വേറെ ലെവലാണ് ഈ വീട്! ഇവിടെയെത്തുന്നവർ ഒറ്റക്കെട്ടായി പറയുന്നു
Mail This Article
കോട്ടയം ജില്ലയിലെ കടുത്തുരുത്തിയിലാണ് ജെയിംസ് മാത്യുവിന്റെയും കുടുംബത്തിന്റെയും പുതിയ വീട്. മൂന്നു തട്ടുകളായി കിടക്കുന്ന കുന്നിൻപ്രദേശത്തിന്റെ സ്വാഭാവികതയെ അലോസരപ്പെടുത്താതെയാണ് വീട് രൂപകൽപന ചെയ്തത്. വീടിനായി ഭൂമി ഇടിച്ചു നിരത്തുകയൊന്നും ചെയ്തില്ല. അതിനാൽ വീടിനുള്ളിലും പല തട്ടുകളായാണ് ഇടങ്ങൾ വിന്യസിച്ചിരിക്കുന്നത്. മൂന്ന് വശത്തുനിന്നും വ്യത്യസ്തമായ കാഴ്ചകളാണ് വീടിനു ലഭിക്കുന്നത്.
68 സെന്റ് പ്ലോട്ടിൽ, ലാൻഡ്സ്കേപ്പിനായി ധാരാളം സ്ഥലം വിട്ടിട്ടുണ്ട്. വീടിന്റെ ഗെയ്റ്റ് കടന്നു അകത്തെത്തുമ്പോൾ സ്വാഗതമോതുന്നത് വൃത്താകൃതിയിലുള്ള പുൽത്തകടിയും അതിനുചുറ്റുമുള്ള ഫൗണ്ടനുമാണ്. കേരളത്തിന്റെ ട്രോപ്പിക്കൽ ശൈലിക്ക് അനുയോജ്യമായി പല തട്ടുകളായി ഒരുക്കിയ മേൽക്കൂരയാണ് എലിവേഷനിലെ ആകർഷണം.
സിറ്റൗട്ട് കടന്ന് അകത്തെത്തിയാൽ ആദ്യ ലെവലിൽ ഫോർമൽ ലിവിങ്, സ്റ്റെയർകേസ്, ലിഫ്റ്റ്, ഒരു കിടപ്പുമുറി എന്നിവയാണുള്ളത്. രണ്ടാമത്തെ ലെവലിൽ ഫാമിലി ലിവിങ്, ഡൈനിങ്, പാഷ്യോ, കിച്ചൻ, കോർട്യാർഡ്, രണ്ടു കിടപ്പുമുറികൾ എന്നിവ ഒരുക്കി. മൂന്നാമത്തെ ലെവലിൽ രണ്ടു കിടപ്പുമുറികളും ബാൽക്കണിയും ഓപ്പൺ ടെറസുമാണുള്ളത്. മൊത്തം 5770 ചതുരശ്രയടിയുടെ വിശാലതയിലാണ് വീട് പടർന്നുപന്തലിച്ചു നിൽക്കുന്നത്.
അതിവിശാലമായ ഒരു ലോകത്തേക്ക് എത്തിയ പ്രതീതി നൽകുന്ന ഡൈനിങ് ഹാൾ ഡബിൾ ഹൈറ്റിലാണ്. 12 പേർക്ക് ഇരുന്നു ഭക്ഷണം കഴിക്കാൻ പാകത്തിൽ വിശാലമായ തീൻമേശ സജ്ജമാക്കി. ഡൈനിങ്ങിൽ നിന്നും പുറത്തെ പാഷ്യോയിലേക്ക് ഇറങ്ങാൻ വാതിൽ നൽകി.
ഫാമിലി ലിവിങ്ങിനു സമീപമാണ് കോർട്യാർഡ്. ഇവിടെ ചുവരിൽ സ്ട്രിപ്പ് വിൻഡോകൾ നൽകി പ്രകാശത്തെ അകത്തേക്കാനയിക്കുന്നു. നിലത്ത് പെബിളുകൾ വിരിച്ചു. മധ്യത്തിലായി വുഡൻ ഡെക്ക് നൽകി വേർതിരിച്ചു.
സുതാര്യമായ ഡിസൈനിലാണ് സ്റ്റെയർ ഏരിയ. തടിയുടെ പ്രൗഢിയും ഗ്ലാസിന്റെ ഭംഗിയുമാണ് കൈവരികളിൽ. ഗോവണിയുടെ ആദ്യ ലാൻഡിങ്ങിലെ ചുവരിൽ വിശാലമായ ഗ്ലാസ് ജാലകം നൽകി ഇതുവഴി പ്രകാശം വീട്ടിലേക്ക് വിരുന്നെത്തുന്നു. മറ്റൊരു ഹൈലൈറ്റ്, കൊത്തുപണികളോടുകൂടിയ മേൽക്കൂരയാണ്. ചെട്ടിനാടൻ കൊട്ടാരങ്ങളിൽ കാണുംവിധമാണ് ഈ ശിൽപവിദ്യ.
മോഡേൺ സൗകര്യങ്ങൾ ഒരുക്കി വിശാലമായാണ് നാലു കിടപ്പുമുറികളും. അറ്റാച്ഡ് ബാത്റൂമുകളിൽ നാച്ചുറൽ ലൈറ്റ് ലഭിക്കാൻ ഗ്ലാസ് സീലിങ്ങും നൽകിയിട്ടുണ്ട്. വാഡ്രോബ്, ഡ്രസിങ് സ്പേസ്, സ്റ്റഡി സ്പേസ് എന്നിവയെല്ലാം ഇവിടെ നൽകിയിട്ടുണ്ട്.
ഡൈനിങ്ങിലേക്ക് തുറക്കുന്ന ഓപ്പൺ കിച്ചനാണ് ഒരുക്കിയത്. മോഡുലാർ ശൈലിയിൽ ഒരുക്കിയ മെയിൻ കിച്ചണിൽ എല്ലാ മോഡേൺ സൗയകാര്യങ്ങളും സമ്മേളിക്കുന്നു. ലാമിനേറ്റ്, ഗ്ലാസ് ഫിനിഷിലാണ് കിച്ചൻ ക്യാബിനറ്റുകൾ. കൗണ്ടറിൽ നാനോവൈറ്റ് വിരിച്ചു. സമീപം വർക്കേരിയയും സെർവന്റ്സ് റൂമും നൽകി.
അതിവിശാലമായ ഇടങ്ങൾ, കാറ്റും വെളിച്ചവും പച്ചപ്പും നിറയുന്ന അകത്തളങ്ങൾ, പ്രൗഢമായ ഫർണിഷിങ്, ജിപ്സം ഫോൾസ് സീലിങ്, തീം ലൈറ്റിങ്, സ്മാർട് ഹോം സൗകര്യങ്ങൾ എല്ലാം ഈ വീടിനെ ആഡംബരപൂർണമായ ഒരു കാഴ്ചാനുഭവമാക്കി മാറ്റുന്നു.
Project facts
Location- Kaduthuruthy, Kottayam
Plot- 68 cent
Area- 5770 SFT
Owner- James Mathew
Architects- Koshy Alex, Zeril Jose
Vastushilpalaya Consultancy, Kowdiar
Mob- 9847038460
Completion year- 2018
English Summary- Luxury House in Multilevel Plot Plan