ജീവിതസാഹചര്യങ്ങൾക്കൊത്ത് ബുദ്ധിപരമായി വീടൊരുക്കി; പ്രവാസികൾക്ക് മാതൃകയാക്കാം
Mail This Article
മാഹിക്കടുത്ത് കല്ലാമല എന്ന പ്രദേശത്താണ് പ്രവാസിയായ തൻഹീറിന്റെയും കുടുംബത്തിന്റെയും പുതിയ വീട്. തറവാടിനോട് ചേർന്നുള്ള 10 സെന്റ് വേർതിരിച്ചാണ് വീടുപണിതത്. സ്ട്രക്ചർ പണിതശേഷമാണ് ആർക്കിടെക്ട് മുഹമ്മദ് അസ്മത്തിനെ വീടിന്റെ ബാക്കി കാര്യങ്ങൾ വീട്ടുകാർ ഏൽപിച്ചത്. അത് ഭംഗിയായി അദ്ദേഹം പൂർത്തിയാക്കി.
പ്രവാസിയായതുകൊണ്ട് പരിപാലനം കൂടി മനസ്സിൽകണ്ടു മിനിമൽ ശൈലിയിലാണ് വീട് ഡിസൈൻ ചെയ്തത്. സമകാലിക ബോക്സ് മാതൃകയിലാണ് എലിവേഷൻ. വീടിന്റെ ഒരു വശത്തു ബ്രിക്ക് ക്ലാഡിങ് ചെയ്തപ്പോൾ മറുവശത്ത് സിമന്റ് ഗ്രൂവ് ചെയ്ത് വൈറ്റ് പെയിന്റ് അടിച്ചു.
പോർച്ച്, സിറ്റൗട്ട്, ഫോർമൽ ലിവിങ്, ഡൈനിങ്, കിച്ചൻ, വർക്കേരിയ, നാലു കിടപ്പുമുറികൾ, അപ്പർ ഹാൾ, ബാൽക്കണി എന്നിവയാണ് 2800 ചതുരശ്രയടിയിൽ ഉൾക്കൊള്ളിച്ചത്. താഴത്തെ നില മാത്രമേ കാര്യമായി ഇന്റീരിയർ ചെയ്തിട്ടുള്ളൂ. ബാക്കി പിന്നീട് നാട്ടിൽ സ്ഥിരതാമസം ആകുമ്പോൾ ചെയ്യാൻ മാറ്റിവച്ചു. ഭാര്യാപിതാവിന് മാർബിൾ- സാനിറ്ററി ബിസിനസാണ്. അതിനാൽ ഗുണനിലവാരമുള്ള ഫർണിഷിങ് തന്നെ താഴത്തെ നിലയിൽ ചിട്ടപ്പെടുത്തി. പ്ലൈവുഡ്+ വെനീർ ഫിനിഷിലാണ് ഫർണിച്ചർ. നിലത്ത് മാർബിൾ വിരിച്ചു.
പ്രധാനവാതിൽ തുറന്നു പ്രവേശിക്കുന്നത് ഫോർമൽ ലിവിങ്ങിലേക്കാണ്. ഡബിൾ ഹൈറ്റിലാണ് സ്വീകരണമുറി. ഇരുനിലകളെയും ബന്ധിപ്പിക്കുന്ന കണക്ഷൻ സ്പേസായും ഇവിടം വർത്തിക്കുന്നു. ഇവിടെ ഭിത്തി വേർതിരിച്ചു ടിവി യൂണിറ്റ് വച്ചിട്ടുണ്ട്.
ഇവിടെനിന്നും ഡൈനിങ് ഹാളിലേക്ക് പ്രവേശിക്കാം. ഇവിടെ ഒരുവശത്തായി ചെറിയ സ്റ്റഡി സ്പേസും വേർതിരിച്ചു. തേക്കിന്റെ പ്രൗഢിയാണ് ഗോവണിയുടെ കൈവരികളിൽ നിറയുന്നത്.
പ്ലൈവുഡ്+ പിയു പെയിന്റ് ഫിനിഷിലാണ് കിച്ചൻ. കൗണ്ടറിൽ ക്വാർട്സ് വിരിച്ചു. സമീപം വർക്കേരിയയുമുണ്ട്. വർക്കിങ് കിച്ചൻ കൂടാതെ ഒരു പാൻട്രി കിച്ചനും ഒരുക്കിയിട്ടുണ്ട്. ഇവിടെ ബ്രേക്ക്ഫാസ്റ്റ് കൗണ്ടർ വേർതിരിച്ചു. കുട്ടികൾക്ക് പഠിക്കാനും ഭക്ഷണം കഴിക്കാനുമുള്ള ഇടമായി ഈ കൗണ്ടർ മാറ്റാം.
താഴെയും മുകളിലും രണ്ടു വീതം കിടപ്പുമുറികളാണുള്ളത്. എല്ലാത്തിനും അറ്റാച്ഡ് ബാത്റൂം, വാഡ്രോബ് സൗകര്യങ്ങൾ സജ്ജമാക്കി. താഴത്തെ കിടപ്പുമുറികളിൽ ജിപ്സം ഫോൾസ് സീലിങ് ചെയ്ത് എൽഇഡി ലൈറ്റുകൾ വച്ച് കമനീയമാക്കിയിട്ടുണ്ട്.
കോവിഡ് കാലത്താണ് പണി നടന്നത്. ഒടുവിൽ ജനുവരിയിലായിരുന്നു പാലുകാച്ചൽ. ചുരുക്കത്തിൽ വീട്ടുകാരുടെ ജീവിതസാഹചര്യങ്ങൾ അനുസരിച്ച് ബുദ്ധിപരമായി ചിട്ടപ്പെടുത്തിയതാണ് ഈ വീടിന്റെ പ്ലസ്പോയിന്റ്.
Project facts
Location- Kallamala, Mahe
Plot- 10 cent
Area- 2800 SFT
Owner- Thanheer
Contractor- Nizar. A
Nizar Associates
Mob-9895441386
Designer- Mohammed Asmath
MDESIGN, Calicut
Mob- 9995888787
Y.C- Jan 2021
ചിത്രങ്ങൾ- അഖിൽ കോമാച്ചി
English Summary- Kerala House Plans; Veedu Malayalam Magazine