100 % ഒറിജിനൽ; കലർപ്പില്ലാത്ത ഇത്തരം വീടുകൾ കേരളത്തിൽ കുറവ്
Mail This Article
തിരൂർ വരാമ്പനാല എന്ന സ്ഥലത്താണ് സുനീറിന്റെയും കുടുംബത്തിന്റെയും പുതിയ വീട്. കൊളോണിയൽ പ്രൗഢിയിൽ നിലകൊള്ളുന്ന ഭവനം- അതാണ് പ്രദേശത്തെ മറ്റുവീടുകളിൽനിന്നും ഇതിനെ വ്യത്യസ്തമാക്കുന്നത്. റോഡ്നിരപ്പിൽ നിന്നും 4.5 മീറ്റർ താഴ്ന്നുകിടക്കുന്ന പ്ലോട്ടാണിത്. അതിനാൽ പുറംകാഴ്ച നന്നായി ലഭിക്കാൻ റൂഫിങ്ങിന് പ്രാധാന്യം നൽകി. യൂറോപ്പിൽ നിന്നും ഇറക്കുമതി ചെയ്ത റൂഫിങ് ടൈലുകളാണ് പുറംകാഴ്ചയ്ക്ക് പ്രൗഢി പകരുന്നത്.
സിറ്റൗട്ട്, ഫോർമൽ ലിവിങ്, ഫാമിലി ലിവിങ്, ഡൈനിങ്, കിച്ചൻ, വർക്കേരിയ, ആറു കിടപ്പുമുറികൾ, അപ്പർ ലിവിങ്, ബാൽക്കണി എന്നിവയാണ് 3300 ചതുരശ്രയടിയിൽ ഉൾക്കൊള്ളിച്ചത്. വീടിന്റെ ഓരോ ഇടത്തും കൊളോണിയൽ ശൈലി പ്രകടമാകുന്നു. ഫർണിച്ചർ, ഫർണിഷിങ്, പാനലിങ് എന്നിവയിലെല്ലാം ഇവ മനസിലാക്കാം. വൈറ്റ്- ബെയ്ജ് കളർ ടോണിലാണ് കോമൺ ഏരിയകൾ.
ഫർണിച്ചറുകൾ എല്ലാം കസ്റ്റംമെയ്ഡായി ഒരുക്കി. ഫർണിച്ചർ റസ്റ്റിക്- മാറ്റ് ഫിനിഷിലാണ് നിർമിച്ചത്. ബ്രാസിൽ തീർത്ത ലൈറ്റ് ഫിറ്റിങ്ങുകളാണ് ഇന്റീരിയറിലെ ഹൈലൈറ്റ്. തടി കൊണ്ടാണ് സ്റ്റെയർകേസ്. കൈവരികളിലും തടി തന്നെ ഉപയോഗിച്ചു. സ്റ്റെയർ കയറി മുകളിലെത്തിയാൽ മൂന്നു കിടപ്പുമുറികൾ, അപ്പർ ലിവിങ് എന്നിവ ഒരുക്കി.
താഴത്തെ നിലയുടെ മേൽക്കൂര ഉയരം കൂട്ടി നിർമിച്ചതുകൊണ്ട് ഉള്ളിൽ ചൂടും കുറയുന്നു. ചെരിഞ്ഞ റൂഫിലെ സീലിങ് പാറ്റേണുകളും ഇന്റീരിയറിലെ ഭംഗിയാണ്.
ലിവിങ്- ഡൈനിങ് സ്പേസുകൾ പാർടീഷൻ ഒഴിവാക്കി തുറന്ന നയത്തിലാക്കി. കൊളോണിയൽ തീം പിന്തുടർന്നാണ് കിടപ്പുമുറികൾ. അറ്റാച്ഡ് ബാത്റൂം, വാഡ്രോബ്, ഡ്രസിങ് സ്പേസ്, സൈഡ് ടേബിൾ എന്നിവ മുറികളിൽ വരുന്നു.
കൊളോണിയൽ ഭംഗിയുള്ള അടുക്കള. ആഷ് വുഡ് കൊണ്ടാണ് ക്യാബിനറ്റ്. കൗണ്ടറിൽ സിസർ സ്റ്റോൺ വിരിച്ചു. ഒരു പാൻട്രി ടേബിളിനും കിച്ചണിൽ സ്ഥാനംനൽകി.
പൊതുവെ നമ്മുടെ നാട്ടിൽ കൊളോണിയൽ തീമിൽ ഒരുക്കുന്ന വീടുകളിൽ പുറംകാഴ്ച മാത്രമായിരിക്കും ഈ ശൈലി പിന്തുടരുന്നത്. എന്നാൽ ഇവിടെ 100 % അകംപുറം കൊളോണിയൽ പ്രൗഢി പിന്തുടരുന്നു എന്നതാണ് സവിശേഷത. വീട്ടുകാരുടെ ആഗ്രഹത്തിനോട് 100 % നീതിപുലർത്തുന്ന വീട് ഇപ്പോൾ ഈ നാട്ടിലെ ശ്രദ്ധാകേന്ദ്രം കൂടിയാണ്.
Project facts
Location- Varambanala, Tirur
Plot- 42 cent
Area- 3300 SFT
Owner- Suneer
Design- Nufail- Shabana Architects, Calicut
Mob- 9048241331 8086188885
Y.C- Mar 2021
English Summary- Colonial House Plans Kerala; Veedu Magazine