കേരള ബജറ്റ് 2020: കർഷകർക്ക് കാര്യമായ നേട്ടമില്ല

ധനമന്ത്രി തോമസ് ഐസക് അവതരിപ്പിച്ച സംസ്ഥാന ബജറ്റിൽ കാർഷികമേഖലയ്ക്ക് തലോടലുണ്ടെങ്കിലും കർഷകർക്ക് കാര്യമായി പ്രയോജനം ലഭിക്കുന്ന പദ്ധതികളില്ല. കാർഷികമേഖലയിലെ പ്രധാന പദ്ധതികൾ ചുവടെ, 

നാളികേരം

• 2020–21ൽ വാർഡ് ഒന്നിന് 75 തെങ്ങിൻ തൈകൾ വീതം വിതരണം ചെയ്യും. 
• 40 സഹകരണ സംഘങ്ങൾക്ക് 90 ശതമാനം സബ്‌സിഡിയിൽ ചകിരി മില്ലുകൾ തുടങ്ങാൻ സഹായം.
• വെളിച്ചെണ്ണയുമായി ബന്ധപ്പെട്ട സംരംഭങ്ങൾക്ക് 25% സബ്‌സിഡി. നാളികേര പ്രൊഡ്യൂസർ കമ്പനികൾക്കും ഇത് ബാധകം.
• നാളികേരത്തിന്റെ വില കർഷകർക്ക് ഓൺലൈനായി ലഭിക്കും.

പച്ചക്കറി മേഖലയ്ക്ക് 500 കോടി

• നമ്മുടെ കൃഷി നമ്മുടെ ആരോഗ്യം പദ്ധതിയായ ജീവനിക്ക് 18 കോടി രൂപ. 
• വിഎഫ്‌പിസികെയ്ക്ക് പച്ചക്കറിക്കായി ഏഴു കോടി രൂപ.
• തദ്ദേശ സ്ഥാപനങ്ങൾ, വിഎഫ്‌പിസികെ, കൃഷി വകുപ്പ് എന്നീ ഏജൻസികൾ മുഖേന പച്ചക്കറി മേഖലയിൽ 500 കോടി രൂപ നിക്ഷേപിക്കും.
• വാഴക്കുളത്തെ പൈനാപ്പിൾ സംസ്കരണ കേന്ദ്രത്തിന് മൂന്നു കോടി രൂപ.
• പഴം, പച്ചക്കറി തുടങ്ങിയവയുടെ വിതരണത്തിന് ഊബർ മാതൃകയിലുള്ള പ്ലാറ്റ്ഫോം.

നെൽകൃഷിക്ക് 118 കോടി

• 5500 രൂപ ഹെക്ടറിന് സബ്‌സിഡിയായി കൃഷി വകുപ്പ് നൽകും.
• കോൾ മേഖലയിൽ ഇരിപ്പൂ കൃഷിക്ക് 2 കോടി രൂപ. ഇതിനായി ഓപ്പറേഷൻ ഡബിൾ കോൾ പദ്ധതി.
• തരിശുരഹിത ഗ്രാമങ്ങളുടെ എണ്ണം 26ൽ നിൽനിന്ന് 2020–21ൽ 152 ആകുമെന്ന് പ്രതീക്ഷ.

അടങ്കൽ തുക 764 കോടി രൂപ

• മറ്റ് ഏജൻസികളേക്കൂടി പരിഗണിച്ചാൽ കാർഷിക മേഖലയിൽ 2000 കോടി രൂപയോളം ചെലവഴിക്കപ്പെടുമെന്ന് പ്രതീക്ഷ.
• മാർക്കറ്റിങ് സംവിധാനങ്ങൾക്ക് 52 കോടി രൂപ.
• വിള ഇൻഷുറൻസിന് 20 കോടി രൂപ.
• സോയിൽ കാർഡ് പദ്ധതിക്ക് 28 കോടി രൂപ.
• മണ്ണു–ജല സംരക്ഷണപ്രവർത്തനങ്ങൾക്ക് 94 കോടി രൂപ.

സംയോജിത റൈസ് പാർക്കും റബർ പാർക്കും

• വ്യവസായ വകുപ്പിന്റെ രണ്ട് റൈസ് പാർക്കിന് 20 കോടി. 
• റബർ പാർക്ക് ഈ വർഷം സ്ഥാപിക്കും. ഒന്നാം ഘട്ടം വെള്ളൂർ ന്യൂസ് പ്രിന്റിലെ 500 ഏക്കറിൽ.

