കഴിഞ്ഞ വർഷങ്ങളിൽ പാലുൽപന്നങ്ങളുടെ ബദലുകളുടെ ജനപ്രീതിക്ക് ഗണ്യമായ വർധനയുണ്ടായിരുന്നു. ബദാം മിൽക്ക്, സോയാ മിൽക്ക്, ഓട്സ് മിൽക്ക് തുടങ്ങിയ സസ്യാധിഷ്ഠിത പാൽ ഉൽപന്നങ്ങൾ ഉപഭോക്താക്കൾക്കിടയിൽ പ്രചാരം നേടിയിട്ടുണ്ട്. ഇത് കോടിക്കണക്കിന് ഡോളർ വ്യവസായത്തിന് കാരണമായി. ഉപഭോക്തൃ മുൻഗണനകളിലെ ഈ മാറ്റം ഒരു സുപ്രധാന സംവാദത്തിലേക്കു നയിച്ചുവെങ്കിലും എന്തൊക്കെ ബദലുകൾ വന്നാലും അതിനെ എല്ലാം നേരിട്ട് ഉചിതമായ പരിഹാരം കണ്ടെത്തി മുന്നോട്ട് വരികയാണ് ക്ഷീരമേഖല.
ഡെയറി ബദലുകളുടെ ഉയർച്ചയ്ക്കുള്ള കാരണങ്ങൾ
- ഉപഭോക്താക്കളുടെ ആരോഗ്യ ബോധം:
പാലുൽപന്നങ്ങളുടെ ബദലുകളോടുള്ള താൽപര്യം പല ഘടകങ്ങളാൽ വർധിച്ചുവരുന്നു. ഒന്നാമതായി, പൂരിത കൊഴുപ്പ്, കൊളസ്ട്രോൾ എന്നിവയുടെ അളവ് കുറയുന്നതു പോലെയുള്ള ആരോഗ്യ ആനുകൂല്യങ്ങൾ കാരണം ആരോഗ്യ ബോധമുള്ള ഉപഭോക്താക്കൾ ഡെയറി രഹിത ഓപ്ഷനുകൾ തേടുന്നു. പരമ്പരാഗത പാലുൽപന്നങ്ങൾ കഴിക്കാൻ കഴിയാത്തവർക്ക് അവ സാധ്യമായ ഓപ്ഷനുകൾ വാഗ്ദാനം ചെയ്യുന്നു. ഇവയുടെ ഡിമാൻഡ് വർധിപ്പിക്കുന്നതിൽ ലാക്ടോസ് അസഹിഷ്ണുതയും പാൽ അലർജികളും ഒരു പ്രധാന പങ്ക് വഹിച്ചിട്ടുണ്ട്.
- സസ്യാധിഷ്ഠിത ഭക്ഷണക്രമങ്ങളും പരിസ്ഥിതി ആശങ്കകളും:
വീഗനിസം പോലെ സസ്യാധിഷ്ഠിത ഭക്ഷണരീതികളുടെ വർധിച്ചുവരുന്ന അവലംബവും സസ്യാഹാരത്തിന്റെ ഉയർച്ചയും പാൽ ബദലുകളുടെ ജനപ്രീതിക്കു ഗണ്യമായ സംഭാവന നൽകി. ഗ്രീൻ ഹൗസ് ഗ്യാസുകളുടെ ഉദ്‌വമനം, ഭൂവിനിയോഗം തുടങ്ങിയ മൃഗകൃഷിയുടെ പാരിസ്ഥിതിക ആഘാതത്തെക്കുറിച്ച് പല ഉപഭോക്താക്കളും ഇപ്പോൾ ബോധവാന്മാരാണ്. തൽഫലമായി, അവർ കുറഞ്ഞ പാരിസ്ഥിതിക പ്രശ്നങ്ങൾ സൃഷ്ടിക്കുന്ന ഡെയറി രഹിത ഓപ്ഷനുകളിലേക്കു തിരിയുന്നു.
Read also: ഹൈടെക് വേണോ വരുമാനം വേണോ? ഇത് ദിവസം 2700 ലീറ്റർ പാലുൽപാദനമുള്ള ഗ്രാമീണ ഡെയറി ഫാം
- നവീകരണവും ഉൽപന്ന വികസനവും:
ഭക്ഷ്യ സാങ്കേതികവിദ്യയിലെ പുരോഗതി പരമ്പരാഗത പാലുൽപന്നങ്ങളുടെ രുചിയും ഘടനയും അടുത്ത് അനുകരിക്കുന്ന പാലുൽപന്നങ്ങൾ സൃഷ്ടിക്കാൻ പ്രാപ്തമാക്കി. മുമ്പ് പരമ്പരാഗത ഡെയറി തിരഞ്ഞെടുത്തവരുൾപ്പെടെ ഇന്ന് മെച്ചപ്പെട്ട രുചിയും ഉൽപന്ന വൈവിധ്യവും മൂലം ക്ഷീര ബദലുകളോട് ആകൃഷിക്കപ്പെട്ടുവരുന്നതായി കാണപ്പെടുന്നു.
ക്ഷീര മേഖലയുടെ കരുത്ത്
എത്രയൊക്കെ തന്നെ ബദലുകൾ വന്നാലും മറ്റു പദാർഥങ്ങൾ ഒരിക്കലും പാലിന് 100% പകരമായി മാറുകയോ അതിന്റെ ഗുണങ്ങൾ മുഴുവനായി ഉപഭോക്താക്കൾക്ക് നൽകുകയോ ചെയ്യുന്നില്ല. പലപ്പോഴും ക്ഷീരമേഖലയെ പറ്റിയുള്ള പല തെറ്റിദ്ധാരണകളാണ് ആളുകളെ മറ്റു മേഖലകളിലേക്കു തിരിക്കുന്നത്. പാൽ, തൈര്, ചീസ് തുടങ്ങിയ പാലുൽപന്നങ്ങൾ കാത്സ്യം, വൈറ്റമിൻ ഡി, പ്രോട്ടീൻ എന്നിവയുടെ പ്രകൃതിദത്ത ഉറവിടങ്ങളാണ്. വിറ്റാമിൻ ബി 12, ഫോസ്ഫറസ് തുടങ്ങിയ അവശ്യ പോഷകങ്ങളും അവ നൽകുന്നു.
