75% വളം ലാഭിക്കാം; കുറ‍ഞ്ഞ വളം, കൂടുതൽ വിളവ്; പുതിയ രണ്ടു മരച്ചീനി ഇനങ്ങൾ കർഷകരിലേക്ക്

എൻപികെ ഉപയോഗശേഷി കൂടിയ ശ്രീ അന്നം, ശ്രീമന്ന എന്നീ 2 മരച്ചീനി ഇനങ്ങൾ സിടിസിആർഐ (കേന്ദ്ര കിഴങ്ങുവിള ഗവേഷണ സ്ഥാപനം, തിരുവനന്തപുരം) പുറത്തിറക്കി. എൻപികെ മൂലകങ്ങളുടെ ആവശ്യകത ശുപാർശയുടെ 25% മാത്രം മതിയാകുമെന്നതിനാൽ ഈ ഇനങ്ങൾ കൃഷി ചെയ്യുമ്പോൾ 75% എൻപികെ ലാഭിക്കാം. 

ശ്രീ അന്നം
ഹെക്ടറിന് 30-40 ടൺ വിളവ്. മഞ്ഞനിറം. ഉയർന്ന അളവിൽ (0.270 മി.ഗ്രാം/ 100ഗ്രാം) കരോട്ടീൻ. നല്ല പാചകഗുണവും വേവും. കട്ടിന്റെ അംശം വളരെക്കുറവ്. വിള കാലാവധി 9 -10 മാസം. ഒരു പരിധിയോളം വരൾച്ചാപ്രതിരോധശേഷിയുമുണ്ട്. ഇലകുരുടിപ്പ് അഥവാ മൊസൈക് രോഗ സഹനശേഷി കൂടുതൽ. തണ്ടിൽ മുട്ടുകൾ തമ്മിലുള്ള അകലം വളരെക്കുറവ്. ഏകദേശം 1.5 മീറ്റർ ഉയരത്തി ൽ വളരും. കിഴങ്ങുകൾ 7 ദിവസം വരെ കേടാതെ സൂക്ഷിക്കാം.

Also read: ശ്രീ പവിത്രയ്ക്കു പാചകഗുണം, കുറഞ്ഞ കാലംകൊണ്ട് വിളവെടുക്കാൻ ശ്രീ ജയ, വെള്ളായണി ഹ്രസ്വ; കേരളത്തിലെ കപ്പയിനങ്ങൾ ഇവയാണ്

ശ്രീ മന്ന
ശുപാർശയുടെ 25% വളം നൽകി 40-50 ടൺ വരെ ഹെക്ടറിന് വിളവ് നേടാവുന്ന ഈ ഇനം നല്ല പാചകഗുണമുള്ള, നന്നായി വേവുന്ന രുചികരമായ ഇനമാണ്. കട്ടിന്റെ അളവ് (50-75 ppm) കുറവായതിനാൽ കിഴങ്ങിനു മധുരമുണ്ട്. 1.5 – 2 മീറ്റർ ഉയരത്തിൽ വളരുന്നു. മൊസൈക് രോഗത്തിനെതിരെ സഹനശേഷി കൂടുതൽ. 

നടീൽവസ്തുക്കൾക്ക്
മിനിസെറ്റ് സാംപിൾ നടീൽവസ്തുക്കൾ പരിമിതമായ തോതിൽ സിടിസിആർഐ സെയിൽസ് കൗണ്ടറിൽ ലഭിക്കും. 2025 ഏപ്രിൽ–മേയ്‌ മാസത്തോടെ വാണിജ്യാടിസ്ഥാനത്തിലുള്ള കൃഷിക്കാവശ്യമായ നടീൽവസ്തുക്കളും തയാറാകും.

ഫോൺ: 0471 2598551 (CTCRI, ശ്രീകാര്യം, തിരുവനന്തപുരം)