മൃഗപരിപാലനത്തിന് 422 കോടി രൂപ

• മൃഗപരിപാലനത്തിന് 422 കോടി രൂപയാണ് അടങ്കൽ തുക. ഇതിൽ പൊതുമേഖലാ സ്ഥാപനങ്ങൾക്ക് 54 കോടി രൂപയും വെറ്ററിനറി സർവകലാശാലയ്ക്ക് 75 കോടി രൂപയും.
• വാണിജ്യാടിസ്ഥാനത്തിലുള്ള ഡയറി ഫാമുകൾക്കും മിൽക്ക് ഷെഡ് പദ്ധതിക്കുമായി 40 കോടി രൂപ.
• ഡയറി സംഘങ്ങൾക്ക് 20 കോടി രൂപയുടെ സഹായം.
• കാലിത്തീറ്റ സബ്‌സിഡിക്ക് 15 കോടി രൂപ.

സൂക്ഷ്മ കണികാ ജലസേചനത്തിന് 14 കോടി രൂപ

• 14 ജില്ലകളിലും 50 ഏക്കർ വീതം സംയോജിത സാമൂഹ്യ സൂക്ഷ്മ കണികാ ജലസേചന പദ്ധതിക്ക് 14 കോടി രൂപ.
• ജലസേചനത്തിന് ആകെ 864 കോടി രൂപ. 
• ജലസേചന പദ്ധതികളുടെ മുടങ്ങിക്കിടക്കുന്ന ബില്ലുകൾ നൽകാൻ 230 കോടി രൂപ.
• അന്തർ സംസ്ഥാന നദീജലവുമായി ബന്ധപ്പെട്ട കബനി തടം, ഭവാനി തടം, പമ്പാ തടം എന്നിവിടങ്ങളിലെ പദ്ധതികൾക്ക് 61 കോടി രൂപ.
• പുതിയ സ്കീം അട്ടപ്പാടി വാലി ഇറിഗേഷൻ.

കയർ വ്യവസായം അധുനീകരിക്കും

• കയറിന്റെ മൾച്ചിങ് ഷീറ്റ് നിർമിക്കുന്നതിനുള്ള ഫാക്ടറി കയർ ഫെഡ് തുടങ്ങും.
• കയർ കോമ്പോസിറ്റ് ഫാക്ടറിയിൽനിന്ന് മൂന്നു തരം കയർ ഉൽപന്നങ്ങൾ.
• ഡച്ച് പ്ലാന്റിൻ എന്ന ബഹുരാഷ്‌ട്ര കമ്പനി വാളയാറിൽ ചകിരിച്ചോർ സംസ്കരണ ഫാക്ടറി ആരംഭിക്കും.
• ചകിരിച്ചോർ ഇനോക്കുലം ഇന്ത്യൻ നഗരങ്ങളിൽ ലഭ്യമാക്കാൻ കയർഫെഡ്. സാങ്കേതികവിദ്യ എൻസിആർഎംഐയുടേത്.
• ജിയോ ടെക്സ്റ്റയിൽസ് സപ്ലൈക്ക് 25 സ്റ്റാർട്ടപ്പുകൾ.
• യന്ത്രവൽകൃത മേഖലയിലെ തൊഴിലാളികൾക്ക് പ്രതിദിനം 600 രൂപ ഉറപ്പുവരുത്തും.
• കയർ മേഖലയ്ക്ക് 112 കോടി രൂപ. പുറമേ 130 കോടി രൂപ എൻസിഡിസി സഹായത്തോടെ ചെലവഴിക്കും.
• കയർ ക്ലസ്റ്ററുകൾ ആരംഭിക്കാൻ 50 കോടി രൂപ കയർ ബോർഡിൽനിന്നു പ്രതീക്ഷിക്കുന്നു.
• ചെറുകിട ഉൽപാദകരുടെ കുടിശിക ഒറ്റത്തവണ തീർപ്പാക്കാനും ജീവനക്കാരുടെ ഗ്രാറ്റുവിറ്റി, പെൻഷൻ ഫണ്ട് ഡെപ്പോസിറ്റ്, വൈദ്യുതി കുടിശിക എന്നിവയ്ക്കായി 25 കോടി രൂപ.

