sections
MORE

പാമ്പിൻ വിഷം ശരീരത്തിൽ പ്രവേശിച്ചതിന്റെ ലക്ഷണങ്ങൾ ഇങ്ങനെ

snake bite
SHARE

റൗണ്ട്സ് കഴിഞ്ഞ് കാന്റീനിൽ ചായ കുടിച്ചുകൊണ്ടിരിക്കുമ്പോഴാണ് പൂങ്കുഴലി വന്ന് വിവരം പറയുന്നത്.

‘അബ്ദുപ്പയ്യനെ മെഡിക്കൽ ഐസിയു വിൽ അഡ്മിറ്റ് പണ്ണിയിര്ക്കാ.. സ്​നേക്ക് ബൈറ്റ്. ‘

‘പാമ്പോ.? അബ്ദുവിനേയോ..?‘ പേപ്പർ ഗ്ലാസ്സ് വെയ്സ്റ്റ് പെട്ടിയിൽ ഇട്ട് ഞാൻ ഐസിയു ക്ലോംപ്ലക്സിനു നേർക്കു നടന്നു.

‘നമ്മുടെ ജ്യൂസ് കടക്കാരന്റെ പയ്യനാണല്ലേ മാഡം‘. ഡ്യൂട്ടിയിലുള്ള സ്റ്റാഫ് നഴ്സ് ഓവർ കൊടുക്കുന്നതിനിടയിൽ വിളിച്ചു പറഞ്ഞു.

ഏഴാമത്തെ ബെഡിൽ അബ്ദു ചിരിച്ചോണ്ട് ചമ്രം പടിഞ്ഞിരിക്കുകയാണ്. വന്നിട്ട് ഒന്നര മണിക്കൂറായേ ഉള്ളൂ. ഒബ്സർവേഷന് കിടത്തിയിരിക്കുകയാണ്. വിഷപ്പാമ്പ് ആണെങ്കിലും പെട്ടെന്ന് ബുദ്ധിമുട്ടുകൾ കാണിക്കണമെന്നില്ല. അടുത്ത ബെഡ്ഡിലെ ശോശാമ്മ ചേട്ടത്തിയെ തമാശകൾ പറഞ്ഞ് ചിരിപ്പിക്കുന്ന തിരക്കിലാണവൻ. എന്നെ കണ്ടതും അവന്റെ ചിരി ഒന്നൂടെ വിടർന്നു.

‘തോട്ടത്തിലെ അണ്ടി പെറുക്കി വിറ്റാൽ ഒരു സെറ്റ് വാട്ടർ കളർ വാങ്ങാം. അതിനും കൂടെ ഉപ്പാനോട് പൈസ ചോദിക്കണ്ടല്ലോ. അതിന്റെടേലാ പാമ്പ് കടിച്ചേ, പെട്ടെന്ന് പേടിച്ചു പോയി. ഇപ്പോ, കുഴപ്പോന്നൂല്ല.‘

അബ്ദുവിന്റെ ചിത്രങ്ങൾ ഞാനും കണ്ടിട്ടുണ്ട്. നിറങ്ങൾ മിക്സ് ചെയ്യാൻ അസാധ്യ കഴിവാണ് അവന്. പേടിക്കേണ്ടെന്ന് പറഞ്ഞ് അബ്ദുവിെന്റ തോളിൽ തട്ടി ഞാൻ പുറത്തിറങ്ങി. പുറത്തെ ചുവന്ന കസേരയിൽ ഉസ്മാനിക്ക ഇരിപ്പുണ്ടായിരുന്നു.

‘രാത്രീല് ഞാനുണ്ടാവും ഡ്യൂട്ടിയിൽ. എന്തേലും ഉണ്ടെങ്കിൽ വിളിക്കാം.'

