ADVERTISEMENT

ടെലിവിഷനിൽ പലപ്പോഴും നമ്മൾ കണ്ടിട്ടുള്ള ഒരു മനോഹര പരസ്യം ഉണ്ട്. ‘മുറിയിൽ വാതിൽ അടച്ചിട്ടു മകന്റെ ഫോട്ടോയിലേക്കു നോക്കി അവന്റെ ചുവന്ന ഹെഡ്സെറ്റ് വച്ച് ഇരിക്കുന്ന ഒരമ്മ. വാതിലിൽ അച്ഛൻ തട്ടി വിളിക്കുമ്പോഴും പുറത്തേക്കു വരാൻ വിസമ്മതിച്ച് ആ അമ്മ മുറിക്കുള്ളിൽതന്നെ ഇരിക്കുന്നു. സാവകാശം മുറി തുറന്ന് അച്ഛൻ അകത്തു വരികയും ‘അവളെ നീയൊന്നു കണ്ടു നോക്ക്’ എന്ന് പറയുകയും ചെയ്യുമ്പോൾ സമ്മതിക്കാനാവാതെ അമ്മ അവിടെതന്നെ ഇരിക്കുകയാണ്. അടുത്ത നിമിഷം തന്നെ കോളിങ് ബെല്ലിന്റെ ശബ്ദം കേൾക്കുന്ന അച്ഛൻ വാതിൽ തുറക്കുമ്പോൾ ഒരു പെൺകുട്ടി വാതിലിനു മുന്നിൽ നിൽക്കുന്നതായാണ് കാണുന്നത്. അവളുടെ കൈയിൽ ഒരു ബോക്സും ഉണ്ട്. അകത്തേക്ക് കയറി വരുന്ന അവളെ അമ്മ തികച്ചും മനസ്സില്ലാമനസ്സോടെ ആണ് എതിരേൽക്കുന്നത്. തന്റെ കൈയിലിരുന്ന ബോക്സ് അവൾ അമ്മയുടെ നേരെ നീട്ടുകയാണ്. അത് മേടിച്ചു നോക്കുമ്പോൾ അതിന്റെ മുകളിൽ "സ്നേഹപൂർവമ സ്വന്തം മകൻ" എന്നൊരു ലേബൽ കാണുന്നു. ആകാംഷയോടെ തുറന്നു നോക്കുമ്പോൾ ഒരു സ്റ്റെതസ്കോപ് ആണ് അതിന്റെ അകത്തു നിന്നും കിട്ടുന്നത്.

'അമ്മ അതെടുത്തു ചെവിയിൽ വയ്ക്കുകയും മറുഭാഗം ആ പെൺകുട്ടിയുടെ  ഹൃദയത്തിനോട് ചേർത്തുവയ്ക്കുകയും ചെയ്യുന്നു. വികാരനിർഭരമായ ആ നിമിഷത്തിൽ പൊട്ടി കരയുന്ന അമ്മയോട് അവൾ പറയുന്ന വാക്കുകൾ ആണ് ഏറ്റവും ശ്രദ്ധേയം "ഇനി എപ്പോൾ വേണമെങ്കിലും അമ്മക്ക് മോനോട് സംസാരിക്കാമല്ലോ" ’

 

വെറുമൊരു പരസ്യം മാത്രമാണെങ്കിലും അവയവ ദാനത്തിന്റെ മനോഹാരിത അത്രയധികം ഉയർത്തിക്കാട്ടിയ ഒരു പരസ്യ ചിത്രമായിരുന്നു അത്. ഇനിയൊരിക്കലും തിരികെ വരാത്ത തന്റെ മകന്റെ ഹൃദയമിടിപ്പ് വീണ്ടും കേൾക്കുമ്പോൾ ഒരു അമ്മയ്ക്ക് ഉണ്ടാവുന്ന വികാരം പറഞ്ഞറിയിക്കാനാവാത്തതാണ്. ജീവന്റെ ആ തുടിപ്പ് എന്നും അവർക്കൊരു ആശ്വാസം തന്നെയായിരിക്കും എന്നതിൽ സംശയം വേണ്ട.

