ലൊസാഞ്ചലസിലെ കുടിയേറ്റ പ്രക്ഷോഭം: ട്രംപ് ഭരണകൂടത്തിനെതിരെ നിയമനടപടിയുമായി കലിഫോർണിയ ഗവർണർ ഗാവിൻ ന്യൂസം

ലൊസാഞ്ചലസ് ∙ ഫെഡറൽ ഭരണകൂടവുമായുള്ള ഏറ്റുമുട്ടൽ രൂക്ഷമാക്കി കലിഫോർണിയ ഗവർണർ ഗാവിൻ ന്യൂസം, പ്രസിഡന്റ് ഡോണൾഡ് ട്രംപിന്റെ ഭരണകൂടത്തിനെതിരെ നിയമനടപടിക്ക് ഒരുങ്ങുന്നു. സംസ്ഥാനത്തിൻറെ അനുമതിയില്ലാതെ ലൊസാഞ്ചലസിലേക്ക് നാഷനൽ ഗാർഡിനെ വിന്യസിച്ച ട്രംപ് ഭരണകൂടത്തിന്റെ നടപടിക്കെതിരെയാണ് കേസ്.

കുടിയേറ്റ റെയ്നുകൾക്കെതിരായ പ്രതിഷേധങ്ങളെ നേരിടാനാണ് നാഷനൽ ഗാർഡിനെ വിന്യസിച്ചിരിക്കുന്നത്. 'ഇതൊരു നിയമവിരുദ്ധമായ നടപടിയാണ്,' ഗവർണർ ന്യൂസം തിങ്കളാഴ്ച രാവിലെ നടത്തിയ വാർത്താ സമ്മേളനത്തിൽ പറഞ്ഞു. 'ഒരു സംസ്ഥാനത്തിന്റെ പരമാധികാരത്തിന്മേലുള്ള കടന്നുകയറ്റമാണിത്. പ്രസിഡന്റ് ട്രംപ് തന്റെ അധികാരങ്ങൾ ദുരുപയോഗം ചെയ്യുകയാണ്. ഇതിനെതിരെ ഞങ്ങൾ നിയമപരമായി പോരാടും.' ട്രംപ് ഭരണകൂടത്തിന്റെ നടപടി സംസ്ഥാനത്ത് സംഘർഷം വർധിപ്പിക്കാൻ മാത്രമേ ഉപകരിക്കൂ എന്നും ഗവർണർ ആരോപിച്ചു.

കഴിഞ്ഞ കുറച്ച് ദിവസങ്ങളായി ലൊസാഞ്ചലസിൽ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ICE) നടത്തുന്ന റെയ്ഡുകൾക്കെതിരെ ശക്തമായ പ്രതിഷേധമാണ് അരങ്ങേറുന്നത്. ഈ പ്രതിഷേധങ്ങളെ അടിച്ചമർത്തുന്നതിനായി ഏകദേശം 2,000 നാഷനൽ ഗാർഡ് അംഗങ്ങളെയാണ് ട്രംപ് ഭരണകൂടം ലൊസാഞ്ചലസിലേക്ക് അയച്ചിരിക്കുന്നത്.

നാഷനൽ ഗാർഡിന്റെ സാന്നിധ്യം നഗരത്തിലെ പ്രതിഷേധങ്ങളെ കൂടുതൽ വഷളാക്കിയിട്ടുണ്ട്. പലയിടങ്ങളിലും പ്രതിഷേധക്കാരും സുരക്ഷാ സേനയും തമ്മിൽ ഏറ്റുമുട്ടലുകളുണ്ടായി. നഗരത്തിലെ പ്രധാന റോഡുകൾ പലതും പ്രതിഷേധക്കാർ ഉപരോധിച്ചിരിക്കുകയാണ്. ഗതാഗതം സ്തംഭിച്ചിരിക്കുന്നതിനാൽ ജനജീവിതം ദുസ്സഹമായിട്ടുണ്ട്. ലൊസാഞ്ചലസ് മേയർ കാരെൻ ബാസും ഗവർണറുടെ നിലപാടിനെ പിന്തുണച്ചു. 'ഈ സാഹചര്യത്തിൽ നാഷനൽ ഗാർഡിന്റെ ആവശ്യമില്ല. ഇത് പ്രശ്നങ്ങൾ കൂടുതൽ സങ്കീർണ്ണമാക്കുകയേയുള്ളൂ," അവർ പറഞ്ഞു. ഗവർണർ ന്യൂസം കേസ് ഫയൽ ചെയ്യുന്നതോടെ, ഫെഡറൽ ഗവൺമെന്റും കലിഫോർണിയ സംസ്ഥാനവും തമ്മിലുള്ള നിയമപോരാട്ടത്തിന് പുതിയ മാനം കൈവരും. സംസ്ഥാനങ്ങളുടെ അവകാശങ്ങളെക്കുറിച്ചുള്ള സുപ്രധാനമായ നിയമപരമായ ചോദ്യങ്ങൾ ഈ കേസ് ഉയർത്താൻ സാധ്യതയുണ്ട്. കേസിന്റെ പുരോഗതി വരും ദിവസങ്ങളിൽ രാജ്യവ്യാപകമായി ശ്രദ്ധ നേടുമെന്ന് ഉറപ്പാണ്.