ബാക്കിയുള്ള കേസ് ഷീറ്റുകൾ എടുത്ത് എഴുതാനിരുന്നു. കുറച്ചു നേരത്തേക്ക് ഐസിയു ശാന്തമായിരുന്നു. മോണിറ്ററുകളുടെ ബീപ്പ് ബീപ്പ് ശബ്ദം മാത്രം. ഡ്യൂട്ടിയിലുണ്ടായിരുന്ന ഹൗസ് സർജൻസിക്കാരും നഴ്സിങ് സ്റ്റുഡന്റസും ബുക്കുമായി മേശയ്ക്കു ചുറ്റും വന്നിരുന്നു. കുട്ടിക്കാലത്തു കളിക്കിടിയലിയിലെ ഓട്ടത്തിനിടയിലെപ്പോഴോ പാമ്പിനെ ചവിട്ടി പോവുകയും കടി കൊള്ളാതെ രക്ഷപ്പെടുകയും ചെയ്ത കഥയിലൂടെയാണ് വർത്തമാനം തുടങ്ങിയത്. അവിടുന്നങ്ങോട്ട് ചർച്ചയിൽ പാമ്പുകളും പാമ്പുകടിയും നിറഞ്ഞു.

പാമ്പുകൾ രണ്ടു തരമുണ്ട്. വിഷമുള്ളതും വിഷമില്ലാത്തതും. ഭൂമിയിലെ ഭൂരിപക്ഷം പാമ്പുകളും വിഷമില്ലാത്തവയാണ്.(ചിലപ്പോൾ തോന്നാറുണ്ട്, നമ്മുടെ സിനിമകളും നോവേലുകളുമൊക്കെയാണ് പാമ്പുകളെ ഒന്നടങ്കം ഭീകര വിഷവാഹകരാക്കിയതെന്ന്. പാമ്പിനെ കൊണ്ട് കടിപ്പിച്ചു ആത്മഹത്യ ചെയ്ത ക്ലിയോപ്പാട്ര'യെക്കുറിച്ചു ഓർത്തു ഉറക്കം നഷ്ടപ്പെട്ട രാത്രികൾ എനിക്കുമുണ്ടായിട്ടുണ്ട്.)

നമുക്ക് ചുറ്റുമുള്ള പാമ്പുകളിൽ വിഷമുള്ള പാമ്പുകളിൽ പ്രധാനം മൂർഖൻ, അണലി, വെള്ളിക്കെട്ടാൻ/ഏട്ടടി വീരൻ, മാമ്പ, കടൽ പാമ്പുകൾ എന്നിവയാണ്. പാമ്പുകടി എൽക്കാൻ സാധ്യത കൂടുതലുള്ള ശരീര ഭാഗങ്ങൾ കൈകാലുകളാണ്. പാമ്പുകടിയുടെ പ്രഥമ ലക്ഷണങ്ങൾ ഭയം കൊണ്ടു ഉണ്ടാകുന്നവയാണ്. ഹൃദയമിടിപ്പ് കൂടൽ, തലകറക്കം, ഓക്കാനം, തളർച്ച, ബോധക്ഷയം, വിയർക്കൽ എന്നിവ ആ കൂട്ടത്തിൽ പെടുന്നു. കടിയേറ്റ പാട്, വേദന, കടിയേറ്റ ഭാഗം ചുവന്നു തടിക്കുക എന്നിവയും ഉണ്ടാകുന്നു. ഛർദി, കൈകാൽ മരവിപ്പ്, കാഴ്ചയിലുള്ള പ്രശ്നങ്ങൾ എന്നിവയാണ് വിഷം ശരീരത്തിൽ പ്രവേശിച്ചു എന്നുള്ളതിന്റെ മറ്റു ലക്ഷണങ്ങൾ. അലർജി കൊണ്ടു ശരീരത്തിനുണ്ടാക്കുന്ന പ്രതിപ്രവർത്തനങ്ങൾ, ഹൃദയത്തിന്റെയും വൃക്കകളുടെയും നാഡികളുടെയും പ്രവർത്തനം തകരാറിലാകുക, ശ്വാസതടസ്സം, മുറിവിന് ചുറ്റുമുള്ള കോശങ്ങളുടെ നാശം എന്നിവയാണ് പാമ്പുവിഷം ശരീരത്തിൽ കടക്കുന്നത് കൊണ്ടുള്ള ഗുരുതര പ്രശ്നങ്ങൾ.

