കൗതുകമുള്ള രൂപം, ഉള്ളിൽ സർപ്രൈസുകൾ; സൂപ്പർഹിറ്റായി ഈ വീട്

ആലുവയ്ക്കടുത്ത് കടുങ്ങല്ലൂരിലാണ് പ്രവാസിയായ അനീഷിന്റെയും കുടുംബത്തിന്റെയും ഈ പ്രൗഢഭവനം സ്ഥിതിചെയ്യുന്നത്. കേരളത്തിൽ വീടുകളുടെ കണ്ടുമടുത്ത പതിവ് വാർപ്പുമാതൃകകളിൽനിന്നും മാറിനടക്കുകയാണ് ഈ ഭവനം. എലിവേഷൻ സൂക്ഷ്മമായി ശ്രദ്ധിച്ചാൽ ത്രികോണത്തിന്റെ പല ചരിവുകൾ മിന്നിമായുന്നുണ്ട്. അതോടൊപ്പം മറ്റു ജ്യാമിതീയ രൂപങ്ങളും എലിവേഷനിൽ സമ്മേളിക്കുന്നു. മുൻവശത്തെ പോർച്ചും ത്രികോണാകൃതിയിലാണ്.

2018 ൽ ഈ പ്രദേശം പ്രളയബാധിതമായിരുന്നു. അതിനാൽ പ്ലോട്ടിന്റെ ഏഴടിയോളം മണ്ണിട്ടുയർത്തിയാണ് വീടുപണിതത്. അങ്ങനെ ലഭിച്ച ഉയരവ്യത്യാസത്തിന്റെ ആനുകൂല്യം മുതലാക്കി ഒരു ബേസ്മെന്റ് ഫ്ലോറും ഇവിടെ വിന്യസിച്ചു.

പോർച്ച്, സിറ്റൗട്ട്, ഫോയർ, ഗസ്റ്റ് ലിവിങ്, ഫാമിലി ലിവിങ്, ഡൈനിങ്, കിച്ചൻ, വർക്കേരിയ, അഞ്ചു കിടപ്പുമുറികൾ, ഹോം തിയറ്റർ, ബാൽക്കണി, ടെറസ് സ്‌പേസ് എന്നിവയാണ് 8400 ചതുരശ്രയടിയിൽ വിശാലമായി ഉൾക്കൊള്ളിച്ചിട്ടുള്ളത്

പ്രധാനവാതിൽ തുറക്കുന്നത് നീളൻ ഫോയറിലേക്കാണ്. ഇതവസാനിക്കുന്ന ഭിത്തിയിൽ ഒരു ആർട്ട് വർക്കുണ്ട്. വീട്ടിലേക്ക് കയറുന്നവർ സ്വാഗതം ചെയ്യുന്നത് ഇതാണ്.

ഫാമിലി ലിവിങ് ഡബിൾ ഹൈറ്റിലാണ്. ഇവിടെ വശത്തെ സ്ലൈഡിങ് ഗ്ലാസ് ഡോർ വഴി പുറത്തെ വുഡൻ ഡെക്ക് സ്‌പേസിലേക്കിറങ്ങാം. 

ജിഐ ഫ്രയിമിൽ വുഡൻ പ്ലാങ്കുകൾ വിരിച്ചാണ് സ്‌റ്റെയർകേസ്. സ്‌റ്റെയിൻലെസ്സ് സ്റ്റീൽ കേബിളുകൾ കൊണ്ടുള്ള വെർട്ടിക്കൽ ഹാൻഡ്‌റെയിൽ കൗതുകകരമാണ്. 

വളരെ ഒതുക്കമുള്ള ഡൈനിങ് ടേബിൾ ശ്രദ്ധേയമാണ്. വുഡ്+ ഗ്ലാസ് കോംബിനേഷനിലാണ് ടേബിൾ. ബെഞ്ച് കൺസെപ്റ്റിലുള്ള സീറ്റിങ്ങും ഭംഗിയായിട്ടുണ്ട്.

ഡോൾബി ശബ്ദമികവുള്ള ഹോം തിയേറ്ററും മുകൾനിലയിലുണ്ട്. ഇവിടെ സീറ്റുകൾക്ക് പകരം സിംഗിൾ ബെഡുകൾ കൊടുത്തത് കൗതുകകരമാണ്. 

പുതിയകാല സൗകര്യങ്ങൾ സമ്മേളിക്കുന്ന വിശാലമായ കിച്ചൻ ഒരുക്കി. ഗ്ലോസി ലാമിനേറ്റ്+ ഗ്ലാസ് ഫിനിഷിലാണ് ക്യാബിനറ്റ്. ഒരു ബ്രേക്ക്ഫാസ്റ്റ് കൗണ്ടറാണ് ഡൈനിങ്- കിച്ചൻ വേർതിരിക്കുന്നത്.  കൗണ്ടറിൽ നാനോവൈറ്റ് വിരിച്ചു.

ഒരു ലക്ഷുറി റിസോർട്ടിനെ അനുസ്മരിപ്പിക്കുന്നതാണ് കിടപ്പുമുറികൾ. ഓരോന്നും ആഡംബരത്തികവോടെ വ്യത്യസ്ത തീമിൽ ചിട്ടപ്പെടുത്തിയിരിക്കുന്നു. ഓരോ മുറിയുടെയും ഹെഡ്‌സൈഡ് വോൾ ഹൈലൈറ്റ് ചെയ്തിട്ടുണ്ട്. അറ്റാച്ഡ് ബാത്റൂം, വാഡ്രോബ്, ഡ്രസിങ് സ്‌പേസ് എന്നിവ മുറികളിൽ ഹാജരുണ്ട്.

ഒന്നാം നിലയിലെ ടെറസിൽ കുട്ടികൾക്കായി സിന്തറ്റിക് ടർഫ് വിരിച്ച ഒരു കളിസ്ഥലവും ഒരുക്കിയിട്ടുണ്ട്. കുട്ടികളുടെ കിടപ്പുമുറികളിൽനിന്നും ഇവിടേക്ക് നേരിട്ട് പ്രവേശിക്കാം.

ചുരുക്കത്തിൽ നാട്ടിലെ താരമായി മാറിയിരിക്കുകയാണ് ഈ വെറൈറ്റി വീട് .

Project facts

Location- Kadungalloor, Aluva

Plot- 28 cent

Area- 8400 Sq.ft

Owner- Anish Khalid

Architect- P.S Binoy

PSB Architects, Ernakulam

Mob- 9447144700

Y.C- 2020

English Summary- Luxury House Plan Aluva; Veedu Malayalam