അവയവ ദാനത്തെ കുറിച്ച് കൂടുതൽ അറിയാം

അവയവദാനം നമുക്കേവർക്കും തീർത്തും സുപരിചതമാണ്.

ഓഗസ്റ്റ് 13 -ന് ലോക അവയവദാന ദിനമായി നമ്മൾ ആഘോഷിക്കുന്നു. അവയവദാനം എന്നത് ഒരു വ്യക്തിയുടെ അവയവങ്ങൾ അയാൾ അല്ലെങ്കിൽ അവൾ മരിച്ചതിനുശേഷം അല്ലെങ്കിൽ ജീവിച്ചിരിക്കുമ്പോൾ തന്നെ മറ്റൊരു വ്യക്തിയിലേക്ക് മാറ്റി വയ്ക്കുന്നതിനു വേണ്ടി ശേഖരിക്കുന്നതാണ്. അവയവങ്ങൾ നൽകുന്ന വ്യക്തിയെ ദാതാവ് ( Donor) എന്നും അവയവം സ്വീകരിക്കുന്ന വ്യക്തിയെ സ്വീകർത്താവ് ( Recipient) എന്നും വിളിക്കുന്നു. മസ്തിഷ്‌ക മരണം സംഭവിച്ച ഒരു ദാതാവിന്, അവയവങ്ങളുടെ തകരാർ അവസാന ഘട്ടത്തിലായി കഷ്ടപ്പെടുന്ന എട്ട് ആളുകളുടെ  ജീവൻ വരെ രക്ഷിക്കാനാകും. അവയവദാനം ദാതാക്കളെക്കാളും സ്വീകർത്താക്കളെ കൂടുതൽ സ്പർശിക്കുന്നു. ട്രാൻസ്പ്ലാന്റേഷൻ ആവശ്യമുള്ളവരെ സ്നേഹിക്കുകയും പിന്തുണയ്ക്കുകയും ചെയ്യുന്ന കുടുംബങ്ങൾ, സുഹൃത്തുക്കൾ, സഹപ്രവർത്തകർ, പരിചയക്കാർ എന്നിവരെയും ഇത് ബാധിക്കുന്നു. കൂടാതെ ട്രാൻസ്പ്ലാന്റിനുശേഷം അവരുടെ പുതുക്കിയ ജീവിതവും മെച്ചപ്പെട്ട ആരോഗ്യവും ഉറപ്പുവരുത്തുന്നു.

organ-transplant

അവയവ ദാനം പലപ്പോഴും ജീവിതത്തിൽ രണ്ടാമത്തെ അവസരം എന്നാണ് അർഥമാക്കുന്നത്. ഹൃദയം, കരൾ, വൃക്കകൾ, ശ്വാസകോശം, പാൻക്രിയാസ് തുടങ്ങിയ സുപ്രധാന അവയവങ്ങൾ തകരാറിലാകുന്നവർക്ക് അവയെ മാറ്റിവയ്ക്കാവുന്നതാണ്. പല സ്വീകർത്താക്കൾക്കും സാധാരണ ജീവിതശൈലിയിലേക്ക് മടങ്ങാൻ ഇത് അനുവദിക്കുന്നു. കോർണിയ മാറ്റിവയ്ക്കൽ കൊണ്ട് വീണ്ടും കാണാനുള്ള കഴിവ് വ്യക്തിക്ക് സമ്മാനിക്കപ്പെടുന്നു.

 

വിവിധ തരത്തിലുള്ള അവയവ ദാനങ്ങൾ

രക്തബന്ധമുളള ദാതാക്കൾ (Live related Donor)

ജീവിച്ചിരിക്കുന്ന ഒരാൾ രക്തബന്ധമുളള‌ മറ്റൊരു വ്യക്തിക്ക് മാറ്റിവയ്ക്കുന്നതിനായി ഒരവയവം (അല്ലെങ്കിൽ അവയവത്തിന്റെ  ഒരു‌ ഭാഗം) ദാനം ചെയ്യുമ്പോൾ    Live related transplant നടക്കുന്നു. ജീവനുള്ള ദാതാവിന് മാതാപിതാക്കൾ, മക്കൾ, സഹോദരൻ അല്ലെങ്കിൽ സഹോദരി, മുത്തശ്ശി അല്ലെങ്കിൽ പേരക്കുട്ടി പോലുള്ള ഒരു കുടുംബാംഗം ആകാം അവയവം ദാനം ചെയ്യുന്നത്.

