70 പശുക്കള്‍, ആടുകള്‍, റംബുട്ടാന്‍... മുളകുപ്പാടത്തെ അറിയപ്പെടാത്ത കൃഷിവിശേഷങ്ങള്‍

tomichan-mulakuppadam
SHARE

ടോമിച്ചന്‍ മുളകുപ്പാടം എന്ന സിനിമാ നിര്‍മാതാവിനെ കേരളീയര്‍ക്ക് അറിയാതിരിക്കാന്‍ വഴിയില്ല. എന്നാല്‍, ടോമിച്ചന്‍ മുളകുപ്പാടം എന്ന കര്‍ഷകനെ അധികമാര്‍ക്കും അറിയണമെന്നില്ല, അടുത്ത ചിലരൊഴിച്ച്. ബിസിനസും സിനിമയും മാത്രമല്ല തനിക്ക് കൃഷിയും ഏറെ ഇഷ്ടമാണെന്ന് പറയുകയാണ് ചങ്ങനാശേരി സ്വദേശിയായ മുളകുപ്പാടം തോമസ് ആന്റണി. അബുദബിയിലാണെങ്കിലും സിനിമാ മേഖലയിലാണെങ്കിലും ഇടവേളകളില്‍ അദ്ദേഹം ഓടിയെത്തുന്നത് ചങ്ങനാശേരിക്ക് അടുത്ത് തെങ്ങണയിലുള്ള ഫാമിലേക്കാണ്. ആറേക്കര്‍ തോട്ടത്തില്‍ പശുക്കളും റംബുട്ടാനും വാഴയുമൊക്കെയുണ്ട്.

അബുദബിയിൽ കുടുംബസമേതം താമസിക്കുന്ന താൻ രണ്ടു മാസം കൂടുമ്പോൾ നാട്ടിൽ എത്താറുണ്ട്. സിനിമാ തിരക്കുകൾ ഉള്ളപ്പോഴും നാട്ടിലുണ്ടാകും. എത്രയൊക്കെ തിരക്കുകളുണ്ടെങ്കിലും ഫാമിൽ എത്താൻ മറക്കാറില്ലെന്ന് ടോമിച്ചൻ. ഫാമിലെ പശുക്കളെ ശ്രദ്ധിച്ചും കൃഷികൾ ശ്രദ്ധിച്ചും ഏറെ നേരം ചെലവഴിക്കും.

tomichan-mulakuppadam-1

ഏകദേശം 12 വർഷമായി ടോമിച്ചന് ഫാമുണ്ട്. കുമരകത്തായിരുന്നു പശുവളർത്തൽ തുടങ്ങിയത്. പിന്നീട് എട്ടു വർഷം മുൻപ് ചങ്ങനാശേരിയിലേക്കു മാറ്റുകയായിരുന്നു. ഒട്ടകവും ഒട്ടകപ്പക്ഷിയുമെല്ലാമുണ്ടായിരുന്ന ഫാമിൽ ഇപ്പോഴുള്ളത് പശുക്കളും ആടുകളും എമുവുമാണ്. 

കൃഷ്ണഗിരിയിൽനിന്നും മറ്റും എത്തിച്ച മുന്തിയ ഇനം കറവപ്പശുക്കളാണ് ഫാമിലെ പ്രധാനികൾ. 40ൽപ്പരം കറവപ്പശുക്കളാണ് ഇവിടുള്ളത്. പുലർച്ചെ അഞ്ചുമണിയോടെ ഫാമിലെ ഒരു ദിവസം ആരംഭിക്കും. ശരാശരി 250 ലീറ്ററാണ് ഇവിടുത്തെ പാലുൽപാദനം. ക്ഷീരസംഘത്തിലേക്കാണ് പ്രധാനമായും പാൽ കൊടുക്കുക. എന്നാൽ, ഫാമിലെത്തി പാൽ വാങ്ങിക്കുന്നവരുമുണ്ട്. 

