ക്രിക്കറ്റ് ബാറ്റ് താഴെ വച്ചെങ്കിലും സമൂഹമാധ്യമങ്ങളിൽ രസകരമായ പോസ്റ്റുകളുമായി നിറഞ്ഞു നിൽക്കുന്നുണ്ട് വീരേന്ദർ സേവാഗ്. ഡൽഹിയിലെ നജഫ്ഗഡിലാണ് വീരേന്ദർ സേവാഗിന്റെ വീട്. വിശാലമായ മുറ്റം കടന്നാണ് വീട്ടിലേക്ക് എത്തുക. മുറ്റത്തിന് ഇരുവശവും ഉദ്യാനവും പുൽത്തകിടിയും വച്ചുപിടിപ്പിച്ചിരിക്കുന്നു.
താരത്തിന് സമ്മാനമായി ലഭിച്ച നിരവധി ആഡംബര കാറുകൾ സൂക്ഷിക്കാനായി വിശാലമായ കാർ പോർച്ചും മുറ്റത്തിന്റെ ഒരരികിലായി ഒരുക്കിയിട്ടുണ്ട്. ടെൻസൈൽ റൂഫിങ്ങാണ് പോർച്ചിനു നൽകിയത്. സിറ്റ്ഔട്ടിലായി കുട്ടികളോടൊത്തു കളിക്കാനായി ഒരു ഫൂസ് ബോൾ യൂണിറ്റും സേവാഗ് ഒരുക്കിയിട്ടുണ്ട്.
വളർത്തുനായ്ക്കളോട് സേവാഗിന് പ്രത്യേക ഇഷ്ടമാണ്. പല വിഭാഗത്തിലുള്ള നാലോളം നായകൾ ഇവിടെ സേവാഗിന്റെ അരുമകളായി വിഹരിക്കുന്നു.
ലളിതമായ അകത്തളങ്ങൾ. തീപ്പൊരി ബാറ്റ്സ്മാന് ലഭിച്ച അസംഖ്യം ട്രോഫികൾ ഷെൽഫുകൾ അലങ്കരിക്കുന്നു. ഓറഞ്ച് കുഷ്യൻ ഫിനിഷിലുള്ള സോഫയാണ് ലിവിങ് അലങ്കരിക്കുന്നത്.
സ്വീകരണമുറിയിലെ ഒരു ഭിത്തിയിൽ റെഡ് ഹൈലൈറ്റർ നിറമായി നൽകിയിരിക്കുന്നു. ഇതിനുസമീപം ടിവി യൂണിറ്റും സിറ്റിങ് സ്പേസും.
സ്വീകരണമുറിയും ഊണുമുറിയും ഒരേ ഹാളിലാണ്. എട്ടുപേർക്കിരുന്നു ഭക്ഷണം കഴിക്കാൻ പാകത്തിൽ ഊണുമേശ. രണ്ടു നിലകളിലുമായി നാലു കിടപ്പുമുറികൾ,ബാത്റൂം, ലളിതമായ അടുക്കള.
പൂജാമുറിയും വീട്ടിനുള്ളിൽ ഒരുക്കിയിട്ടുണ്ട്.
മുകൾനിലയിൽ ബാൽക്കണിയോട് ചേർന്ന് ടെറസ് ഗാർഡനും വളർത്തിയിരിക്കുന്നു. കുട്ടികളോടൊത്ത് ക്രിക്കറ്റ് കളിക്കാനും ഒത്തുകൂടലുകൾക്കും ഉപയോഗിക്കുന്ന ഉദ്യാനമാണ് സേവാഗിന്റെ പ്രിയപ്പെട്ട സ്പേസ്.
Read more on Celebrity Home