3 മാസം കൊണ്ട് 9 കിലോ ശരീര ഭാരം കുറച്ചെന്ന് ജ്യോതിക; എന്താണ് ആന്റി ഇൻഫ്ലമേറ്ററി ഡയറ്റ്?

ശരിയായ ഭക്ഷണ ശീലം തിരഞ്ഞെടുത്താൽ തന്നെ ആരോഗ്യ പൂർണമായ ജീവിതത്തിന്റെ മുക്കാൽ പങ്കായി. വ്യായാമം, ഉറക്കം തുടങ്ങിയവ പിന്നാലെ. ദഹനക്കേട്/ നീരുവീക്കം വരാതിരിക്കാൻ സഹായിക്കുന്ന ഭക്ഷണത്തിന് ഇപ്പോൾ പ്രചാരമേറെയാണ്. ബോളിവുഡ് നടിമാരായ വിദ്യ ബാലനും സമാന്ത റൂത്ത് പ്രഭുവുമൊക്കെ ഇത്തരത്തിൽ ആന്റി ഇൻഫ്ലമേറ്ററി ഡയറ്റ് പിന്തുടർന്ന് ശരീര ഭാരം കുറച്ചത് ചർച്ചയായിരുന്നു. ജിമ്മിൽ പോകാതെയാണ് വിദ്യ വണ്ണം കുറച്ചത് എന്നതും ശ്രദ്ധേയം. വിദ്യാ ബാലൻ പറഞ്ഞു കൊടുത്ത ഡയറ്റ് പിന്തുടർന്ന് 3 മാസം കൊണ്ട് 9 കിലോ ശരീര ഭാരം കുറച്ചെന്ന് നടി ജ്യോതിക അടുത്തിടെ വെളിപ്പെടുത്തിയിരുന്നു.

എന്താണ് ആന്റി ഇൻഫ്ലമേറ്ററി ഡയറ്റ്?
രോഗ പ്രതിരോധ സംവിധാനത്തിന്റെ ഭാഗമാണ് വീക്കം. മുറിവുണ്ടാകുമ്പോൾ ആ ഭാഗം വീർത്തു വരാറില്ലേ. രോഗാണുക്കൾ ഉള്ളിൽ കടക്കാതിരിക്കാൻ ശരീരം പ്രയോഗിക്കുന്ന പ്രതിരോധമാണിത്. എന്നാൽ, ചിലരിൽ നീരുവീക്കം തുടരെത്തുടരെ ഉണ്ടാകാം. ഇതുവഴി വണ്ണം കൂടാം. (വിദ്യ ബാലന്റെ ശരീര ഭാരം കൂടുന്നതിന്റെ കാരണം കൊഴുപ്പല്ല, നീരുവീക്കമാണെന്ന് അവരുടെ ആരോഗ്യ വിദഗ്ധർ പറയുന്നു.) വിട്ടുമാറാത്ത വീക്കം അപകടകാരിയാണ്. മോശം ആരോഗ്യത്തിലേക്ക് ഇതു വിരൽ ചൂണ്ടുന്നു. ഹൃദയാഘാതം, പക്ഷാഘാതം എന്നിവയ്ക്കും രക്തത്തിലെ പഞ്ചസാരയെ കൈകാര്യം ചെയ്യാനുള്ള ഇൻസുലിന്റെ കഴിവിനെ ബാധിക്കുക വഴി ടൈപ്പ്‌ 2 പ്രമേഹത്തിനും നീർക്കെട്ട്‌ കാരണമാകാം. സമ്മർദം, ലഹരി ഉപയോഗം തുടങ്ങിയവയും വീക്കത്തിനു കാരണമാകാറുണ്ട്.

