ശരീരഭാരം കുറച്ച് സമീറ റെഡ്ഡി ; അറിയാം നടിയുടെ ഫിറ്റ്നസ് രഹസ്യങ്ങൾ
Mail This Article
സമീറ റെഡ്ഡി ബോഡി പോസിറ്റിവിറ്റിയുടെ ശക്തമായ വക്താക്കളിലൊരാളാണ്. ഫിറ്റ് ആയിരിക്കുന്നതിനെക്കുറിച്ചും പതിവായി വ്യായാമം ചെയ്യേണ്ടതിന്റെ ആവശ്യകതയെക്കുറിച്ചും സംസാരിക്കാറുള്ള വ്യക്തി കൂടിയാണ് സമീറ. നമ്മുടെ ശരീരം എങ്ങനെയാണോ, ആ രൂപത്തിൽ അതിനെ സ്നേഹിക്കുക എന്നാണ് അവർ ആരാധകരോട് പറയാറ്.
ഇപ്പോൾ സമീറ, തന്റെ ഫിറ്റ്നസ് രഹസ്യങ്ങൾ ഇൻസ്റ്റഗ്രാം പോസ്റ്റിലൂടെ വെളിപ്പെടുത്തിയിരിക്കുകയാണ്. ഇന്റർമിറ്റന്റ് ഫാസ്റ്റിങ്ങ് തുടങ്ങിയതിനു ശേഷം ശരീരത്തിനുണ്ടായ മാറ്റങ്ങളെക്കുറിച്ച് അവർ പറയുന്നു. ശരീരഭാരം കുറഞ്ഞതായും ലക്ഷ്യത്തിലേക്ക് അടുക്കുന്നതായും അവർ ഇൻസ്റ്റഗ്രാമിൽ കുറിച്ചു.
ഇന്റർമിറ്റന്റ് ഫാസ്റ്റിങ്ങ് കൂടാതെ യോഗയും ഇവർ പരിശീലിക്കുന്നു. മാനസികമായ സൗഖ്യം നൽകാൻ യോഗ സഹായിക്കുന്നു. ശരീരഭാരം ഇപ്പോഴുള്ള 86.9 ൽ നിന്ന് 75 കിലോയിൽ എന്നതാണ് തന്റെ ലക്ഷ്യം. ഇതിനായി മധുരം ഒഴിവാക്കിയതായും താരം പറയുന്നു.
കൃത്യമായ ഇടവേളകളിൽ ഉപവസിക്കുകയും ഭക്ഷണം കഴിക്കുകയും ചെയ്യുന്ന ഭക്ഷണരീതിയാണ് ഇന്റർമിറ്റന്റ് ഫാസ്റ്റിങ്ങ്. പ്രത്യേക ഡയറ്റ് ചാർട്ടുകൾ ഒന്നും ഈ ഭക്ഷണരീതിക്കില്ല. കൃത്യമായ ഇടവേളകൾ ആണ് പ്രധാനം.
English Summary : Fitness tips of Sameera Reddy