കശുവണ്ടിക്ക് 135 കോടി രൂപ

• 1970കളിൽ ഏറ്റെടുത്ത ഫാക്ടറികളുടെ ഉടമസ്ഥർക്ക് വില നൽകാൻ 20 കോടി രൂപ.
• സ്വകാര്യ കശുവണ്ടി ഫാക്ടറികളുടെ പലിശ സബ്‌സിഡിക്ക് 20 കോടി രൂപ.
• ഗ്രാറ്റുവിറ്റി കുടിശികയ്ക്ക് 20 കോടി രൂപ.
• കാഷ്യു ബോർഡിന് 50 കോടി രൂപ.
• കേർപ്പറേഷന്റെയും കാപ്പക്സിന്റെയും നവീകരണത്തിന് 20 കോടി രൂപ.
• കശുവണ്ടി കൃഷിക്ക് 5 കോടി രൂപ.
• കശുവണ്ടി പരിപ്പിന്റെ വിപണിയിൽ കാഷ്യു ബോർഡ് ഇടപെടും.

വയനാട് പാക്കേജും ബ്രാൻഡഡ് കാപ്പിയും

• മലബാർ കാപ്പിക്കും കാർബൺ ന്യൂട്രൽ വയനാട് പദ്ധതിക്കും 500 കോടി രൂപ ചെലവ് പ്രതീക്ഷിക്കുന്നു.
• കിൻഫ്രയുടെ 100 ഏക്കറിൽ 150 കോടി രൂപയുടെ മെഗാ ഫുഡ് പാർക്ക് 2020–21ൽ നിർമാണം ആരംഭിക്കും. ബ്രാൻഡഡ് കാപ്പിയുടെയും പഴവർഗങ്ങളുടെയും പൊതു സംസ്കരണ സംവിധാനങ്ങൾ ഇവിടെയായിരിക്കും.
• കാപ്പി  പ്ലാന്റേഷൻ  മേഖലെയ  സൂക്ഷ്മ പ്രദേശങ്ങളായി  തരംതിരിക്കുക,  ഉചിതമായ പരിപാലന  രീതികൾ  ഉറപ്പുവരുത്തുക, പ്രൊഡ്യൂസർ  സംഘങ്ങൾക്കു  രൂപം  നൽകുക എന്നിവയ്ക്കായി  കൃഷി  വകുപ്പിന് 13  കോടി രൂപ.
• കാപ്പിക്ക് ഡ്രിപ് ഇറിഗേഷനായി 10 കോടി രൂപ. കൂടാതെ സൂക്ഷ്മ ജലസേചന പദ്ധതിയിൽ 4 കോടി രൂപയുമുണ്ട്.
• കാർബൺ എമിഷൻ കുറയ്ക്കാൻ 6500 ഹെക്ടറിൽ മുള വച്ചുപിടിപ്പിക്കും. 70 ലക്ഷം മരങ്ങളും നട്ടുപിടിപ്പിക്കും.
• എക്കോ ടൂറിസം വികസനത്തിന് 5 കോടി രൂപ.
• വന്യമൃഗ ശല്യം നിയന്ത്രിക്കുന്നതിന് കൂടുതൽ തുക അനുവദിക്കും.

ഇടുക്കി പാക്കേജ്

• 100 കോടി രൂപ മാറ്റിവയ്ക്കും.
• സ്പൈസസ് പാർക്കിന്റെയും അഗ്രോ പാർക്കിന്റെയും നിർമാണം ഊർജിതപ്പെടുത്തും. 
• വട്ടവടയിലെ ശീതകാല വിളകൾക്ക് പ്രത്യേക പരിഗണന.
• സമഗ്രഭൂവിനിമയ ആസൂത്രണത്തിന് 200 കോടി രൂപ.
• പ്ലാന്റേഷനുകളുടെ അഭിവൃദ്ധിക്ക് പ്രത്യേക ഡയറക്ടറേറ്റ്.
• ലൈഫ് മിഷന്റെ കീഴിൽ തോട്ടം തൊഴിലാളികളുടെ പാർപ്പിട പദ്ധതി.

കൃഷി കുടുംബശ്രീയിലൂടെയും

• കുടുംബശ്രീ 200 കേരള ചിക്കൻ ഔട്ട്‌ലെറ്റുകൾ തുറക്കും.
• ഹരിത കർമ്മ സേനകളുമായി യോജിച്ച് 1000 ഹരിത സംരംഭങ്ങൾ.
• 20,000 ഏക്കറിൽ ജൈവസംഘ കൃഷി.