ഈ ഭക്ഷണങ്ങൾ ശീലമാക്കാം
∙ പഴങ്ങൾ, പച്ചക്കറികൾ, ചെറു ധാന്യങ്ങൾ: ആന്റി ഓക്സിഡന്റുകൾ ധാരാളം അടങ്ങിയ അവക്കാഡോ, ബ്ലൂ ബെറി, മുന്തിരി, കാൻ ബെറി, ആപ്പിൾ, സിട്രസ് പഴങ്ങൾ തുടങ്ങിയവ.
∙ കാരറ്റിൽ അടങ്ങിയിരിക്കുന്ന ബീറ്റ കരോട്ടിൻ, വൈറ്റമിൻ എ, സി എന്നിവയുടെ സ്രോതസ്സായ കാപ്സിക്കം, വൈറ്റമിൻ സി ധാരാളം അടങ്ങിയ ഉള്ളി എന്നിവയൊക്കെ നീരുവീക്കം കുറയ്ക്കാൻ സഹായിക്കുന്ന പച്ചക്കറികളാണ്.
∙ പ്രോ ബയോട്ടിക്‌ വിഭാഗത്തിൽപെടുന്ന ഓട്സ്, വാഴപ്പഴം, യോഗർട്ട് എന്നിവ ഭക്ഷണത്തിൽ ഉൾപ്പെടുത്താം.
∙ കൊഴുപ്പ് ലഭിക്കാൻ ഒലിവ് എണ്ണ, കടൽ മത്സ്യങ്ങളായ ചൂര, അയല എന്നിവയും ഒമേഗ 3 ഫാറ്റി ആസിഡ് ലഭിക്കാൻ ചിയ സീഡ്, ഫ്ലാക്സീഡ് തുടങ്ങിയവയും സഹായിക്കും.
∙ വെളുത്തുള്ളി, ഇഞ്ചി, മഞ്ഞൾ, കറുവപ്പട്ട എന്നിവ ഭക്ഷണത്തിൽ ഉറപ്പാക്കണം. കുരുമുളകിൽ കാണപ്പെടുന്ന പൈപ്പെറിൻ എന്ന സംയുക്തത്തിന്‌ ആന്റി ഇൻഫ്ലമേറ്ററി ഗുണങ്ങളുണ്ട്‌. ഗ്രീൻ ടീ, മഞ്ഞൾ ചേർത്ത പാൽ, ജിൻജർ ടീ തുടങ്ങിയവ കുടിക്കുന്നത് നല്ലതാണ്.

ഒരു ദിവസത്തെ ഭക്ഷണക്രമം
പ്രഭാത ഭക്ഷണം
നാരങ്ങ ഇട്ട ചൂട് വെള്ളം ഒരു ഗ്ലാസ്‌ കുടിച്ചുകൊണ്ട് ഒരു ദിവസം തുടങ്ങാം. ഹൈഡ്രെറ്റഡ് ആകാനും ദഹനത്തെ ഉത്തേജിപ്പിക്കാനും പോഷകങ്ങളെ ശരിയായി ആഗിരണം ചെയ്യാനും ഇതു സഹായിക്കും ഫൈബർ ധാരാളം അടങ്ങിയ പ്രഭാത ഭക്ഷണമാണ് നല്ലത്. മിക്സഡ് ഫ്രൂട്ട്സ്, നട്സ്, ചിയ സീഡ് എന്നിവ ചേർത്ത ഓട്സ് കഴിക്കാം. ഗ്രീക്ക് യോഗർട്ടും നല്ലതാണ് (ഒരു സ്പൂൺ തേനും കുറച്ചു ഫ്ലാക്‌സീഡും ബെറികളും ചേർക്കാം). സ്മൂത്തികളും ഉൾപ്പെടുത്താം.
സ്നാക്സ്
സ്നാക്കായി ആപ്പിൾ, ബദാം മിൽക്ക്, മഞ്ഞൾ ചേർത്ത പാല് എന്നിവയിൽ ഏതെങ്കിലും. വോൾനട്ടും നല്ലതാണ്.
ഉച്ചഭക്ഷണം
ഉച്ചയ്ക്ക് ബ്രൗൺ റൈസ് കൊണ്ടുള്ള ചോറ്, കൂടെ പനീർ അല്ലെങ്കിൽ ചിക്കൻ. ധാരാളം പച്ചക്കറികൾ. ചെറിയ ഒരു സാലഡ് (ഒലിവ് എണ്ണയും മിക്സഡ് പച്ചക്കറികളും ഉൾപ്പെടുന്നത്). കൂടെ ലെമൺ ജ്യൂസും.
സ്നാക്സ്
ഉച്ചയ്ക്കുശേഷം സ്നാക്കായി ബദാം അല്ലെങ്കിൽ ഏതെങ്കിലും പഴം.
അത്താഴം
ദഹനശേഷി കൂടുതലുള്ള ആഹാരങ്ങളാണ് അത്താഴത്തിന് നല്ലത്. വെജിറ്റബിൾ സൂപ്പോ പരിപ്പും ചോറ്/ റൊട്ടി എന്നിവയിൽ ഏതെങ്കിലും നല്ലത്. കിടക്കുന്നതിനു മുൻപ് ഒരു നുള്ള് മഞ്ഞൾ ചേർത്ത ഒരു ഗ്ലാസ്‌ പാൽ കുടിക്കാം. ഇതു ശരിയായ ഉറക്കത്തിനും ദഹനത്തിനും ശരീരത്തെ ഡി ടോക്സിഫൈ ചെയ്യുന്നതിനും സഹായിക്കും.

