ഇഞ്ചിയിൽനിന്ന് ഇത്രയേറെ ഉൽപന്നങ്ങളോ! കറി മുതൽ മിഠായി വരെ അമ്പരിപ്പിക്കും രുചികൾ!

കേരളത്തിൽ ഇഞ്ചി വിളവെടുക്കുന്ന സമയം ജനുവരി-ഫെബ്രുവരി മാസങ്ങൾ. വിളവെടുപ്പുസീസണിൽ ഇഞ്ചിക്കു വില തീരെ കുറവായിരിക്കും. വിളവെടുപ്പിനുശേഷം 2-3 മാസമേ പച്ച ഇഞ്ചിയായി ഇത് സംഭരിക്കാൻ സാധിക്കുകയുള്ളൂ. മഴക്കാലത്തിന്റഎ ആരംഭത്തോടെ ഇഞ്ചി മുളപൊട്ടുകയും അതിന്റെ സൂക്ഷിപ്പു ഗുണം കുറയുകയും ചെയ്യും. അതിനാൽ വിളവെടുപ്പിനുശേഷമുള്ള 2-3 മാസങ്ങളിൽ ഇഞ്ചിയിൽനിന്ന് വിവിധതരം ഉൽപന്നങ്ങൾ തയാറാക്കിയാൽ ഇഞ്ചിയുടെ വില തീരെ താഴ്ന്ന പോകാതെ നിലനിർത്താനാകും. 

വൻ മുതൽമുടക്കിൽ, തോട്ടമടിസ്‌ഥാനത്തിൽ ഇഞ്ചി കൃഷി ചെയ്യുന്നവർ മൂല്യവർധിത ഉൽപന്നനിർമാണത്തിൽ കൂടി ശ്രദ്ധിച്ചാൽ സംരംഭം കുറച്ചുകൂടി ലാഭകരമാക്കാം. പച്ച ഇഞ്ചികൊണ്ടു തയാറാക്കാനാവുന്ന ഏതാനും ഉൽപന്നങ്ങൾ പരിചയപ്പെടാം. 

ഇഞ്ചി ചേർന്ന കറികൾ
വടക്കൻ കേരളത്തിൽ പ്രചാരമുള്ള പുളിയിഞ്ചി സൂക്ഷിപ്പുഗുണമുള്ള ഒരുൽപന്നമാണ്. മിതമായ അളവിൽ രാസ സംരക്ഷകങ്ങൾ ചേർത്ത് ദീർഘകാലം സൂക്ഷിക്കാവുന്ന തരത്തിൽ പായ്ക്ക് ചെയ്ത് വിപണിയിലെത്തിക്കാനാകും. കേരളത്തിൽ പ്രചാരത്തിലുള്ളത് ഇഞ്ചിക്കറിയാണ്. ഇതിനുള്ള ഇഞ്ചി വറുത്തെടുത്തു മറ്റു ചേരുവകളും ചേർത്ത് ഇൻസ്റ്റന്റ് ഇഞ്ചിക്കറി മിക്സ് തയാറാക്കി പായ്ക്ക് ചെയ്യാം. ഇത് വെള്ളം ചേർത്ത് തിളപ്പിച്ച് ഇഞ്ചിക്കറി തയാറാക്കാം. റെഡി-ടു-കുക്ക് രൂപത്തിലുള്ള ഈ കറിമിക്സിനു ദീർഘകാല സൂക്ഷിപ്പുഗുണവുമുണ്ട്.

