പതിനെട്ട് മ്യൂസിയങ്ങൾ, ഇരുപത് ഉദ്യാനങ്ങള്‍, റസ്റ്ററന്റുകൾ; ബാൽബോവ പാർക്ക് എന്ന അദ്ഭുതലോകം

പതിനെട്ടു മ്യൂസിയങ്ങളുള്ള പാർക്കോ..? കലിഫോർണിയയിലെ സാൻ ഡീഗോ എന്ന നഗരത്തിൽ സ്ഥിതി ചെയ്യുന്ന ബാൽബോവ പാർക്കാണ് ഈ അദ്ഭുതലോകം. 1,200 ഏക്കറിലധികം വിസ്തൃതിയുള്ള ഈ പാർക്കിൽ പതിനെട്ട് മ്യൂസിയങ്ങൾ മാത്രമല്ല, ഇരുപത് ഉദ്യാനങ്ങള്‍, റസ്റ്ററന്റുകൾ, പെർഫോമിംഗ് ആർട്സ് വേദികൾ തുടങ്ങി നിരവധി ആകർഷണ ഘടകങ്ങളുണ്ട്.

യുണൈറ്റഡ് സ്റ്റേറ്റ്സിലെ ഏറ്റവും പഴക്കം ചെന്ന പാർക്കുകളിൽ ഒന്നാണ് ബാൽബോവ പാർക്ക്. കാടുപിടിച്ചു കിടന്ന ഒരു സ്ഥലത്തെ പാർക്കാക്കി മാറ്റാം എന്ന തോന്നലിൽ നിന്നാണ് ബാൽബോവ പാർക്കിന്റെ ചരിത്രം ആരംഭിക്കുന്നത്. സാൻ ഡീഗോ നഗരത്തിലെ പാർക്കുകളുടെയും വിനോദത്തിന്റെയും വകുപ്പ് പരിപാലിക്കുന്ന ഈ പാർക്ക്‌ ലോകമെമ്പാടുമുള്ള ദശലക്ഷക്കണക്കിന് സന്ദർശകരെ ആകർഷിക്കുന്ന വിശാലവും അമൂല്യവുമായ ഒരു സാംസ്കാരിക കേന്ദ്രമായി വളർന്നു. 

ബാൽബോവ പാർക്കിന്റെ ഏറ്റവും മനോഹരമായ സവിശേഷതകളിലൊന്ന് അതിന്റെ ഉദ്യാനങ്ങളാണ്. പാർക്കിലുടനീളം 20 വ്യത്യസ്ത ഉദ്യാനങ്ങളുണ്ട്. ഓരോന്നിനും അതിന്റേതായ സവിശേഷ സൗന്ദര്യവുമുണ്ട്. ഓർക്കിഡുകൾ, ലില്ലികൾ എന്നിവയുൾപ്പെടെ 2,100 ലധികം സസ്യങ്ങളുള്ള ബൊട്ടാണിക്കൽ ഗാർഡനും ഇതിന്റെ ഭാഗമാണ്. ജാപ്പനീസ് ഫ്രണ്ട്ഷിപ്പ് ഗാർഡൻ, കാലിഫോർണിയ നേറ്റീവ് പ്ലാന്റ് ഗാർഡൻ, ഇനെസ് ഗ്രാന്റ് പാർക്കർ മെമ്മോറിയൽ റോസ് ഗാർഡൻ എന്നിവയാണ് മറ്റു ശ്രദ്ധേയമായ ഉദ്യാനങ്ങൾ,

ചരിത്രപ്രധാനമായ വിമാനങ്ങളുടെയും ബഹിരാകാശ പേടകങ്ങളുടെയും ശേഖരമുള്ള സാൻ ഡീഗോ എയർ ആൻഡ് സ്പേസ് മ്യൂസിയം, സൂപ്പർഹീറോകൾ, സയൻസ് ഫിക്ഷൻ ഫ്രാഞ്ചൈസികൾ, കോമിക്-ബുക്ക് എന്നിവയുമായി ബന്ധപ്പെട്ട പ്രദർശനങ്ങളുള്ള കോമിക്-കോൺ മ്യൂസിയം, 24,000 ചിത്രങ്ങളുള്ള മ്യൂസിയം ഓഫ് ഫൊട്ടോഗ്രാഫിക് ആർട്സ്, മെക്സിക്കൻ – ലാറ്റിനോ കലയെയും സംസ്കാരത്തെയും കുറിച്ചുള്ള സെൻട്രോ കൾച്ചറൽ ഡി ലാ റാസ എന്നിവയാണ് മ്യൂസിയങ്ങളിൽ പ്രധാനം. 

1935ൽ തുറന്ന ഗ്ലോബ് തിയേറ്റർ ആണ് പാർക്കിന്റെ മറ്റൊരു പ്രത്യേകത. വില്യം ഷേക്സ്പിയറിന്റെ നാടകങ്ങളും അദ്ദേഹം ജീവിച്ചിരുന്ന കാലത്ത് അവതരിപ്പിക്കപ്പെട്ടിരുന്ന ലണ്ടനിലുള്ള ഗ്ലോബ് തിയേറ്ററിന്റെ ഒരു പകർപ്പാണത്. വൈവിധ്യമാർന്ന ലോകോത്തര പരിപാടികള്‍ നടക്കുന്ന ബാൽബോവ പാർക്കിൽ ഓരോ വർഷവും ആയിരക്കണക്കിന് സന്ദർശകരാണ് എത്തുന്നത്.

ബാൽബോവ പാർക്ക് ഗ്രൗണ്ടുകൾ വർഷത്തിൽ 365 ദിവസവും 24 മണിക്കൂറും തുറന്നിരിക്കും. ജൂൺ 1 മുതൽ ഒക്ടോബർ 31 വരെ വേനൽക്കാലത്ത് രാവിലെ 9 മുതൽ രാത്രി 8 വരെയും, നവംബർ 1 മുതൽ മെയ് 31 വരെ ശീതകാലത്ത് രാവിലെ 9 മുതൽ വൈകിട്ട് 6 വരെയുമാണ് പൊതുവെ സന്ദർശകർ വരുന്ന സമയം.