ജീവനുള്ള അവയവ ദാതാക്കൾക്ക് ഒരു വൃക്ക, ഒരു ശ്വാസകോശം അല്ലെങ്കിൽ കരൾ, പാൻക്രിയാസ്, അല്ലെങ്കിൽ കുടൽ എന്നിവയുടെ ഒരു ഭാഗം ദാനം ചെയ്യാൻ കഴിയും.

 

ലൈവ് ബന്ധമില്ലാത്ത അവയവദാനം( Live unrelated Donor)

സ്വീകർത്താവുമായി വൈകാരികമായി ബന്ധമുള്ള ഒരു നല്ല സുഹൃത്ത്, ഭാര്യ, ബന്ധു, അയൽക്കാരൻ അല്ലെങ്കിൽ അമ്മായിയപ്പൻ അല്ലെങ്കിൽ ഒരു തരത്തിലും ബന്ധമില്ലാത്ത ആളുകളിൽ നിന്നുമുള്ള അവയവദാനത്തെ ലൈവ് ബന്ധമില്ലാത്ത അവയവദാനം എന്നു കൊണ്ട് അർഥമാക്കുന്നു. 

 

478011052

മരിച്ച വ്യക്തിയിൽ നിന്നുള്ള അവയവദാനം (Cadaver organ donation)

ടെർമിനൽ രോഗം മൂലം പ്രവർത്തനക്ഷമമല്ലാതാവുന്ന  അവയവങ്ങളുള്ള രോഗികളിൽ മരിച്ചു പോയ ഒരു വ്യക്തിയുടെ അവയവദാനം കൊണ്ട് അയാളുടെ ജീവൻ രക്ഷിക്കാനാവുകയും  ജീവിതനിലവാരം മെച്ചപ്പെടുത്താൻ  സാധിക്കുകയും ചെയ്യുന്നു. കഴിഞ്ഞ രണ്ട് പതിറ്റാണ്ടുകളായി അവയവമാറ്റ ശസ്ത്രക്രിയകൾ ക്രമേണ മെച്ചപ്പെടുകയും കുട്ടികളിലും യുവാക്കളിലും മികച്ച ഫലങ്ങൾ നൽകുകയും ചെയ്യുന്നു. വൃക്ക മാറ്റിവയ്ക്കൽ, ഡയാലിസിസിന് വിധേയരായി‌ ജീവിക്കുന്ന രോഗികളുടെ ജീവതനിലവാരം വർധിപ്പിക്കുന്നു. കരൾ, ഹൃദയം, ശ്വാസകോശം എന്നിവയുടെ ട്രാൻസ്പ്ലാന്റുകൾ, ചികിത്സ കൊണ്ട് മാറ്റാനാവാത്ത രോഗങ്ങളുള്ള രോഗികളുടെ ജീവൻ രക്ഷിക്കാൻ സഹായകരമാകുന്നു. അവയവ മാറ്റിവയ്ക്കൽ പരിപാടികളുടെ പ്രവർത്തനം ക്രമാനുഗതമായി വളരുകയാണ്. എന്നാൽ അവയവദാനങ്ങളുടെ തോതിൽ ലോക രാജ്യങ്ങൾക്കിടയിൽ വലിയ അന്തരമുണ്ട്.  ആഗോളതലത്തിലുളള ആവശ്യങ്ങൾ നോക്കുമ്പോൾ ഇപ്പോഴും അവയവദാനത്തിൻെറ തോത്  വളരെ കുറവാണ്. വികസിതവും സമ്പൂർണവുമായ ആരോഗ്യ പരിപാലന സംവിധാനങ്ങൾക്ക് അവയവ മാറ്റിവയ്ക്കൽ അത്യാവശ്യമാണ് എന്ന് എടുത്തു പറയേണ്ടിയിരിക്കുന്നു.