ഇൻഫ്ലമേഷൻ തിരിച്ചറിയാം
ആഹാര ശീലത്തിലെ മാറ്റം, മാനസിക സമ്മർദം, ഉറക്കക്കുറവ് എന്നിവ മൂലമെല്ലാം ഇൻഫ്ലമേഷൻ (വീക്കം) ഉണ്ടാകാം. ഇതു തിരിച്ചറിയാൻ മെഡിക്കൽ ടെസ്റ്റുകളുണ്ട്. വീക്കത്തിലേക്ക് നയിക്കുന്ന പ്രശ്നങ്ങൾ ഉണ്ടോ എന്ന് നോക്കും. ആക്ടീവ് ആയിരുന്ന ഒരാൾക്ക് പെട്ടെന്ന് ക്ഷീണം തോന്നുന്നതൊക്കെ ഇതിന്റെ ഭാഗമാകാം. പരിശോധനയിൽ ഇപ്പോഴത്തെ ആഹാര ശീലം എങ്ങനെയാണെന്ന് നോക്കും. ഇതിലെ പോഷകങ്ങളുടെ ഏറ്റക്കുറച്ചിലുകൾ ആദ്യം ക്രമീകരിക്കും. ചിലർക്ക് ചില ആഹാരങ്ങൾ പിടിക്കില്ല. പാൽ എല്ലാവർക്കും പറ്റണം എന്നില്ല. ഇത്തരം പ്രശ്നങ്ങൾ വീണ്ടും പഠിക്കും. ചില ആഹാര സാധനങ്ങൾ ഒഴിവാക്കും. ഇതിനെ എലിമിനേറ്റിങ് ഡയറ്റ് എന്നു പറയും. അടുത്ത ഘട്ടത്തിൽ ഇമ്യൂണിറ്റി കൂട്ടുന്ന ആഹാര സാധനങ്ങൾ ഉൾപ്പെടുത്താൻ നിർദേശിക്കും. അതേപോലെ സോഫ്റ്റ്‌ ഡ്രിങ്ക്സ് പോലുള്ളവ ഒഴിവാക്കാനും. ചുരുക്കത്തിൽ പണ്ടുള്ളവർ പറയുന്ന സമീകൃതാഹാരത്തിന്റെ (balanced diet) പരിഷ്കരിച്ച രൂപമാണ് ആന്റി ഇൻഫ്ലമേറ്ററി ഡയറ്റ്.

വിവരങ്ങൾ : മഞ്ജു പി.ജോർജ്, ചീഫ് ഡയറ്റീഷ്യൻ, വിപിഎസ് ലേക്‌ഷോർ, ഹോസ്പിറ്റൽ, കൊച്ചി