നായ്ക്കുട്ടിക്ക് വിശപ്പില്ല; പരിശോധിച്ചപ്പോൾ കണ്ടത് ഞെട്ടിക്കുന്നത്...

മുന്നിൽ കിട്ടുന്നതെന്തും കടിക്കാനുള്ള പ്രവണത ചെറു പ്രായത്തിൽ നായ്ക്കൾക്കുണ്ട്. അതൊരു ദുശീലമായി മാറാതിരിക്കാൻ ശ്രദ്ധിക്കേണ്ടത് ഉടമയുടെ ഉത്തരവാദിത്തമാണ്. കൃത്യമായ ശ്രദ്ധയും ശിക്ഷണവും പരിശലനവും ഉണ്ടെങ്കിൽ നായ്ക്കളുടെ ഇത്തരം ദുശീലങ്ങൾ മാറ്റാവുന്നതേയുള്ളൂ. 

ഏഴു മാസം പ്രായമുള്ള ഗോൾഡൻ റിട്രീവർ ഇനത്തിൽപ്പെട്ട നായ്ക്കുട്ടിക്ക് ഛർദിയും വിശപ്പില്ലായ്മയും ആയിട്ടാണ് ഉടമ വെറ്ററിനറി ഡോക്ടർ ദമ്പതികളായ ഡോ. കിഷോർ കുമാറിനെയും ഡോ. സോണിക സതീഷിനെയും സമീപിക്കുന്നത്. ഭക്ഷ്യയോഗ്യമല്ലാത്ത വസ്തുക്കൾ വായിലെടുക്കുക, ചവച്ചു പൊട്ടിക്കുക എന്നതൊക്കെ ഈ നായ്ക്കുട്ടിയുടെ ശീലമായിരുന്നു. വിശദമായ പരിശോധനയിലൂടെ കുടലിൽ ഒരു പ്ലാസ്റ്റിക് കുപ്പിയുടെ അടപ്പ് കുരുങ്ങിയിരിക്കുന്നതായി കണ്ടെത്തി. തുടർന്ന് ശസ്ത്രക്രിയ നടത്തി അടപ്പ് നീക്കം ചെയ്യുകയും ചെയ്തു. റിട്രീവർ ഇനത്തിൽപ്പെട്ട നായ്ക്കളിൽ പൊതുവെ ഇത്തരം പ്രവണത കൂടുതലാണ്. അതുകൊണ്ടുതന്നെ ശ്രദ്ധ അനിവാര്യമാണ്. ഭക്ഷ്യയോഗ്യമല്ലാത്ത വസ്തുക്കൾ എടുക്കുന്നതും കഴിക്കുന്നതും ഒഴിവാക്കണം.

English summary: A bottle cap was removed from the intestine of the dog