അവയവമാറ്റ ശസ്ത്രക്രിയകളുടെ ക്ലിനിക്കൽ പ്രാധാന്യം രോഗിയുടെ നിലനിൽപ്പിലെ സ്വാധീനം, രോഗാവസ്ഥയുടെ കുറവ്, തൊഴിൽ ജീവിതത്തിന്റെ പുരോഗതി, ട്രാൻസ്പ്ലാന്റ് ജനസംഖ്യയുടെ ആഗോള ജീവിത നിലവാരം എന്നിവയെ അടിസ്ഥാനമാക്കി വിലയിരുത്താവുന്നതാണ്.

 

അവയവം മാറ്റിവയ്ക്കലിനെ സംബന്ധിച്ചുള്ള ചില സ്ഥിതിവിവരക്കണക്കുകൾ

∙ രാജ്യത്തുടനീളം അവയവങ്ങളുടെ ലഭ്യതക്കുറവ് മൂലം ഓരോ വർഷവും ഏകദേശം 5 ലക്ഷം പേർ അവയവമാറ്റം നടക്കാതെ മരിക്കുന്നു.

∙ കാത്തിരിക്കുന്ന ട്രാൻസ്പ്ലാന്റുകളുടെ എണ്ണവും ലഭ്യമായ അവയവങ്ങളും തമ്മിൽ വലിയ അന്തരമുണ്ട്.

∙ നിരാശാജനകമായ സ്ഥിതിവിവരക്കണക്കുകൾ, കൂടുതൽ ആളുകൾ അവരുടെ അവയവങ്ങൾ ദാനം ചെയ്യേണ്ടതിന്റെ അടിയന്തര ആവശ്യകതയ്ക്ക് ഊന്നൽ കൊടുക്കുന്നു; അവയവങ്ങളുടെ തകരാർ മൂലം വീർപ്പുമുട്ടുന്ന ആളുകളുടെ ജീവൻ രക്ഷിക്കുക എന്നതാണ് മുഖ്യ ലക്ഷ്യം.

∙ ഒരു അവയവ ദാതാവിന് തന്റെ നന്നായി പ്രവർത്തിക്കുന്ന അവയവങ്ങൾ ദാനം ചെയ്യുന്നതിലൂടെ  6-8 ജീവൻ രക്ഷിക്കാൻ കഴിയും.

 

ആർക്കാണ് അവയവ ദാതാവാകാൻ കഴിയുക?

പ്രായം, ജാതി, മതം, സമുദായം, നിലവിലുള്ള അല്ലെങ്കിൽ മുൻകാല ആരോഗ്യസ്ഥിതി എന്നിവ പരിഗണിക്കാതെ ആർക്കും അവയവ ദാതാവാകാം.

 

Photo credit : vchal / Shutterstock.com
Photo credit : vchal / Shutterstock.com

അവയവ ദാന പ്രക്രിയ എപ്രകാരം?

ദശലക്ഷക്കണക്കിന് ആളുകൾ അവയവ ദാതാക്കളാകാൻ റജിസ്റ്റർ ചെയ്തിട്ടുണ്ടെങ്കിലും, വളരെ കുറച്ച് ദാതാക്കൾ അവയവദാനം അനുവദിക്കുന്ന രീതിയിൽ കടന്നുപോകുന്നു. അവയവദാന പ്രക്രിയയെക്കുറിച്ചുള്ള ചില വിശദാംശങ്ങൾ താഴെപ്പറയുന്നവയാണ്:

∙ ഒരു ദാതാവായി റജിസ്റ്റർ ചെയ്യണം

ദേശീയ / സംസ്ഥാന റജിസ്ട്രിയിൽ പേര് റജിസ്റ്റർ ചെയ്യുകയും നിങ്ങളുടെ കുടുംബത്തെ അറിയിക്കുകയും ചെയ്തുകൊണ്ട് ദാതാവാകാനുള്ള നിങ്ങളുടെ സമ്മതത്തോടെയാണ് അവയവദാന പ്രക്രിയ മിക്കപ്പോഴും ആരംഭിക്കുന്നത്. അന്തിമഘട്ടത്തിൽ രോഗമുള്ള ഒരാളുടെ ജീവൻ രക്ഷിക്കാൻ സഹായിക്കുന്ന ആദ്യപടിയാണിത്.

