ഇടപ്പാലം - സിന്ധു കോറാട്ട് എഴുതിയ കവിത

എടപ്പാളങ്ങാടിയിൽ

പുതിയ പാലമൊന്ന് പൊങ്ങി 

നോട്ട് പുസ്തകം പോലെ

നെഞ്ചിൽ ചേർത്തു പിടിച്ചിരുന്ന

തൃശ്ശൂർ റോഡും പൊന്നാനിയും 

കുറ്റിപ്പുറവും പട്ടാമ്പിയും

വേർപെട്ടുപോയി

ചില്ലകളാൽ കൈകോർത്തു 

നിന്ന മരങ്ങൾ 

ഇരുകരകളിലുമായി 

അപ്പുറമിപ്പുറമായി 

ആതിരയും ആവണിയും

പൊന്നോണവും

പൂരാടവാണിഭവും

ഉത്രാടപ്പാച്ചിലുമിനി

ഇരുപുറമായി പകുത്തിടും കാലം

അങ്ങുമിങ്ങുമിരുന്ന്

കൈവീശി സൗഹൃദം

കാട്ടിയിരുന്ന

മുറുക്കാൻ കടകളുടെ 

പുഞ്ചിരി മറക്കും

മാസ്ക്കായി പാലം

മുല്ലപ്പൂവിനു 

വിലപേശി നിൽക്കും 

തമിഴത്തിയുടെ മനസ്സ്

പാലമേറി പായും ബസ്സിന്

പിന്നാലെ പോകും 

ആരു വാങ്ങുമിനിയിതെന്ന്

വൈകുന്നേര വെയിലിനൊപ്പം വാടിക്കരിയും

റോഡിനിരുവശവും

നിന്നുള്ള കമിതാക്കളുടെ കണ്‍കോർക്കലുകൾ 

ഉടഞ്ഞു തകരുമിനിയി

പാലത്തിന്റെ കാൽവരിയിൽ 

ആശുപത്രിരോദനങ്ങൾ

പാലം കയറിയിറങ്ങി

പിടിവിട്ട് താഴെ വീഴും

കൈ താങ്ങായി നിന്നിരുന്ന

അന്തിമേഘങ്ങൾ

കുതറി മാറും 

തെരുവ് രണ്ടു ലോകമായി തീരും

പലനിറത്തിലുള്ള ആവലാതികൾ 

തോളത്തിട്ട് മനുഷ്യർ

പാലത്തിനു ചുവട്ടിലൂടെ 

അങ്ങോട്ടുമിങ്ങോട്ടും പോകും

ചെരുപ്പുകൾ തുണികൾ 

മരുന്ന് കടകൾ

കാൽച്ചുവട്ടിലാക്കിയ വമ്പൻ പാലം

ആരുണ്ട് എന്നെ വെല്ലാനെന്ന് 

തലേക്കെട്ട് കെട്ടി

മീശ പിരിച്ചു നടുവിൽ 

നെഞ്ച് വിരിച്ചു നിൽക്കും

മഴ വന്നു മടിച്ചു നിൽക്കുമിനിയതിന്റെ 

അതിരുകളിൽ

പരിചിതമായ ഇടവഴികൾ തേടിയലയും കാറ്റതിൽ 

തട്ടിയും തടഞ്ഞു നിൽക്കും

പിഞ്ഞിക്കീറി പോയൊരീയാകാശത്തെ ആര്

തുന്നിചേർക്കുമെന്ന്

കിളികൾ പിറുപിറുക്കും

എവിടെ വിതറണമീ പൊൻകതിരുകളെന്നു 

പിണങ്ങി നിൽക്കുന്നുണ്ടാവുമൊരു സൂര്യൻ...

പാലത്തിൻ കഥയറിയാതെ 

പാതിരക്ക് തിരിച്ചെത്തിയൊരു

പ്രവാസി പല മുഖങ്ങളിൽ 

നിന്നൊരു പ്രിയ മുഖമെന്നപോലെ

ജനിച്ചു വളർന്ന ഗ്രാമത്തെ തിരയും...

അടുത്തിടെ പണികഴിപ്പിച്ച എടപ്പാൾ ചുങ്കത്തെ പാലത്തെ കുറിച്ചുള്ള കവിത. കവി പി. പി. രാമചന്ദ്രന്റെ ഫേസ് ബുക്കു പോസ്റ്റിലെ പാലത്തിന്റെ വീഡിയോ പ്രചോദനം. 

Content Summary: Edappalam, Malayalam poem written by Sindhu Korattu