വിഷമില്ലാത്ത പാമ്പുകൾ കടിച്ചത് വഴിയും ആരോഗ്യ പ്രശ്നങ്ങൾ ഉണ്ടാകാം. ആഴത്തിലുള്ള മുറിവിൽ പാമ്പിന്റെ ഉമിനീർ തട്ടി അണുബാധയ്ക്കു കാരണമാകുന്നത് വഴിയും പാമ്പിന്റെ പല്ലിലെ സൂക്ഷമജീവികൾ(ക്ലോസ്‌ട്രൈഡിയം ടെ റ്റാനി പോലുള്ള) വഴിയും ഇത് സംഭവിക്കാം.

പാമ്പ് കടിയേറ്റ ഒരു സാഹചര്യം വരികയാണെങ്കിൽ ആദ്യം ചെയ്യേണ്ടത്, കടി കൊണ്ട രോഗിക്ക് ആത്മധൈര്യം നൽകുക എന്നുള്ളതാണ്. മുറ്റത്തോ പറമ്പിലോ വച്ചു പാമ്പ് കടിയേറ്റ ആൾ ഉടനെ പേടിച്ചു മറ്റുള്ളവരെ അറിയിക്കാൻ വേണ്ടിയോ വീട്ടിനകത്തേക്കോ ഓടിയെത്തുന്ന അവസ്ഥയാണ് പലപ്പോഴും കാണാറുള്ളത്. ഇങ്ങനെ ഓടുന്നത് വഴിയും ചലനം കൂടുന്നതിനനുസരിച്ചും വിഷം കൂടുതൽ ഭാഗങ്ങളിലേക്ക് വ്യാപിക്കുന്നു. പാമ്പു കടിയേറ്റ ആൾ ശരിക്കും ചെയ്യേണ്ടത് ശരീരഭാഗങ്ങളുടെ ചലനം പരമാവധി കുറയ്ക്കുക എന്നുള്ളതാണ്. ഇത് വിഷം ശരീരത്തിനകത്ത് കൂടുതൽ ഭാഗങ്ങളിലേക്ക് എത്തുന്നത് തടയാൻ വേണ്ടിയാണ്. പാമ്പിനെ തിരിച്ചറിയുക എന്നുള്ളത് , തുടർചികിത്സയ്ക്കു സഹായകരമാണെങ്കിലും പ്രായോഗിക ബുദ്ധിമുട്ടുകൾ കൂടെ കണക്കിലെടുക്കണം. പാമ്പിനെ തിരഞ്ഞു പിടിക്കുന്നതിനിടയിൽ അടുത്ത ആൾക്ക് കൂടെ കടിയേറ്റ സന്ദർഭങ്ങൾ ഒക്കെ ഉണ്ടായിട്ടുണ്ട്. ഇത് ഒഴിവാക്കണം. ജീവനുള്ള പാമ്പിനെ കൊണ്ടുവന്നു അത്യാഹിതവിഭാഗത്തിൽ ഒരു അനാവശ്യ ബഹളവും പരിഭ്രാന്തിയും പരത്തിയ അവസരങ്ങളും ഇല്ലാത്തതല്ല. ഇത് പലപ്പോഴും രോഗപരിചരണത്തെ പ്രതികൂലമായി ബാധിക്കുന്നു. രോഗിയ്ക്കു എത്രയും പെട്ടന്ന് തന്നെ വൈദ്യ സഹായം ലഭ്യമാക്കുക. അതാണ് ഏറ്റവും പ്രാധാന്യമുള്ളതും.