ഇഞ്ചി അച്ചാറിനും വിപണിയിൽ ആവശ്യക്കാരുണ്ട്. പുളിയിഞ്ചിക്കും ഇഞ്ചിക്കറിക്കുമൊക്കെ ആവശ്യക്കാർ ഏറെയുള്ളത് ഓണക്കാലത്താണ്. ആ സമയത്ത് ഇഞ്ചിയുടെ വില വളരെ കൂടുതലായിരിക്കും. അപ്പോൾ ഉൽപന്നം ഉണ്ടാക്കി വിപണിയിലെത്തിക്കുന്നത് ലാഭകരമല്ല. അതിനാൽ വില കുറഞ്ഞുനിൽക്കുന്ന വിള വെടുപ്പുകാലത്ത് ഇഞ്ചി വാങ്ങി നുറുക്കി എയർ ഡ്രയറിൽ ഉണക്കി സൂക്ഷിക്കാനായാൽ ആവശ്യാനുസരണം ഉൽപന്നം തയാറാക്കാനാകും. മികച്ച വിലയിൽ വിറ്റഴിക്കാനുമാകും. ചുക്കിനെക്കാൾ വില ലഭിക്കുന്ന ഉൽപന്നങ്ങളാണ് ഇഞ്ചി പ്രധാന ചേരുവയായ മേൽപറഞ്ഞ ഉൽപന്നങ്ങൾ. 

ഇഞ്ചി ചേർന്ന പാനീയങ്ങൾ
പാനീയവിഭവങ്ങൾക്ക് കൂടുതൽ ആവശ്യക്കാരുള്ള വേനൽക്കാലത്ത് ഇഞ്ചിസത്തു ചേരുന്ന പാനീയങ്ങൾ വിപണിയിലെത്തിച്ചാൽ മികച്ച വില ഉറപ്പാക്കാം. ഇഞ്ചി-ചെറുനാരങ്ങാ സിറപ്പ്, ഇഞ്ചി-നറുനീണ്ടി സിറപ്പ്, ഇഞ്ചി-തേങ്ങാവെള്ളം സിറപ്പ്, ഇഞ്ചി–വാഴപ്പിണ്ടി സിറപ്പ്, ഇഞ്ചി-നെല്ലിക്ക-കാന്താരി സിറപ്പ് എന്നിവ സ്വാദിഷ്ഠ ഉൽപന്നങ്ങളാണ്. വിവിധ അനുപാതത്തിൽ വ്യത്യസ്‌ത പഴവർഗങ്ങൾ ചേർത്ത് ഇഞ്ചി സിറപ്പുകൾ തയാറാക്കാം. ദഹനക്കേടും ക്ഷീണവുമകറ്റുന്ന ഇത്തരം പാനിയങ്ങൾ ആരോഗ്യദായകങ്ങളാണ്. ഇത് തയാറാക്കാനുള്ള ഇഞ്ചിസത്ത് പച്ച ഇഞ്ചിയിൽനിന്നു വേർതിരിച്ച് സംരക്ഷകങ്ങൾ ചേർത്ത് സൂക്ഷിച്ചുവയ്ക്കാം. കൂടിയ അളവിൽ പഞ്ചസാരയും സിട്രിക് അമ്ലവും ചേർക്കുന്നതിനാൽ ഈ ശീതളപാനീയങ്ങൾക്ക് സൂക്ഷിപ്പുഗുണമേറും. വിളവെടുപ്പുകാലത്തുതന്നെ വേനലുമെത്തുന്നതിനാൽ ഇഞ്ചി ചേർത്ത സിറപ്പുകൾക്കും പാനിയങ്ങൾക്കും മികച്ച വിപണി ഉറപ്പ് സത്ത് എടുത്തതിനുശേഷം ബാക്കി വരുന്ന പിശട് ഉണക്കി സൂക്ഷിച്ചാൽ കറികളിലും മറ്റും ചേർക്കാം. 