∙ ബ്രെയിൻ ഡെത്ത് ടെസ്റ്റിങ്

രോഗി ചികിത്സയോടും ബാഹ്യ ഉത്തേജനത്തോടും പ്രതികരിക്കുന്നില്ലെങ്കിൽ, മസ്തിഷ്ക മരണം സംഭവിച്ചിട്ടുണ്ടോ എന്ന് നിർണയിക്കാൻ ഡോക്ടർമാർ നിരവധി പരിശോധനകൾ നടത്തും. മസ്തിഷ്ക മരണം സംഭവിച്ച ഒരു രോഗിക്ക് മസ്തിഷ്ക പ്രവർത്തനമില്ല, സ്വന്തമായി ശ്വസിക്കാൻ കഴിയില്ല. മസ്തിഷ്ക മരണം മരണമാണ്, അത് മാറ്റാനാവാത്തതാണ്. മസ്തിഷ്ക മരണം സംഭവിച്ച രോഗികൾക്ക് മാത്രമേ അവയവ ദാതാക്കളാകാൻ കഴിയൂ.

 

ഒരു രോഗിക്ക് മസ്തിഷ്ക മരണം സംഭവിച്ചതായി ആരാണ് സാക്ഷ്യപ്പെടുത്തുന്നത്?

നിരവധി ഡോക്ടർമാരുടെ പാനൽ ആണ് മസ്തിഷ്ക മരണം സ്ഥിരീകരിക്കേണ്ടത് എന്ന് സർക്കാർ വ്യക്തമാക്കിയിട്ടുണ്ട്. പാനലിൽ ഇവർ ഉൾപ്പെടുന്നു:

∙ ആശുപത്രിയുടെ ചുമതലയുള്ള ഡോക്ടർ (മെഡിക്കൽ സൂപ്രണ്ട്)

∙ ഉചിതമായ അതോറിറ്റി നിയമിച്ച സർക്കാർ ഡോക്ടർമാരുടെ പാനലിൽ നിന്ന് നാമനിർദ്ദേശം ചെയ്യപ്പെട്ട ഡോക്ടർ.

∙ ഉചിതമായ അതോറിറ്റി, പാനലിൽ നിന്ന് നോമിനേറ്റ്  ചെയ്ത  രോഗിയെ ചികിത്സിച്ചിട്ടില്ലാത്ത ന്യൂറോളജിസ്റ്റ്/ന്യൂറോസർജൻ   .

∙ ഉചിതമായ അതോറിറ്റി, പാനലിൽ നിന്ന് നോമിനേറ്റ്  ചെയ്ത  രോഗിയെ ചികിത്സിക്കുന്ന ന്യൂറോളജിസ്റ്റ്/ന്യൂറോസർജൻ/ഇന്റൻസിവിസ്റ്റ് എന്നിവരാണ്.

 

മസ്തിഷ്ക മരണത്തിന് ശേഷം ഏതൊക്കെ അവയവങ്ങൾ ദാനം ചെയ്യാം?

കോർണിയ, ഹൃദയം, കരൾ, വൃക്കകൾ, കുടൽ, ശ്വാസകോശം, പാൻക്രിയാസ് തുടങ്ങിയ സുപ്രധാന അവയവങ്ങൾ ‘മസ്തിഷ്ക മരണം’ സംഭവിച്ചാൽ ദാനം ചെയ്യാൻ കഴിയും.

∙ അംഗീകൃത സംഭാവന

മരിച്ചയാൾ അവരുടെ റജിസ്ട്രിയിൽ ദാതാവായി റജിസ്റ്റർ ചെയ്തിട്ടുണ്ടോ എന്ന് ആരോഗ്യ സംരക്ഷണ അധികാരികൾ പരിശോധിക്കുന്നു. ഇന്ത്യയിൽ, അവയവദാനത്തിന് കുടുംബത്തിന്റെ സമ്മതം നിർബന്ധമാണ്, അവസാന വാക്ക് അവരുടേതാണ്.

രോഗി, ട്രാൻസ്‌പ്ലാന്റ് നടത്തുന്ന ആശുപത്രിയിൽ റജിസ്റ്റർ ചെയ്തിട്ടുണ്ടാവണം.