tomichan-mulakuppadam-2

ആധുനിക രീതിയിൽത്തന്നെയാണ് ഫാമിലെ രീതികളെല്ലാം. കറവയന്ത്രം, ഓട്ടോമാറ്റിക് ഡ്രിങ്കിങ് സംവിധാനം, പുല്ല് അരിഞ്ഞു നൽകാൻ ചാഫ് കട്ടറുകൾ എന്നിവയെല്ലാം ഇവിടുണ്ട്.

tomichan-mulakuppadam-3

‌ഫാമിലുണ്ടാകുന്ന കുട്ടികൾക്ക് ആദ്യ ദിവസങ്ങളിൽ ബോട്ടിലിലും പിന്നീട് ബക്കറ്റിലും പാൽ നൽകുന്നു. കറവയ്ക്കുശേഷം കുഞ്ഞുങ്ങളെ അമ്മയുടെ അടുക്കൽവിട്ട് കുടിപ്പിക്കുന്ന രീതിയും ഇവിടെയുണ്ട്. പാൽകുടി നിർത്തുമ്പോൾ കുട്ടികളെ കുമരകത്തുള്ള തോട്ടത്തിലേക്ക് മാറ്റും. തെങ്ങും വാഴയും കൃഷി ചെയ്തിരിക്കുന്ന ആ തോട്ടത്തിലാണ് കിടാരികളുടെ വളർച്ചാകാലം മുഴുവൻ. അതിനുശേഷം ചങ്ങനാശേരിയിലേക്ക് തിരികെ കൊണ്ടുവരും. 

നാടൻ പശുക്കളുടെ വലിയൊരു ശേഖരം ടോമിച്ചന്റെ ഫാമിൽ കാണാം. വെച്ചൂർ, കാസർകോടൻ കുള്ളൻ, കപില, കാങ്ക്രജ്, കൃഷ്ണപ്പശു തുടങ്ങിയ ഇനങ്ങളിലുള്ള മുപ്പതോളം പശുക്കളും അവയുടെ കുഞ്ഞുങ്ങളും ഇവിടെയുണ്ട്. വളർത്താനുള്ള താൽപര്യം നിമിത്തം ഇതുവരെ കുഞ്ഞുങ്ങളെയൊന്നും പുറത്തുകൊടുത്തിട്ടില്ലെന്നും ടോമിച്ചൻ. നാടൻ പശുവിന്റെ പാലാണ് താൻ കുടിക്കുന്നതെന്നും ടോമിച്ചൻ പറയുന്നു.

tomichan-mulakuppadam-4

രണ്ടര ഏക്കറോളം സ്ഥലത്ത് റംബുട്ടാൻ കൃഷി ചെയ്തിരിക്കുന്നു. കഴിഞ്ഞ വർഷം ആയിരം കിലോയോളം കായ ലഭിച്ചു. ഈ വർഷം കായ് പിടിച്ചു തുടങ്ങിയതേയുള്ളൂ. ഇടവിളയായി വാഴയും കൃഷി ചെയ്തിരിക്കുന്നു. ചെറിയ അളവിൽ വനിലയും നട്ടുപിടിപ്പിച്ചിട്ടുണ്ട്. തൊഴുത്ത് വൃത്തിയാക്കുന്ന വെള്ളം പ്രത്യക ടാങ്കിൽ ശേഖരിച്ച് റംബുട്ടാനും വാഴയ്ക്കും പുൽക്കൃഷിക്കും പമ്പുചെയ്തു നൽകും. പശുക്കൾക്കാവശ്യമായ പുൽക്കൃഷി ഇവിടെത്തന്നെയുണ്ട്. സിഒ3 ഇനം തീറ്റപ്പുല്ലാണ് ഇതിനായി കൃഷി ചെയ്തിരിക്കുന്നത്.

ഭാര്യ റോസക്കുട്ടിയും മക്കളായ റോമിൻ, നിഷ, റോഷൻ എന്നിവരുമടങ്ങിയതാണ് ടോമിച്ചന്റെ കുടുംബം. 

English summary: Dairy Farm of Tomichan Mulakuppadam

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN FEATURES
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
Video

എന്തുകൊണ്ട് ലിംഗമാറ്റ ശസ്ത്രക്രിയ | Manorama Explainer

MORE VIDEOS
FROM ONMANORAMA