വയറിന്‍റെ ആരോഗ്യം അപകടത്തിലാണോ? ഈ ലക്ഷണങ്ങള്‍ പറഞ്ഞു തരും
Mail This Article
രോഗങ്ങളില്ലാത്ത ആരോഗ്യകരമായ ജീവിത്തിന് വയറും കുടലുകളുമെല്ലാം അടങ്ങുന്ന ദഹനസംവിധാനം കാര്യക്ഷമമായി ജോലി ചെയ്യണം. വയറില്‍ താമസിക്കുന്ന ലക്ഷണക്കണക്കിനായ സൂക്ഷ്മ ബാക്ടീരിയകള്‍ ദഹനസംവിധാനത്തെ ആരോഗ്യത്തോടെ സൂക്ഷിക്കുന്നു.
എന്നാല്‍ ഇവയ്ക്ക് നാശം സംഭവിക്കുമ്പോഴോ അപകടകരമായ ചില ബാക്ടീരിയകള്‍ അമിതമായി വളരുമ്പോഴോ ദഹനവ്യവസ്ഥ കുഴപ്പത്തിലാകുന്നു. വയറിന്‍റെ അനാരോഗ്യത്തെ സംബന്ധിച്ച് ശരീരം നമുക്ക് നല്‍കുന്ന സൂചനകള്‍ ഇനി പറയുന്നവയാണ്
1. ഗ്യാസ്
നിരന്തരമായി ഗ്യാസ് കെട്ടുന്നതും വയര്‍ വീര്‍ത്തിരിക്കുന്നതും ദഹനസംവിധാനം അവതാളത്തിലായതിന്‍റെ കൃത്യമായ സൂചനയാണ്.
2. അതിസാരം
മലത്തില്‍ ഉണ്ടാകുന്ന പലതരം മാറ്റങ്ങളും വയറിന്‍റെ ആരോഗ്യത്തിന്‍റെ സൂചന നല്‍കുന്നു. അതിസാരം പോലുള്ള ലക്ഷണങ്ങള്‍ ഇതിനാല്‍ തന്നെ ഗൗരവത്തോടെ എടുക്കേണ്ടതാണ്.
3. ഉറക്കപ്രശ്നം
അനാരോഗ്യകരമായ ദഹനസംവിധാനം നമ്മുടെ ഉറക്കത്തെ ബാധിക്കുകയും ക്ഷീണം തോന്നാന്‍ കാരണമാകുകയും ചെയ്യും.
4. ചില ഭക്ഷണങ്ങളോട് ഇഷ്ടക്കേട്
നിരന്തരമായ പ്രശ്നങ്ങള്‍ വയറിനെ അലട്ടി തുടങ്ങുമ്പോൾ നമ്മുടെ ശരീരത്തില്‍ പല ഭക്ഷണസാധനങ്ങളോടും പ്രതിരോധം വളരും. സാധാരണയായി നാം ഉപയോഗിച്ചിരുന്ന പല ഭക്ഷണസാധനങ്ങളോടും ഇഷ്ടക്കേട് തോന്നാനും ഇത് കാരണമാകും.
5. ചര്‍മ പ്രശ്നങ്ങള്‍
ചര്‍മം ആരോഗ്യത്തോടെ തിളങ്ങാനും നമ്മുടെ ദഹനവ്യവസ്ഥ ശക്തമായിരിക്കണം. ചൊറിച്ചില്‍, കുരുക്കള്‍, ചര്‍മത്തില്‍ ചെതുമ്പലുകള്‍ തുടങ്ങിയ ചര്‍മപ്രശ്നങ്ങള്‍ വയറിന്‍റെ പ്രവര്‍ത്തനം അത്ര കാര്യക്ഷമമല്ല എന്നതിന്‍റെ അടയാളമാണ്.
6. ശരീരഭാരത്തില്‍ വ്യതിയാനം
പ്രത്യേകിച്ച് മറ്റ് കാരണമൊന്നുമില്ലാതെ ശരീരഭാരം കൂടുകയോ കുറയുകയോ ചെയ്താലും സൂക്ഷിക്കണം. വയറിലെ ഉപകാരപ്രദമായ ബാക്ടീരിയയുടെ സന്തുലനത്തില്‍ ചില പ്രശ്നങ്ങള്‍ മൂലം ഇത്തരത്തില്‍ സംഭവിക്കാം.
7. വായ്നാറ്റം
വയറിലെ പ്രശ്നങ്ങള്‍ വായ്നാറ്റത്തിനും കാരണമാകാം. വായ്നാറ്റം മോണയിലോ പല്ലിലോ നാക്കിലോ ചില ബാക്ടീരിയകള്‍ വളരുന്നത് മൂലവും ആകാമെങ്കിലും വയറിന്‍റെ അനാരോഗ്യ സാധ്യത തള്ളിക്കളയാനാകില്ല.
8. മധുരം കഴിക്കാന്‍ ആഗ്രഹം
വയറില്‍ ജീവിക്കുന്ന ചില ബാക്ടീരിയകളുടെ തോത് അമിതമായി വര്‍ധിക്കുന്നത് സാധാരണയിലും കവിഞ്ഞ പ്രിയം മധുരത്തോട് തോന്നാന്‍ കാരണമാകും. ഇത്തരം സൂക്ഷ്മജീവികള്‍ക്ക് നിലനില്‍ക്കാന്‍ ചിലപ്പോള്‍ മധുരം ആവശ്യമായിരിക്കും.
9. മോശം പ്രതിരോധശേഷി
ഇടയ്ക്കിടെ രോഗങ്ങള്‍ പിടികൂടുന്നത് പ്രതിരോധശക്തിയുടെ കുറവിനെ സൂചിപ്പിക്കുന്നു. പ്രതിരോധസംവിധാനത്തിന്‍റെ 80 ശതമാനവും നമ്മുടെ വയറിന്‍റെ ആരോഗ്യത്തെ ആശ്രയിച്ചിരിക്കുന്നു.
10. മൂഡ് വ്യതിയാനങ്ങള്‍
ദഹനപ്രശ്നങ്ങള്‍ ഉറക്കമില്ലായ്മയിലേക്ക് നയിക്കുമെന്നതിനാല്‍ ഇത് ഒരാളില്‍ മൂഡ് മാറ്റങ്ങള്‍ക്കും കാരണമാകും. അത്യധികമായ ക്ഷീണവും ദേഷ്യവുമെല്ലാം തോന്നാനും ഇടയുണ്ട്.
Content summary: Stomach health related symptoms
