾ സൃഷ്ടിക്കുന്നു.

∙പുതിയ വഴിത്തിരിവ് എച്ച്-1ബി വീസയിൽ?
ഫോബ്സ് റിപ്പോർട്ട് അനുസരിച്ച്, ഇമിഗ്രേഷൻ ഉദ്യോഗസ്ഥർ എച്ച്-1ബി വീസ കേസുകളിൽ തെളിവുകൾക്കായുള്ള അഭ്യർഥനകൾ (ആർഎഫ്ഇ) ഫയൽ ചെയ്യുന്നുണ്ട്. അപേക്ഷകർ അവരുടെ വ്യക്തിഗത വിവരങ്ങളായ വീടിന്റെ വിലാസം, ബയോമെട്രിക്സ് എന്നിവ സമർപ്പിക്കേണ്ടതുണ്ട്. ഇതിന് പിന്നിലുള്ള ഫെഡറൽ ഏജൻസിയുടെ ഉദ്ദേശ്യത്തെക്കുറിച്ച് ചോദ്യങ്ങൾ ഉയർന്നിട്ടുണ്ട്.

വിദേശ ജീവനക്കാരെയും തൊഴിലാളികളെയും പ്രതിനിധീകരിക്കുന്ന യുഎസ്സിലെ ഇമിഗ്രേഷൻ അഭിഭാഷകർ, വീസ അനുവദിക്കുന്നതിന് അപേക്ഷകരിൽ നിന്ന് ഈ വിവരങ്ങൾ ആവശ്യപ്പെടുന്ന ആർഎഫ്ഇകൾ ലഭിച്ചതായി സമ്മതിച്ചു.