Read also: പ്രവാസം തന്ന പണവും 35 പശുക്കളും; മാസം 2.4 ലക്ഷത്തിന്റെ ലാഭം
ലാക്ടോസ് ഇന്റോളറൻസ് ഉള്ള ആളുകൾക്കായി, സാധാരണ പാലിൽ ലാക്ടേസ് ചേർത്ത് ലാക്ടോസിനെ വിഘടിപ്പിച്ച് ദഹിപ്പിക്കാൻ എളുപ്പമുള്ള ലളിതമായ പഞ്ചസാരയാക്കിയ ലാക്ടോസ് രഹിത പാൽ വിപണിയിൽ ലഭ്യമാണ്. അൽപം മധുരമുള്ളതാണെങ്കിലും, ലാക്ടോസ് അസഹിഷ്ണുതയുള്ള ആളുകൾക്ക് ഇത് നല്ലൊരു ബദലായിരിക്കും. അതുപോലെ തന്നെ കൊളസ്ട്രോൾ മുതലായ അസുഖങ്ങൾ നേരിടുന്നവർക്കായി കൊഴുപ്പിന്റെ അളവ് കുറഞ്ഞ പാലും ലഭ്യമാണ്.
ക്ഷീര മേഖല പ്രധിനിധീകരിക്കുന്ന മറ്റൊരു പ്രധാന പ്രശ്നമാണ് മീഥെയ്ൻ പോലുള്ള ഗ്രീൻഹൗസ് ഗ്യാസുകളുടെ പുറന്തള്ളൽ. എന്നാൽ ഇതിന്റെ പാരിസ്ഥിതിക ദോഷങ്ങൾ കുറയ്ക്കാൻ ധാരാളം വഴികൾ ഇന്ന് ഉപയോഗിച്ചുവരുന്നുണ്ട്. മെച്ചപ്പെട്ട ഫീഡ് മാനേജ്മെന്റ്, മീഥെയ്ൻ ക്യാപ്ച്ചർ, ഫലപ്രദമായ വളത്തിന്റെ ഉപയോഗം, ജനിതക മാറ്റങ്ങൾ, സുസ്ഥിര കൃഷി രീതികൾ തുടങ്ങിയവ വഴി പ്രകൃതിക്കു ദോഷം വരാത്ത രീതിയിലുള്ള ക്ഷീര മേഖലയെ ഇവ ഉറപ്പ് വരുത്തുന്നു.
ഡെയറി ബദലുകളുടെ ഉൽപാദനം വളരെ ചെലവേറിയതാണ്. ഡെയറി ബദലുകളുടെ അസംസ്കൃത വസ്തുക്കൾ, ഉൽപാദന സംസ്കരണ രീതികൾ, ബ്രാൻഡിങ് മുതലായവയുടെ മുഴുവൻ ചെലവ് കണക്കിലെടുത്താൽ അത് പാലും അതിന്റെ ഉൽപന്നങ്ങളുടെയും ഉഷപാദനത്തേക്കാൾ വളരെ കൂടുതലാണ്. അതിനാൽ തന്നെ അവയുടെ വില തമ്മിലും വളരെ വലിയ വ്യത്യാസങ്ങൾ കാണാൻ സാധിക്കുന്നു.
Read also: മാസം മുക്കാൽ ലക്ഷം: ഇതു ഫാം പറുദീസ, പിന്നെന്തിന് ഗൾഫിൽ കഷ്ടപ്പെടണം
ആത്യന്തികമായി, ആരോഗ്യ ആവശ്യകതകൾ, സാംസ്കാരിക പശ്ചാത്തലങ്ങൾ, ധാർമിക പരിഗണനകൾ എന്നിവ കണക്കിലെടുത്ത് ഡെയറി , ഡെയറി ഇതരമാർഗങ്ങൾ തമ്മിലുള്ള തിരഞ്ഞെടുപ്പ് വ്യക്തിഗതമായിരിക്കണം. പാലുൽപന്നങ്ങളോട് സഹിഷ്ണുത പുലർത്തുന്ന വ്യക്തികൾക്ക്, അത് സമീകൃതാഹാരത്തിൽ ഉൾപ്പെടുത്തുന്നത് മറ്റെന്തിനേക്കാളും ഗുണം ചെയ്യും. അവശ്യ പോഷകങ്ങൾ ലഭിക്കാൻ മറ്റു ഭക്ഷ്യവസ്തുക്കളോടൊപ്പം തന്നെ പാലും പാലുൽപന്നങ്ങളും ഉൾപ്പെടുന്ന ഭക്ഷണക്രമം വളരെ അനിവാര്യമാണ്.
കേരള വെറ്ററിനറി ആൻഡ് അനിമൽ സയൻസസ് യൂണിവേഴ്സിറ്റിയുടെ ഇടുക്കി കോളജ് ഓഫ് ഡെയറി സയൻസ് ആൻഡ് ടെക്നോളജിയിൽ ബിടെക് ഡെയറി ടെക്നോളജി വിദ്യാർഥിയാണ് ലേഖിക
English summary: Is it better to drink cow's milk or a dairy-free alternative
