'വിശ്വസിക്കാനാകുന്നില്ല, ശരിക്കും ഇത് 5 സെന്റിലാണോ'? സൂപ്പർഹിറ്റായി ഈ അദ്ഭുതവീട്
Mail This Article
5 സെന്റ് പ്ലോട്ടിൽ പണിയുന്ന വീട്ടിൽ എത്ര സൗകര്യങ്ങൾ പ്രതീക്ഷിക്കാം? വളരെ കുറച്ചുമാത്രമേ സാധാരണ എല്ലാവരും പ്രതീക്ഷിക്കുകയുള്ളൂ. എന്നാൽ തിരുവനന്തപുരം ബാലരാമപുരത്തുള്ള ജയചന്ദ്രന്റെയും കുടുംബത്തിന്റെയും വീട് വ്യത്യസ്തമാകുന്നത് ഇവിടെയാണ്.
ഒരിഞ്ചു പോലും നഷ്ടമാക്കാതെ, ഒരു 10 സെന്റിൽ പണിയുന്ന വീടിന്റെ അതേ സൗകര്യങ്ങൾ ഇവിടെ ഒരുക്കിയിരിക്കുന്നു. നിയമപ്രകാരം വീടിനു ചുറ്റും ഒഴിച്ചിടേണ്ട സ്ഥലം വിട്ടുകഴിഞ്ഞപ്പോൾ 4 സെന്റിൽ താഴെയാണ് വീടിനായി ബാക്കിയായത്. പരമാവധി സ്ഥലം ഉപയുക്തമാക്കാൻ ഫ്ലാറ്റ്- ബോക്സ് ആകൃതിയിലാണ് എലിവേഷൻ ഒരുക്കിയത്. മുകളിലെ പുറംചുവരിൽ വുഡൻ ഫിനിഷ്ഡ് ക്ലാഡിങ് പതിച്ച് ഹൈലൈറ്റ് ചെയ്തു.
പോർച്ച്, സിറ്റൗട്ട്, ഗസ്റ്റ് ലിവിങ്, ഡൈനിങ്, കിച്ചൻ, വർക്കേരിയ, നാലു കിടപ്പുമുറികൾ, സ്റ്റഡി ഏരിയ, ഗസീബോ, ബാൽക്കണി എന്നിവയാണ് 2250 ചതുരശ്രയടിയിൽ ഉൾക്കൊള്ളിച്ചത്. കുറഞ്ഞ സ്ഥലത്ത് പരമാവധി വിശാലത തോന്നിക്കാൻ സെമി-ഓപ്പൺ നയത്തിലാണ് ഇടങ്ങൾ ചിട്ടപ്പെടുത്തിയത്. വൈറ്റ്- വുഡൻ എർത്തി നിറങ്ങളാണ് അകത്തളങ്ങളിൽ ഉപയോഗിച്ചത്.
പ്രധാനവാതിൽ തുറന്നു പ്രവേശിക്കുന്നത് ഒരു ഹാളിലേക്കാണ്. ലിവിങ്- ഡൈനിങ് സ്പേസുകൾ വേർതിരിക്കുന്നത് ടിവി വോളാണ്. മുകളിലേക്ക് കയറുക എന്ന ഫങ്ഷനു മാത്രം പ്രാധാന്യം കൊടുത്ത് ഡെഡ് സ്പേസ് ഒഴിവാക്കിയാണ് സ്റ്റെയർകേസ് വിന്യസിച്ചത്.
വീട്ടുകാർക്ക് ചുറ്റിലും ധാരാളം പച്ചപ്പ് വേണം എന്നുണ്ടായിരുന്നു എങ്കിലും സ്ഥലപരിമിതി തടസമായിരുന്നു. അങ്ങനെയാണ് കാർ പോർച്ചിനു മുകളിൽ ഒരു ഗസീബോ ഒരുക്കാം എന്ന ആശയം ഡിസൈനർ പങ്കുവച്ചത്. ഇപ്പോൾ വീട്ടുകാരുടെ ഫേവറിറ്റ് സ്പേസും ഈ പച്ചത്തുരുത്താണ്. ജിഐ+ ടഫൻഡ് ഗ്ലാസ് മേൽക്കൂര കൊടുത്തശേഷം ധാരാളം ചെടികളും സിറ്റിങ് സ്പേസും ഇവിടെ സജ്ജീകരിച്ചു.
