പ്രളയശേഷം കിണർ, വാട്ടർ ടാങ്ക് വൃത്തിയാക്കൽ; ഈ കാര്യങ്ങൾ ശ്രദ്ധിക്കുക

പ്രളയദുരിതം കഴിഞ്ഞു വീടും പരിസരവും തിരിച്ചു പിടിക്കാനുള്ള ദൗത്യം നമ്മൾ തുടങ്ങിക്കഴിഞ്ഞു. വീട് വൃത്തിയാക്കുന്നതിനോടൊപ്പം പ്രധാനമാണ് മലിനമായ കുടിവെള്ള സ്രോതസ്സുകൾ വൃത്തിയാക്കുന്നത്. താഴെ പറയുന്ന കാര്യങ്ങൾ ഉറപ്പായും ശ്രദ്ധിക്കുക.

∙കിണറിൽ ചെളി നിറഞ്ഞിട്ടുണ്ടെങ്കിൽ വെള്ളം പമ്പ് ചെയ്ത് ചെളി നീക്കാം. 

∙കിണറിലെ വെള്ളം അണുവിമുക്തമാക്കാൻ സൂപ്പർ ക്ലോറിനേഷൻ ഗുണം ചെയ്യും. 

∙1000 ലീറ്റർ വെള്ളത്തിന് 5 ഗ്രാം ബ്ലീച്ചിങ് പൗഡർ എന്ന അളവിൽ ലായിനി തയാർ ചെയ്യാം. ഇതു ബക്കറ്റിലാക്കി, കിണറ്റിലിറക്കി, വെള്ളവുമായി നന്നായി യോജിപ്പിക്കുക.  

∙വാട്ടർ ടാങ്കുകളിലെ വെള്ളം മുഴുവൻ കളഞ്ഞ് ശുചിയാക്കിയതിനു ശേഷം വീണ്ടും നിറയ്ക്കുക.

അണുനശീകരണം 

∙ ഇകോളി ഉൾപ്പെടെയ‌ുള്ള അണുക്കൾ വീട്ടിൽ ഉണ്ടായിരിക്കും. ബ്ലീച്ചിങ് പൗഡർ ഫലപ്രദമായ അണു നശീകരണ ഉപാധി.

∙വലിയ ടേബിൾ സ്പൂൺ ബ്ലീച്ചിങ് പൗഡർ കുറച്ചു വെള്ളത്തിൽ ലയിപ്പിച്ച ശേഷം അതിലേക്ക് ഒരു ലിറ്റർ  വെള്ളം ഒഴിക്കുക. 15 മിനിറ്റുകൾ കാത്തതിനു ശേഷം ഇതുപയോഗിച്ചു നിലം തുടച്ചാൽ അണുക്കൾ നശിക്കും.

∙പരിസരങ്ങൾ ശുചിയാക്കാൻ നീറ്റുകക്ക, കുമ്മായം എന്നിവ ഉപയോഗിക്കാം.

∙മുറികളിലെ വായുമലിനീകരണം ഒഴിവാക്കാൻ വാതിലുകളും ജനാലകളും ദീർഘനേരം തുറന്നിടാം.