രോഗിയെ അതിനു ശേഷം വെയിറ്റിങ് ലിസ്റ്റിൽ ഉൾപ്പെടുത്തുന്നു.

മസ്തിഷ്ക മരണം സംഭവിച്ച ആളിൽ നിന്നുള്ള അവയവം ലഭ്യമാകുമ്പോൾ, രോഗിയെ അറിയിക്കുന്നു

∙ പൊരുത്തപ്പെടുത്തൽ പ്രക്രിയ

അവയവം മാറ്റിവയ്ക്കുന്നതിന് വൈദ്യശാസ്ത്രപരമായി അനുയോജ്യമാണോ എന്ന് ആരോഗ്യ വിദഗ്ധർ നിർണയിക്കുന്നു. അവയവം മാറ്റിവയ്ക്കുന്നതിന് അനുയോജ്യമായ സ്വീകർത്താവുമായി പൊരുത്തപ്പെടുത്താൻ സഹായിക്കുന്നതിന് വിവിധ പാരാമീറ്ററുകളിൽ പരിശോധനയുടെ ഒരു നീണ്ട നിരതന്നെ നടത്തുന്നു.

∙ അവയവങ്ങൾ വീണ്ടെടുക്കുന്നു

അവയവങ്ങൾ നീക്കം ചെയ്യുമ്പോൾ ഡോക്ടർമാർ അതീവശ്രദ്ധ പുലർത്തുന്നു. ഒട്ടുമിക്ക അവയവങ്ങൾക്കും താഴെപ്പറയുന്നതുപോലെ പരിമിതമായ ആയുസ്സ് ഉണ്ട്:

organ-donation

ഹൃദയം: 4-6 മണിക്കൂർ

കരൾ: 12-24 മണിക്കൂർ

വൃക്ക: 48-72 മണിക്കൂർ

ഹൃദയം-ശ്വാസകോശം: 4-6 മണിക്കൂർ

ശ്വാസകോശം: 4-6 മണിക്കൂർ

അവയവം നീക്കം ചെയ്ത ശേഷം, ശസ്ത്രക്രിയാ വിദഗ്ധർ അതിനെ കൃത്രിമമായി പ്രവർത്തിപ്പിക്കുന്ന ഒരു യന്ത്രവുമായി ബന്ധിപ്പിക്കുന്നു.

 

അവയവങ്ങളെ എങ്ങനെ ട്രാൻസ്‌പോർട് ചെയ്യാം

വീണ്ടെടുക്കപ്പെട്ട അവയവവും സ്വീകർത്താവും തമ്മിൽ ഒരു വിജയകരമായ ട്രാൻസ്പ്ലാന്റിനായി ഏകോപിപ്പിക്കുന്നതിന് സർജിക്കൽ ടീമുകൾ രാപ്പകലില്ലാതെ പ്രവർത്തിക്കുന്നു. ചില സന്ദർഭങ്ങളിൽ, ഒരു അവയവമാറ്റത്തിനായി ഒരു "ഗ്രീൻ കോറിഡോർ" തന്നെ സൃഷ്ടിക്കപ്പെടുന്നു. ആംബുലൻസിന് വേണ്ടി സൃഷ്ടിച്ച ഒരു പ്രത്യേക റോഡ് റൂട്ടാണിത്, മാറ്റിവയ്ക്കാൻ ഉദ്ദേശിച്ചുള്ള അവയവം നിശ്ചിത സമയത്തിനുള്ളിൽ നിർദിഷ്ട ആശുപത്രിയിലെത്തിക്കുന്നതിനു വേണ്ടിയാണിത്.

 

മരണശേഷം എപ്പോഴാണ് അവയവങ്ങൾ നീക്കം ചെയ്യുന്നത്?

കൃത്രിമമായി രക്തചംക്രമണം നടത്തുമ്പോൾ മസ്തിഷ്ക മരണം നിർണയിച്ചതിനു ശേഷം അവയവങ്ങൾ എത്രയും വേഗം നീക്കം ചെയ്യണം. 12 മുതൽ 24 മണിക്കൂറിനുള്ളിൽ അവയവങ്ങൾ നീക്കം ചെയ്യാം.

