ഇതാണ് ലോകത്തിലെ ഏറ്റവും ചെറിയ വീട്!
Mail This Article
വീടുകള്‍ക്ക് എത്ര കൂടുതല്‍ വലിപ്പമുണ്ടാകുമോ അത്രയും നന്നെന്നു കരുതുന്നവര്‍ ഈ ഇത്തിരികുഞ്ഞന്‍ വീടൊന്നു കണ്ടുനോക്കൂ. വെറും ഒരു ചതുരശ്രയടിയാണ് ഈ വീടിന്റെ വലിപ്പം. ഒരുപക്ഷേ ലോകത്തിലെ ഏറ്റവും ചെറിയ വീടെന്നു ഇതിനെ വിളിക്കാം. ഇഷ്ടമുള്ളപ്പോള്‍ എവിടേക്ക് വേണമെങ്കിലും ഈ വീട് എടുത്തുകൊണ്ടുപോകാം എന്നതും പ്രത്യേകതയാണ് .
ബെർലിനിലെ പ്രശസ്ത ആർക്കിടെക്ട് വാന്‍ ബോ ലീ മെന്റ്സല്‍ ആണ് ഈ കുഞ്ഞന്‍ വീടിന്റെ ശിൽപി. ഈ DIY (Do It Yourself) ടൈപ്പ് വീട് നിര്‍മ്മിച്ചിരിക്കുന്നത് തടിയിലാണ്. ഒരു ബുക്ക്‌ വായിക്കാനോ, ഒന്നിരിക്കാനോ അല്ലെങ്കില്‍ മൊബൈല്‍ ചാര്‍ജ് ചെയ്യാനോ ഒക്കെ ഈ കുഞ്ഞന്‍ വീട്ടില്‍ സൗകര്യമുണ്ട്. അല്ലാതെ കിടക്കാം എന്ന് കരുതിയാല്‍ തെറ്റി. അതിനൊന്നും ഇതിലിടമില്ല. പക്ഷേ ഒരു വീടിനുള്ളില്‍ നിങ്ങളുടെ സ്വകാര്യസ്ഥലം പോലെ ഇവിടം ഉപയോഗിക്കാം.
വെര്‍ട്ടിക്കലായോ ഹോറിസോണ്ടലായോ ഈ വീട് ഉപയോഗിക്കാം. ഒരു ചെറിയ ജനലും ലോക്ക് ചെയ്യാവുന്ന ഒരു കുഞ്ഞന്‍ വാതിലും ഈ വീട്ടിലുണ്ട്. വേണേല്‍ ഒരു കസേരയിട്ട് ഉള്ളിലിരിക്കാം.
ദീര്‍ഘകാലം ജീവിതത്തില്‍ അഭയാര്‍ഥിയായി കഴിഞ്ഞിട്ടുള്ള ആളാണ് വാന്‍ ബോ ലീ മെന്റ്സല്‍. ആ ഓർമയ്ക്കാണ് അദ്ദേഹം ഈ കുഞ്ഞന്‍ വീട് നിര്‍മ്മിച്ചിരിക്കുന്നത്. തന്റെ ഇഷ്ടത്തിനു ഇഷ്ടമുള്ള ഇടത്തേക്ക് എങ്ങനെ വേണമെങ്കിലും ഒരു നിമിഷം കൊണ്ട് എടുത്തു മാറ്റാന്‍ സാധിക്കുന്ന വീട്...ആ ഒരു സങ്കൽപത്തിൽ നിന്നാണ് ഈ ആശയം ഉടലെടുത്തത് എന്ന് വാന്‍ ബോ ലീ മെന്റ്സല്‍ പറയുന്നു.
