യുഎസിൽ താമസിക്കുന്ന ഇന്ത്യക്കാർക്ക് മുന്നറിയിപ്പുമായി യുഎസ് എംബസി; വീസ കാലാവധി കഴിഞ്ഞാൽ സ്ഥിരം യാത്രാവിലക്ക്!

ന്യൂയോർക്ക്∙ യുഎസിൽ അനുവദനീയമായ താമസ കാലയളവിൽ കൂടുതൽ തങ്ങുന്നതിനെതിരെ ഇന്ത്യയിലെ യുഎസ് എംബസി വീസ ഉടമകൾക്ക്  മുന്നറിയിപ്പ് നൽകി. അനധികൃത കുടിയേറ്റക്കാർക്കെതിരെ ട്രംപ് ഭരണകൂടം സ്വീകരിച്ച നടപടികളുടെ പശ്ചാത്തലത്തിലാണ് എംബസിയുടെ ഈ നിർദ്ദേശം. അംഗീകൃത താമസ കാലയളവിനപ്പുറം യുഎസിൽ തുടർന്നാൽ നാടുകടത്തപ്പെടുകയും ഭാവിയിൽ യുഎസിലേക്ക് യാത്ര ചെയ്യുന്നതിന് സ്ഥിരമായ വിലക്ക് ഏർപ്പെടുത്തുകയും ചെയ്യുമെന്ന് എംബസി സമൂഹമാധ്യമ പോസ്റ്റിലൂടെ അറിയിച്ചു.

വർക്ക് വീസ, വിദ്യാർഥി വീസ, ടൂറിസ്റ്റ് വീസ തുടങ്ങി നിശ്ചിത കാലയളവുള്ള വിവിധ വീസകളിൽ യുഎസിലേക്ക് യാത്ര ചെയ്യുന്ന ഇന്ത്യക്കാർക്ക് ഈ മുന്നറിയിപ്പ് ബാധകമാണ്. ഓരോ വീസയ്ക്കും അതിന്റേതായ അംഗീകൃത താമസ കാലാവധിയുണ്ട്. കുടിയേറ്റം ഡോണൾഡ് ട്രംപ് ഭരണകൂടത്തിലെ ഏറ്റവും വിവാദപരമായ വിഷയങ്ങളിൽ ഒന്നാണ്. 

അധികാരമേറ്റ ആദ്യ ദിവസം തന്നെ യുഎസ് പ്രസിഡന്റ് ഡോണൾഡ് ട്രംപ് വിഷയത്തിൽ നയം വ്യക്തമാക്കിയിരുന്നു. അമേരിക്കൻ മണ്ണിൽ ജനിക്കുന്ന ‍എല്ലാവർക്കും യുഎസ് പൗരത്വം നൽകുന്ന 14-ാം ഭേദഗതിയിലെ പൗരത്വ വ്യവസ്ഥയ്ക്കെതിരെ ട്രംപ് നിലപാട് സ്വീകരിച്ചു. ഇതിന്റെ അടിസ്ഥാനത്തിൽ പുറപ്പെടുവിച്ച ‌എക്സിക്യൂട്ടീവ് ഉത്തരവ് നിലവിൽ നിയമപരമായ തടസ്സങ്ങൾ നേരിടുന്നുണ്ടെങ്കിലും, ഭരണകൂടം അനധികൃത കുടിയേറ്റക്കാരെ നാടുകടത്തുകയും അറസ്റ്റ് ചെയ്യുകയും സ്വമേധയാ രാജ്യം വിടാൻ പ്രോത്സാഹിപ്പിക്കുകയും ചെയ്യുന്നു.

പുതിയ ഇമിഗ്രേഷൻ നിയമ മാറ്റത്തിൽ, 30 ദിവസത്തിലധികം യുഎസിൽ താമസിക്കുന്ന എല്ലാ വിദേശികളും ഇപ്പോൾ ഫെഡറൽ ഗവൺമെന്റിൽ റജിസ്റ്റർ ചെയ്യേണ്ടതുണ്ട്. കഴിഞ്ഞ കുറച്ച് മാസങ്ങളായി ഇന്ത്യക്കാർ ഉൾപ്പെട്ട രണ്ട് നാടുകടത്തൽ കേസുകൾ വലിയ ചർച്ചാ വിഷയമായിരുന്നു. കൊളംബിയ യൂണിവേഴ്സിറ്റിയിലെ പിഎച്ച്ഡി വിദ്യാർഥിനിയായ രഞ്ജനി ശ്രീനിവാസൻ പലസ്തീൻ അനുകൂല പ്രതിഷേധത്തിൽ പങ്കെടുത്തുവെന്നാരോപിച്ച് വീസ റദ്ദാക്കിയതിനെത്തുടർന്ന് കാനഡയിലേക്ക് പോയിരുന്നു. എന്നാൽ പ്രതിഷേധത്തിൽ താൻ പങ്കെടുത്തിട്ടില്ലെന്ന് രഞ്ജനി വ്യക്തമാക്കിയിരുന്നു. അറസ്റ്റ് ഒഴിവാക്കാൻ ആളുകൾ എങ്ങനെ യുഎസിൽ നിന്ന് സ്വയം നാടുകടത്തണമെന്ന് ആഭ്യന്തര സുരക്ഷാ വകുപ്പ് രഞ്ജനിയെ ഒരു ഉദാഹരണമായി ചൂണ്ടിക്കാട്ടിയിരുന്നു. 

ഹമാസുമായുള്ള ബന്ധം ആരോപിക്കപ്പെട്ട് ജോർജ്ജ്ടൗൺ സർവകലാശാലയിലെ പണ്ഡിതനായ ബദർ ഖാൻ സൂരി അറസ്റ്റിലായിരുന്നു. അദ്ദേഹത്തിന്റെ ഭാര്യ ഹമാസ് നേതാവ് ഇസ്മായിൽ ഹനിയയുടെ മുൻ സഹായി അഹമ്മദ് യൂസഫിന്റെ മകളാണ്. ഖാൻ സൂരി ഉയർത്തുന്ന ദേശീയ സുരക്ഷാ ഭീഷണി എന്താണെന്ന് ട്രംപ് ഭരണകൂടത്തിന് തെളിയിക്കാൻ കഴിഞ്ഞില്ലെന്ന് പറഞ്ഞ കോടതി അദ്ദേഹത്തെ വിട്ടയയ്ക്കുകയായിരുന്നു.