മധുരപാനീയങ്ങൾ വാങ്ങിത്തരാൻ കൊച്ചുകുട്ടികൾ വാശി പിടിക്കുന്നത് സ്വാഭാവിക‌ം. എന്നാൽ അതുകേട്ട് ഏതെങ്കിലും ഷുഗർ ഡ്രിങ്ക് അവർക്കു വാങ്ങിക്കൊടുക്കുന്ന അച്ഛനമ്മമാർ ഒരു കാര്യം ഓർമിച്ചോളൂ, നിങ്ങൾ നിങ്ങളുടെ കുട്ടിയെ ഒരു വലിയ രോഗിയാക്കുകയാണ്. അമേരിക്കൻ കോളജ് ഓഫ് കാർഡിയോളജിയിൽ നടന്ന പഠനത്തിൽ നിന്നാണ് ഈ കണ്ടുപിടിത്തം. ഷുഗർ ഡ്രിങ്ക്സ് കുട്ടികളിൽ ഹൃദ്രോഗസാധ്യതകൾ വർധിപ്പിക്കുമെന്നാണ് ഗവേഷകർ അഭിപ്രായപ്പെടുന്നത്.
അമേരിക്കയിലെ കുട്ടികളിലെ പകുതിയും അമിതമായി ഷുഗർ ഡ്രിങ്ക്സിന് അടിമപ്പെട്ടവരാണ്. ഇവരിൽ നടത്തിയ നിരീക്ഷണത്തിൽ നിന്നാണ് ഈ നിഗമനം. കുട്ടികളിൽ അമിതവണ്ണത്തിനും ഇത് കാരണമാകുന്നു. ആവശ്യത്തിൽ അധികം കലോറിയാണ് ഇത്തരം കൃത്രിമ പാനീയങ്ങളിൽ ഉള്ളത്. കാലക്രമേണ കുട്ടികൾ ടൈപ്പ് 2 പ്രമേഹരോഗികളായി മാറാനും 26 ശതമാനം സാധ്യത കൂടുതലാണ്. അമിതമായി ഷുഗർ ഡ്രിങ്ക്സ് കഴിക്കുന്ന കുട്ടികളിൽ ഹൃദയാഘാത സാധ്യത 35 ശതമാനവും പക്ഷാഘാതത്തിനുള്ള സാധ്യത 16 ശതമാനവും കൂടുതലാണ്.
