ഇത് മരണമാസ്; ലോറി വീടായി മാറിയാൽ ഇങ്ങനെയിരിക്കും!

ബസ്സും കാറുമൊക്കെ വീടാക്കി മാറ്റുന്നവരുടെ കഥകള്‍ നമ്മള്‍ കേട്ടിട്ടുണ്ട്. എന്നാല്‍ പഴയ ഒരു ലോറി തന്നെ അങ്ങ് വീടാക്കി മാറ്റിയാലോ? ഹംഗറിക്കാരായ പോള്‍, മാണ്ടി ദമ്പതികളാണ് ഇത്തരമൊരു വീടുണ്ടാക്കിയിരിക്കുന്നത്. 

പണ്ട് കാട്ടില്‍ നിന്നും തടി കൊണ്ട് വരാനായി ഉപയോഗിച്ചിരുന്ന വാഹനമായിരുന്നു ഈ ലോറി. ആ ചരിത്രം ഓര്‍മ്മപ്പെടുത്തുന്ന വിധമാണ് രൂപകൽപന എന്ന് വീട്ടുകാർ പറയുന്നു.സ്ഥിരമായി ഒരിടത്ത് ഉറപ്പിച്ച രീതിയിലാണ് ഈ ലോറി വീട്. 

ഹംഗറിയിലെ മോക്കാസ് വാലിയിലാണ് ഈ ലോറി വീട് പാർക്ക് ചെയ്തിരിക്കുന്നത്. ഒരു ഗസ്റ്റ് ഹൗസ് ആയാണ് കാസ്പെലീന എന്ന ഈ വീട് ഉപയോഗിക്കുന്നത്. 269  ചതുരശ്രയടിയാണ് ഇതിന്റെ വിസ്തീര്‍ണ്ണം. വീടിനു മുന്നിലായി ഒരു ചെറിയ കുളം , മനോഹരമായ ഗാര്‍ഡന്‍ എന്നിവയുമുണ്ട്. ഫര്‍ണിച്ചര്‍ എല്ലാം  കസ്റ്റമൈസ് ചെയ്തതാണ്.

തടിപ്പലക പോളിഷ് ചെയ്താണ് നിലം ഒരുക്കിയത്. വശത്തെ വാതിലിനോട് ചേർന്ന് ടാർപ്പോളിൻ വലിച്ചുകെട്ടി പോർച്ചും ഒരുക്കിയിട്ടുണ്ട്. വൈകുന്നേരം വീട്ടുകാർ കുശലം പറഞ്ഞിരിക്കുന്നത് ഇവിടെയാണ്.

Content Summary: Couple Transformed Old Lorry to House; Mobile Home