സണ്ണിയുടെ വീട്ടിലുണ്ട് കാമധേനു

അടിമാലി ∙ ഒരു പതിറ്റാണ്ട് ആയി മുടങ്ങാതെ പാൽ ചുരത്തുന്ന ഇരുട്ടുകാനം കമ്പിലൈൻ തറമുട്ടം സണ്ണിയുടെ വീട്ടിലെ പശു അക്ഷരാർഥത്തിൽ കാമധേനു ആയി മാറുന്നു. 2007 ൽ ആണ് സണ്ണി ജഴ്സി ഇനത്തിൽപ്പെട്ട പശുവിനെ വാങ്ങിയത്. പിന്നീട് കുത്തി വയ്പിനെ തുടർന്ന് ചെന പിടിച്ച പശു 2009ൽ പ്രസവിച്ചു. അന്ന് തുടങ്ങിയ പാൽ കറവ ഇപ്പോഴും തുടരുകയാണെന്ന് സണ്ണി പറയുന്നു.

ഇതിനിടെ പല തവണ കുത്തി വയ്പ് എടുത്തെങ്കിലും പശുവിന് ചെന പിടിച്ചില്ല. എന്നാൽ പാൽ ചുരത്തുന്നതിൽ യാതൊരു പിശുക്കും കാണിക്കുന്നില്ലത്രെ. തുടക്കത്തിൽ 8 ലീറ്റർ പാൽ ലഭിച്ചിരുന്ന പശു ഇപ്പോഴും 4 ലീറ്റർ പാൽ നൽകുന്നുണ്ട്. വീട്ടിലെ സ്വന്തം അംഗത്തെപ്പോലെ ആണ് സണ്ണിയും ഭാര്യ ലിസിയും നന്ദിനി എന്ന ഓമനപ്പേരിൽ പശുവിനെ പരിപാലിക്കുന്നത്.