സന്ധിവേദന പരിഹരിക്കാൻ ചെയ്യാം ഗരുഡാസനം യോഗ
Mail This Article
കൈകാലുകളിലെ സന്ധികൾക്കുണ്ടാകുന്ന വേദനയ്ക്കും നീരിനും ശമനം കിട്ടുന്നതിനു സഹായിക്കുന്ന ആസനമാണ് ഗരുഡാസനം. അടിവയറിനും അതിനോടനുബന്ധിച്ചുള്ള അവയവങ്ങൾക്കും ത്വരിതഗതിയിലുള്ള പ്രവർത്തനം കിട്ടുന്നു. ഗർഭപാത്രവും ആ ഭാഗത്തുള്ള നാഡീഞരമ്പുകളും സുഗമമായി പ്രവർത്തിക്കുന്നതിനും ഈ യോഗ സഹായിക്കും.
ചെയ്യുന്ന വിധം
കാലുകൾ രണ്ടും ചേർത്തുവച്ചു നിവർന്നു നിൽക്കുക. അതോടൊപ്പം ഇരുകൈകളും ശരീരത്തിനുവശത്തും ചേർത്തു കമഴ്ത്തിവയ്ക്കുക. വലതുകാൽ മടക്കിവയ്ക്കുക. വലതുകാൽ മടക്കി ഇടതുകാലിന്റെ ഇടതുവശത്തുകൂടി കൊണ്ടുവന്ന് ആ കാലിന്റെ വിരലുകൾ ഇടതുകാലിന്റെ കുഴയിൽ വലതുവശത്തായി ഉറപ്പിച്ചു വയ്ക്കുക. അതേപോലെ വലതുകൈ ഇടതുകയ്യുടെ മുകളിൽക്കൂടി കൊണ്ടുവന്ന് ഉള്ളംകൈകൾ രണ്ടും ചേർത്ത് തൊഴുതു പിടിക്കുക.
കൈകൾ കഴിയുന്നത്ര മുകളിലേക്കുർത്താൻ ശ്രമിക്കുകയും ചെയ്യുക ഈ അവസ്ഥയിൽ സാധാരണരീതിയിൽ ശ്വാസം എടുക്കുകയും വിടുകയും ചെയ്യാവുന്നതാണ്. ഇതേ പോലെതന്നെ കൈകാലുകൾ തിരിച്ചുവച്ചും ചെയ്യേണ്ടതാണ്. ഇങ്ങനെ കൈകാലുകൾ തിരിച്ചുവച്ച് ഒന്നോ രണ്ടോ തവണ മാറിമാറി ആവർത്തിക്കാവുന്നതാണ്.