Manoramaonline.com no longer supports Internet Explorer 8 or earlier. Please upgrade your browser.  Learn more »

പ്രളയത്തിനു ശേഷം; രോഗങ്ങൾ അകറ്റാൻ അറിയേണ്ടത്

പ്രളയജലം ഇറങ്ങിത്തുടങ്ങി. മഴയ്ക്കു ശേഷമുള്ള മരപ്പെയ്ത്തുപോലെ ഇനിയും പകർച്ചവ്യാധികള്‍ പടരാനുള്ള സാധ്യതയാണ് ആരോഗ്യമേഖലയിലെ വിദഗ്ധർ ചൂണ്ടിക്കാണിക്കുന്നത്. കേരളം സ്വീകരിക്കേണ്ട മുൻകരുതലുകൾ കോട്ടയം മെഡിക്കൽ കോളജ് സാംക്രമികരോഗ വിഭാഗം മേധാവി ഡോ. ആർ. സജിത്കുമാർ പങ്കുവയ്ക്കുന്നു.

∙ ജലജന്യ രോഗങ്ങളായ കോളറ, മഞ്ഞപ്പിത്തം, ടൈഫോയിഡ്, വയറുകടി, എലിപ്പനി എന്നിവ പടരാനുള്ള സാധ്യത അധികമാണ്. കിണറുകളിലെയും കുഴൽക്കിണറുകളിലെയും വെള്ളം മലിനമാണ്. കുപ്പിവെള്ളമാണെങ്കിലും കുറഞ്ഞത് 10 മിനിറ്റെങ്കിലും തിളപ്പിച്ച ശേഷം മാത്രം ഉപയോഗിക്കുക.

∙ ശുചിമുറിയിൽ പോയ ശേഷം കൈകൾ സോപ്പിട്ടു കഴുകാൻ പ്രത്യേകം ശ്രദ്ധിക്കുക.

∙ കിണറുകൾ സൂപ്പർ ക്ലോറിനേഷൻ വഴി ശുദ്ധിയാക്കുക. സൂപ്പർ ക്ലോറിനേഷനുള്ള ബ്ലീച്ചിങ് പൗഡർ പ്രാഥമിക ആരോഗ്യ കേന്ദ്രത്തിലും പഞ്ചായത്ത് സ്ഥാപനങ്ങളിലും ലഭ്യമാണ്. അധികൃതരുടെ നിർദേശപ്രകാരം വേണം സൂപ്പർ ക്ലോറിനേഷൻ നടത്തേണ്ടത്.

∙ ഒഴുകിയെത്തിയ ജലത്തിൽ കൂടുതൽ നേരം നിൽക്കാതിരിക്കാന്‍ പ്രത്യേകം ശ്രദ്ധിക്കണം. പ്രളയജലത്തിൽ അധികനേരം നിൽക്കുന്നത് എലിപ്പനിക്കുള്ള സാധ്യത വർധിപ്പിക്കും.

∙ ഡോക്സിസൈക്ലിൻ എന്ന ഗുളിക(100 എംജി) രണ്ടെണ്ണം വീതം ആഴ്ചയിൽ ഒരു തവണ കഴിക്കുന്നത് എലിപ്പനി ഉൾപ്പടെയുള്ള രോഗങ്ങളെ ചെറുക്കാൻ സഹായിക്കും. ഡോക്ടർമാരുടെ നിർദേശം അനുസരിച്ച് ഈ മരുന്ന് കഴിക്കാവുന്നതാണ്.

∙ പ്രളയ ബാധിത മേഖലയിലെ വീടുകൾ ശുചിയാക്കുമ്പോള്‍ ഇഴജന്തുക്കളുടെ സാന്നിധ്യത്തിനുള്ള സാധ്യത വളരെ കൂടുതലാണ്. വീടുകളിലും ചെടികളിലും പറമ്പിലും ഇവയുണ്ടാകും. ഇഴജന്തുക്കളുടെ കടിയേറ്റാൽ ഉടൻ തന്നെ വിദഗ്ധ ചികിത്സ തേടണം.

∙ കുപ്പിച്ചില്ല് ഉൾപ്പടെയുള്ള വസ്തുക്കളിൽ നിന്ന് മുറിവേൽക്കാനുള്ള സാധ്യതയുണ്ട്. പ്രളയബാധിത മേഖലയിൽ നിന്നേറ്റ മുറിവുകളെ നിസാരമായി കാണരുത്. ഏതു തരം മുറിവേറ്റാലും വിദഗ്ധ ചികിത്സ തേടണം.

‌∙ സ്വയം ചികിത്സ നടത്താതെ ആരോഗ്യപ്രവർത്തകരുടെ നിർദേശങ്ങൾ പാലിക്കുക.

∙ മുറ്റത്തോ പറമ്പിലോ കെട്ടിക്കിടക്കുന്ന വെള്ളത്തിൽ കുട്ടികളെ കളിക്കാൻ അനുവദിക്കരുത്.

∙ പ്രളയബാധിത മേഖലയിൽ തണുപ്പുള്ളതുകൊണ്ട് ദാഹം കുറവായിരിക്കും. പക്ഷേ, ദാഹമില്ലെങ്കിലും നന്നായി വെള്ളം കുടിക്കണം. കുറഞ്ഞത് രണ്ടു ലീറ്റർ വെള്ളമെങ്കിലും കുടിക്കണം. മൂത്രം ശരിയായ അളവിൽ പോകുന്നതിനാണിത്.

∙ മരുന്നു കഴിക്കുന്നവർ, അതു മുടങ്ങാതെ കഴിക്കുന്നുവെന്ന് ഉറപ്പു വരുത്തണം. പ്രമേഹം, രക്തസമ്മർദം തുടങ്ങിയ രോഗങ്ങൾക്ക് മരുന്നു കഴിക്കുന്നവർ ആഹാരം മുടക്കരുത്. ആഹാരം ഉപേക്ഷിക്കാനുള്ള സാധ്യത, രോഗത്തിന്റെ തീവ്രത കൂട്ടാം.

Read More : Health News

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.