പാമ്പ് കടിയേറ്റ കാൽ വിരലിന്റെ അറ്റം ബ്ലേഡ് കൊണ്ട് ചെത്തികളഞ്ഞു ചോരയൊലിപ്പിച്ചു കൊണ്ട് കാഷ്വാലിറ്റിയിൽ എത്തിയൊരു മുപ്പതു വയസ്സുകാരിയെ ഇപ്പോഴും ഓർമയുണ്ട്. ഇത് പലപ്പോഴും അനാവശ്യ അമിത രക്തസ്രാവത്തിന് കാരണമാകുന്നു. ശരിയായ വൈദ്യ ശാസ്ത്ര വൈദഗ്ദ്യം ഇല്ലാത്ത ഒരാൾ ഇത് ചെയ്യുന്നതുവഴി രക്തക്കുഴലുകൾക്കും സ്‌നായ്ക്കുകൾക്കുമൊക്കെ അപകടം സംഭവിക്കാം. കടിയേറ്റത്തിനു മുകൾ ഭാഗത്ത് ആയി കടുംകെട്ടും കെട്ടി എത്തുന്ന എത്രയോ രോഗികളുണ്ട്. വിഷം ഊതിവലിച്ചെടുക്കുക, കടികൊണ്ട ഭാഗം മുറിച്ചു കളയുക, കടിയേറ്റത്തിനു മുകളിൽ കടുംകെട്ട് കെട്ടുക എന്നിവയാണ് പാമ്പ് കടി ശുശ്രൂഷയെ കുറിച്ചുള്ള തെറ്റിദ്ധാരണകൾ. ഊതിവലിച്ചെടുത്ത വിഷം കാരണം വായ്‌ക്കുളിൽ പൊള്ളലേൽക്കാനും ചില സന്ദർഭങ്ങളിൽ വിഷം രക്തതത്തിൽ കലരാനും കാരണമാകുന്നു. കടിയേറ്റതിനു മുകളിൽ കെട്ടുന്നതിനെക്കുറിച്ചു,തർക്കങ്ങൾ ഉണ്ടെകിലും തെറ്റായ രീതിയിൽ കെട്ടുന്നതു കൊണ്ട് പലപ്പോഴും രക്തയോട്ടം കുറഞ്ഞു ശരീരഭാഗങ്ങളെ പ്രതികൂലമായി ബാധിക്കുകയാണ് ചെയ്യുന്നത്. യഥാർഥത്തിൽ കെട്ടുന്നത് കൊണ്ട് ഉദ്ദേശിക്കുന്നത് ലിംഫിന്റെ ഒഴുക്കിനെ തടയുക എന്നുള്ളതാണ്. പക്ഷേ പലപ്പോഴും രക്തയോട്ടമാണ് തടയപ്പെടുന്നത്. കടുംകെട്ടിനു പകരം ഒരുവിരൽ കടക്കാൻ പാകത്തിലുള്ള അയഞ്ഞ കെട്ടുകളാണ് വേണ്ടത്. ഇതുകൂടാതെ കടിയേറ്റ ഭാഗം ചൂടുവെള്ളത്തിൽ മുക്കി വയ്‌ക്കുക, പൊട്ടാസ്യം പേർമാഗ്നറ്റ് ക്രോമിക് ആസിഡ് മുതലായവ മുറിവിലിടുക, കൂടിയ അളവ് മദ്യം ഉപയോഗിക്കുക എന്നീ തെറ്റായ പ്രയോഗങ്ങളും അബദ്ധ ധാരണകളും ഒഴിവാക്കേണ്ടതുണ്ട്.

ഇതിനെക്കാളൊക്കെ അപകടകരമായ ഒരു കാര്യമാണ് ശരീരശാസ്ത്രത്തെകുറിച്ചോ വിഷ ചികിത്സയെക്കുറിച്ചോ അടിസ്ഥാന ധാരണകൾ പോലുമില്ലാത്ത വ്യാജ ചികിത്സകരുടെ അടുത്ത് കടിയേറ്റവരെ ചികിത്സക്കായി കൊണ്ടു പോകുക എന്നുള്ളത്. ഈ പരീക്ഷണത്തിൽ രോഗിക്ക് നഷ്ടപ്പെടുന്നത് ചികിത്സയുടെ ആദ്യ മണിക്കൂറുകളായ ഗോൾഡൻ ഹവർസ് ആണ് . വിഷപ്പാമ്പാണ്‌ കടിച്ചതെങ്കിൽ ആദ്യ മണിക്കൂറുകളിലെ ശരിയായ ചികിത്സ കൊണ്ടു മാത്രമേ രോഗിയുടെ ജീവൻ നിലനിർത്താൻ സാധിക്കുകയുള്ളൂ .