 

ദാതാക്കളെ വിലയിരുത്തുന്നതിന് എന്തെങ്കിലും മാനദണ്ഡങ്ങൾ ഉണ്ടോ? അവയവദാനത്തിന്റെ സുരക്ഷ എപ്രകാരം?

അവയവ ദാതാക്കളെ അവരുടെ ആരോഗ്യം, ഏതെങ്കിലും സാംക്രമിക രോഗങ്ങളുടെ സാന്നിധ്യം, അവരുടെ അവയവം ദാനം ചെയ്യുന്നതിനുള്ള ശാരീരികക്ഷമത എന്നിവ വിലയിരുത്തുന്നതിന് വിപുലമായി പരിശോധിക്കുന്നു. രക്തഗ്രൂപ്പ്, ഇമ്മ്യൂണോളജിക്കൽ സ്റ്റാറ്റസ്, മെഡിക്കൽ എടുത്തത് തുടങ്ങിയ ചില പരിശോധനകൾ എന്നിവ കൂടാതെ ട്രാൻസ്പ്ലാന്റ് ശസ്ത്രക്രിയയ്ക്ക് ദാതാക്കളുടെ ടിഷ്യു പൊരുത്തപ്പെടലും സ്വീകർത്താവുമായുള്ള അനുയോജ്യതയും പ്രധാനമാണ്. മെഡിക്കൽ ബോർഡ് അംഗീകരിച്ചാൽ മാത്രമേ അവർക്ക് ദാനം ചെയ്യാൻ അനുമതി ലഭിക്കൂ. അതിനാൽ അവയവങ്ങൾ സ്വീകരിക്കുന്നത് സുരക്ഷിതമാണ്.

 

അവയവങ്ങൾ ദാനം ചെയ്യുന്നതിൽ കുടുംബ പിന്തുണ പ്രധാനമായിരിക്കുന്നത് എന്തുകൊണ്ട്?

തീരുമാനം കുടുംബവുമായോ അടുത്ത ബന്ധുക്കളുമായോ ചർച്ച ചെയ്യേണ്ടത് പ്രധാനമാണ്. കാരണം, അടിയന്തര സാഹചര്യമോ അനിഷ്ട സംഭവങ്ങളോ ഉണ്ടായാൽ ആദ്യം ബന്ധപ്പെടുന്നത് കുടുംബത്തെയായിരിക്കും. അവരുടെ അനുമതി വാങ്ങിയ ശേഷം മാത്രമേ അവയവങ്ങൾ വീണ്ടെടുക്കാൻ ഡോക്ടർമാർക്ക് കഴിയൂ. നിങ്ങളുടെ തീരുമാനത്തെക്കുറിച്ച് നിങ്ങളുടെ കുടുംബത്തിന് അറിയാമെങ്കിൽ, നിങ്ങളുടെ ആഗ്രഹങ്ങൾ നിങ്ങൾ ആഗ്രഹിക്കുന്ന രീതിയിൽ നടപ്പിലാക്കും.

പോപ്പ് ഫ്രാൻസിസ് പറഞ്ഞത് എത്രയോ അന്വർഥമാണ്

"അവയവദാനം എന്നത് സാമൂഹിക ഉത്തരവാദിത്തത്തിന്റെ ഒരു പ്രവൃത്തി മാത്രമല്ല, എല്ലാ പുരുഷന്മാരെയും സ്ത്രീകളെയും ഒരുമിച്ച് ബന്ധിപ്പിക്കുന്ന സാർവത്രിക സാഹോദര്യത്തിന്റെ പ്രകടനമാണ്"

ഒന്നോർത്തു നോക്കു നമ്മുടെ ജീവിതം ദൈവത്തിന്റെ ദാനം ആണ്. നമ്മുടെ അവയവങ്ങൾ ദാനം ചെയ്യുമ്പോൾ അത് തികച്ചും ദൈവീകമായി തീരുന്നു. മരണാനന്തര ജീവിതം അതാണ് അവയവ ദാനം കൊണ്ട് അർഥമാക്കുന്നത്.

Content Summary: World Organ Donation Day 2022

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com