വീട്ടുകാർക്ക് എങ്ങനെയെങ്കിലും ഒരു കോർട്യാർഡ് സ്പേസ് വീട്ടിൽ വേണം എന്ന് ആഗ്രഹമുണ്ടായിരുന്നു. അങ്ങനെയാണ് കുറഞ്ഞ സ്ഥലത്തും ഒരു സൈഡ് കോർട്യാർഡ് ചിട്ടപ്പെടുത്തിയത്. ഇവിടെ ബുദ്ധ പ്രതിമ നൽകി അലങ്കരിച്ചു. വശത്തെ വലിയ ഗ്ലാസ് ഭിത്തിയിലൂടെ പ്രകാശം ഉള്ളിലേക്ക് എത്തുന്നു.
വൈറ്റ് ഗ്ലോസി വിട്രിഫൈഡ് ടൈലാണ് നിലത്തുവിരിച്ചത്. ലൈറ്റുകൾ ഇതിൽ പ്രതിഫലിക്കുമ്പോൾ അകത്തളത്തിനു കൂടുതൽ വലുപ്പം തോന്നിക്കും എന്ന ഗുണവുമുണ്ട്. ഗൃഹനാഥന്റെ പഴയ തറവാട് പൊളിച്ചപ്പോൾ കിട്ടിയ തടി ഇവിടെ പുനരുപയോഗിച്ചിട്ടുണ്ട്. കിടപ്പുമുറിയുടെ ഹെഡ്ബോർഡിൽ ഇതാണുള്ളത്. കൂടാതെ മുകൾനിലയിൽ ഒരു ആട്ടുകട്ടിലും പഴയ തടി കൊണ്ട് പണിതതാണ്.
താഴെയും മുകളിലും രണ്ടുവീതം കിടപ്പുമുറികൾ ഉൾക്കൊള്ളിച്ചു. അറ്റാച്ഡ് ബാത്റൂം, വാഡ്രോബ് സൗകര്യങ്ങൾ കൊടുത്തു.
പ്ലൈവുഡ്+ ലാമിനേറ്റ് ഫിനിഷിലാണ് പാൻട്രി കിച്ചൻ. വറുക്കുമ്പോഴും പൊരിക്കുമ്പോഴും മണം മറ്റിടങ്ങളിലേക്ക് പരക്കാതിരിക്കാൻ സ്ലൈഡിങ് ഗ്ലാസ് ഡോറും ഇവിടെ കൊടുത്തിട്ടുണ്ട്. സമീപം വർക്കേരിയയും സജ്ജീകരിച്ചു.
വീടിന്റെ പുറംചുവരിലും ചുറ്റുമതിലിലുമെല്ലാം പ്രൊഫൈൽ ലൈറ്റുകൾ കൊടുത്തിട്ടുണ്ട്. സന്ധ്യ മയങ്ങുമ്പോൾ ഇവ കൺതുറക്കും. അപ്പോൾ വീട് കാണാൻ ഒരു പ്രത്യേക ലുക്ക് തന്നെയാണ്. ചുരുക്കത്തിൽ ഈ വീട്ടിലെ കാഴ്ചകൾ കണ്ടിറങ്ങിയാൽ, ഇത് വെറും 5 സെന്റിൽ നിർമിച്ച വീടാണെന്ന് വിശ്വസിക്കാൻ പാടുപെടും. സ്ട്രക്ചറും ഫർണിഷിങ്ങും സഹിതം 53 ലക്ഷം രൂപയാണ് വീടിനു ചെലവായത്. പരിമിതികൾക്കുള്ളിൽ ആഗ്രഹിച്ച പോലെയൊരു വീട് ലഭിച്ചതിൽ വീട്ടുകാരും ഹാപ്പി.
Project facts
Location- Balaramapuram, Trivandrum
Plot- 5 cent
Area- 2250 SFT
Owner- Jayachandran
Design- Arun TG
Graphite Divine Homes, Trivandrum
Mob- 9895955955
Y.C- Jan 2021
Budget- 55 Lakhs
English Summary- Best House Plans in 5 cent Kerala; Veedu Magazine