സൈന്യത്തിൽ ട്രാൻസ്ജെൻഡർ വിലക്ക്: ട്രംപ് ഭരണകൂടത്തിന് അനുകൂല വിധിയുമായി സുപ്രീം കോടതി

സിയാറ്റിൽ ∙ യുഎസ് സൈന്യത്തിൽ ട്രാൻസ്‌ജെൻഡറുകൾക്ക് ഏർപ്പെടുത്തിയ വിലക്ക് തുടരുന്നതിന് ട്രംപ് ഭരണകൂടത്തിന് സുപ്രീം കോടതി ചൊവ്വാഴ്ച അനുമതി നൽകി. ജനനസമയത്ത് നിർണ്ണയിച്ച ലിംഗത്തിൽ നിന്ന് വ്യത്യസ്തമായ ലിംഗത്തിൽ സ്വയം തിരിച്ചറിയുന്ന ട്രാൻസ്‌ജെൻഡർ സൈനികാംഗങ്ങളെ സൈന്യത്തിൽ നിന്ന് നീക്കം ചെയ്യാൻ എത്ര സമയമെടുക്കുമെന്ന് നിലവിൽ വ്യക്തമല്ല. യുഎസ് പ്രസിഡന്റ് ഡോണൾഡ് ട്രംപിന് സുപ്രീം കോടതിയിൽ നിന്ന് ലഭിക്കുന്ന തുടർച്ചയായ വിജയങ്ങളിൽ ഏറ്റവും പുതിയതാണ് ഈ തീരുമാനം.

കോവിഡ് വാക്സീൻ നിർബന്ധമാക്കിയും ട്രാൻസ്‌ജെൻഡർ സൈനികരെ ഡിഇഐ (Diversity, Equity, Inclusion) സംരംഭങ്ങളിലൂടെ സൈന്യത്തിൽ ചേരാൻ പ്രോത്സാഹിപ്പിച്ചുമുള്ള ബൈഡൻ ഭരണകൂടത്തിന്റെ നയങ്ങൾക്ക് അനുകൂലമായി സിയാറ്റിലിലുള്ള യുഎസ് ഡിസ്ട്രിക്റ്റ് ജഡ്ജി ബെഞ്ചമിൻ സെറ്റിൽ പുറപ്പെടുവിച്ച ഉത്തരവാണ് സുപ്രീം കോടതി താൽക്കാലികമായി തടഞ്ഞത്. 

ഒരു പുരുഷൻ താൻ ഒരു സ്ത്രീയാണെന്ന് വാദിക്കുകയും മറ്റുള്ളവർ ഈ വ്യാജത്തെ മാനിക്കണമെന്ന് ആവശ്യപ്പെടുകയും ചെയ്യുന്നത് ഒരു സൈനികന് ആവശ്യമായ വിനയത്തോടും നിസ്വാർത്ഥതയോടും പൊരുത്തപ്പെടുന്നില്ലെന്ന് ഡോണൾഡ് ട്രംപിന്റെ ഉത്തരവിൽ പറയുന്നു. ലിംഗപരമായ ഡിസ്ഫോറിയയുടെ ചരിത്രമോ രോഗനിർണയമോ ഉള്ളവരെ ഇനി യുഎസ് സൈന്യത്തിന്റെ ഒരു ശാഖയിലും സേവനമനുഷ്ഠിക്കാൻ അനുവദിക്കില്ലെന്ന് ഈ നിർദ്ദേശം വ്യക്തമാക്കുന്നു.

നിലവിൽ ലിംഗപരമായ ഡിസ്‌ഫോറിയ അനുഭവിക്കുന്ന സൈനികാംഗങ്ങളുടെ കൃത്യമായ എണ്ണം അജ്ഞാതമാണ്. സൈന്യത്തിന്റെ അഞ്ച് ശാഖകളിലുമായി ഏകദേശം 14,000 ട്രാൻസ്‌ജെൻഡർ സൈനികർ വരെ ഉണ്ടെന്ന് ചില കണക്കുകൾ പറയുന്നു. എന്നാൽ, പ്രതിരോധ വകുപ്പിലെ ഒരു മുതിർന്ന ഉദ്യോഗസ്ഥൻ നിലവിൽ സേവനത്തിലുള്ളവരുടെ എണ്ണം 4,240 മാത്രമായിരിക്കാമെന്ന് അഭിപ്രായപ്പെട്ടു.