വിഷമുള്ള പാമ്പാണ്‌ കടിച്ചതെന്നുണ്ടെങ്കിൽ പ്രതിവിഷം (antivenom) നൽകുക എന്നുള്ളതാണ് ആശുപത്രിയിൽ ചെയ്യുന്നത്. ഇതോടൊപ്പം രോഗിയുടെ ആരോഗ്യനിലയ്ക്കനുസരിച്ചുള്ള ചികിത്സകളും ലഭ്യമാക്കുന്നു. ഉദാഹരണത്തിന് ശ്വാസ തടസ്സം നേരിട്ട രോഗിയാണെങ്കിൽ കൃത്രിമശ്വാസം നൽകാനുള്ള കാര്യങ്ങൾ ചെയ്യുന്നു. നാഡീവ്യവസ്ഥ, വൃക്ക എന്നിവ ബാധിക്കപ്പെട്ടിട്ടുള്ള രോഗികൾക്ക് അതിനനുസരിച്ചുള്ള മരുന്നുകളും ഡയാലിസിസ് പോലെയുള്ള സൗകര്യങ്ങളും ലഭ്യമാക്കുന്നു.

പാമ്പിന്റെ ഇനം, കടികൊണ്ട ശരീരഭാഗം, ശരീരത്തിൽ പ്രവേശിച്ച വിഷത്തിന്റെ അളവ്, കടിയേറ്റ ആളിന്റെ ആരോഗ്യനില എന്നിവയ്ക്കാനുസരിച്ചാണ് പാമ്പുകടിയുടെ തീവ്രത മാറുന്നത്. മുതിർന്നവരെ അപേക്ഷിച്ചു കുട്ടികളിൽ കൂടുതൽ പ്രശ്നങ്ങൾക്ക് കാരണമാകുന്നുണ്ട്.

*‘ഉമ്മാ.. ‘

വേദന കൊണ്ട് അബ്ദു കാലിട്ടടിച്ച് കരയുകയാണ്. യൂണിറ്റ് ചീഫ് ഓടിയെത്തി. പിന്നെ നീണ്ട കുറേ മണിക്കൂറുകൾ. രാത്രി മുഴുവൻ അബ്ദുവിെന്റെ ശ്വാസകോശത്തിനും ഹൃദയത്തിനും വൃക്കയ്ക്കും ഞങ്ങൾ കുറച്ചു പേർ കവചമെടുത്ത് കൂട്ടിരുന്നു.

ഒടുവിൽ പുറത്ത് വെയിലുദിച്ചത് ഞങ്ങളറിഞ്ഞില്ല. ഞങ്ങളെ പ്രകാശിപ്പിക്കാൻ മുറിക്കകത്ത് അബ്ദുവിന്റെ പുഞ്ചിരിയുണ്ടായിരുന്നു. ഹോസ്​പിറ്റൽ വിട്ടു പോകുന്ന അന്ന് അബ്ദുവെനിക്കൊരു ചിത്രം സമ്മാനിച്ചു. ചിത്രത്തിൽ രണ്ട് കൈപ്പത്തികളായിരുന്നു.

മുങ്ങിപ്പോകുന്ന ഒരു കുഞ്ഞു കൈയിനെ, ചേർത്തു പിടിച്ച് മുകളിലേക്കുയർത്തുന്ന ഒരു വലിയ കൈ, ചില ഓർമത്തുള്ളികൾ അങ്ങനെയാണ്, അവ ജീവന്റെ അറ്റം വരെ തണുപ്പായ് കൂട്ടു വരും.

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN HEALTH NEWS
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
FROM ONMANORAMA