ജിഞ്ചർ പേസ്റ്റ്
മാംസാഹാരം തയാറാക്കാൻ അത്യാവശ്യമായ ചേരുവയാണ് ഇഞ്ചി പേസ്‌റ്റ്‌, ഇഞ്ചി കുഴമ്പു രൂപത്തിൽ അരച്ചെടുത്ത് മതിയായ അളവിൽ ഉപ്പ്, സിട്രിക് ആസിഡ്, സൂക്ഷിപ്പു ഗുണം വർധിപ്പിക്കാൻ സഹായിക്കുന്ന പൊട്ടാസ്യം മെറ്റാ ബൈ സൾഫൈറ്റ് എന്നിവ ചേർത്ത് ദീർഘകാലം ഇതു സൂക്ഷിച്ചുവയ്ക്കാനാകും. എല്ലാ സീസണിലും ഇതിന് വിപണിയിൽ ആവശ്യക്കാരുണ്ട്. ജിഞ്ചർ പേസ്റ്റ് തയാറാക്കുന്നതിനു സ്റ്റെയിൻലെസ് സ്റ്റീൽ നിർമിത പൾവറൈസർ, ഇഞ്ചിയുടെ തൊലി കളഞ്ഞ് കഴുകിയെടുക്കുന്നതിനു പീലർ -കം- വാഷിങ് മെഷീൻ എന്നിവർ ണ്ടെങ്കിൽ ഈ സംരംഭം നടത്താം. 

ഇഞ്ചി കാൻഡി/പ്രിസർവ്
പഞ്ചസാരപ്പാനിയിൽ വിളയിച്ചെടുക്കുന്ന ഇഞ്ചി കാൻഡി / പ്രിസർവ് എന്നിവ നേരിട്ട് ഉപയോഗിക്കുന്നതിനെക്കാൾ കേക്ക്, മിഠായി, മാർമലേഡ് എന്നിവയുടെ നിർമാണത്തിനാണ് വ്യാപകമായി ഉപയോഗിക്കുന്നത്. പൂർണമായും മുപ്പെത്തുന്നതിനു മുൻപ് നാരു കുറവുള്ള പരുവത്തിലുള്ള ഇഞ്ചി വിളവെടുത്താണ് ഇതു തയാറാക്കുന്നത്. ക്രിസ്‌മസ് -പുതുവത്സരത്തോട് അനുബന്ധിച്ച് കേക്ക് വിപണി സജീവമാകുന്നതിനു മുൻപ് ഒക്ടോബർ - നവംബർ മാസങ്ങളിൽ ഇഞ്ചി വിളവെടുത്ത് ഈ ഉൽപന്നം തയാറാക്കണം. നന്നായി വേവിച്ച് മൃദുവാക്കിയ ഇഞ്ചിക്കഷണങ്ങൾ പഞ്ചസാര സിറപ്പിൽ ഇട്ട് അതിന്റെ ഗാഢത 68-70 C brix മധുരത്തിന്റെ യൂണിറ്റ്) വരെയാക്കി ഉണക്കിയാണ് ഇതു തയാറാക്കുന്നത്. സിറപ്പിൽതന്നെ സൂക്ഷിക്കുന്നതിനെ പ്രിസർവ് എന്നും സിറപ്പിൽനിന്നു മാറ്റി മിതമായ ചൂടിൽ ഉണക്കിയെടുക്കു ന്നതിനെ കാൻഡി എന്നും പറയും. ഡ്രൈ ഫ്രൂട്ട് എന്ന നിലയിൽ വളരെയേറെ ആവശ്യക്കാരുള്ള ഉൽപന്നമാണിത്. പച്ച ഇഞ്ചി നേർമയായി ചീകിയെടുത്ത്, പഞ്ചസാരപ്പാനിയിൽ വിളയിച്ചും ഇത് തയാറാക്കാം. 

അരിഞ്ഞുണക്കിയ ഇഞ്ചി (ഫ്ലേക്കഡ് ജിഞ്ചർ)
അച്ചാർ, കറിപ്പൊടി, ചട്‌നിപ്പൊടി എന്നിവയിലെ പ്രധാന ചേരുവയാണ് ഇഞ്ചി. ചുക്ക് ഈ ആവശ്യങ്ങൾക്ക് യോജ്യമല്ല. അതിനാൽ ഇഞ്ചി വൃത്തിയാക്കി അരിഞ്ഞുണക്കി അച്ചാറിനും കറിപ്പൊടികൾക്കും പറ്റിയ തരത്തിൽ സൂക്ഷിക്കാനായാൽ മികച്ച വില ഉറപ്പാക്കാം.