റോയൽ മാസെക്കർ

യഥാർഥ സംഭവത്തെ ആസ്പദമാക്കി എഴുതിയ ‘ഹിസ്റ്റോറിക്കൽ ക്രൈം ഫിക്ഷണൽ സ്റ്റോറി’ ആണ് ഈ നോവൽ. ഈ നൂറ്റാണ്ടിന്റെ തുടക്കത്തിലും ഭരണാധികാരം നിലനിർത്തിയിരുന്ന ഏക ഹിന്ദുരാജ കുടുംബമായിരുന്ന നേപ്പാളിലെ ഷാ രാജവംശത്തെ ഒന്നടങ്കം ഇല്ലാതാക്കിയ കൂട്ടക്കൊലപാതകം തെക്ക് കിഴക്കൻ ഏഷ്യയെ മാത്രമല്ല ലോകത്തെ മുഴുവൻ ഞെട്ടിച്ച സംഭവമാണ്. ഒരു പ്രണയത്തിന്റെ ബാക്കിപത്രമെന്ന് പിന്നീട് വിശേഷിപ്പിക്കപ്പെട്ട ആ ദുരന്തം നേപ്പാളിന്റെ സവിശേഷമായ രാഷ്ട്രീയ സാമൂഹിക ഭൂമികയിൽ നിന്നുകൊണ്ട് ഭാവനാത്മകമായി ചിത്രീകരിക്കുന്ന ഈ നോവൽ നോക്കിക്കാണുന്നത് നേപ്പാളിന്റെ ചരിത്ര, സാമൂഹിക, രാഷ്ട്രീയ യാഥാർഥ്യങ്ങളെയാണ്. ഇന്ത്യയും നേപ്പാളും തമ്മിൽ നൂറ്റാണ്ടുകളായി നിലനിൽക്കുന്ന അസ്വാരസ്യങ്ങൾ നിറഞ്ഞ ബന്ധങ്ങളും നേപ്പാളിലെ മാവോയിസത്തിന്റെ വളർച്ച താഴ്ചകളും കലാപങ്ങളും വിപ്ലവവുമെല്ലാം ഈ പുസ്തകം ചർച്ച ചെയ്യുന്നു. വ്യക്തി ജീവിതത്തിലെ താളപ്പിഴകൾ ഒരു രാജ്യത്തിന്റെ ചലനത്തെത്തന്നെ എങ്ങനെ ബാധിക്കുന്നുവെന്ന വിചിത്രമായ യാഥാർഥ്യങ്ങൾ ഈ നോവലിൽ കാണാം. ചരിത്രവും ഭാവനയും മിത്തും ഫാന്റസിയും ഇടകലരുന്ന ഒരു വായനാനുഭവമാണ് ഇൻവെസ്റ്റിഗേഷൻ ത്രില്ലർ ഗണത്തിൽപ്പെടുന്ന ഈ നോവൽ വാഗ്ദാനം ചെയ്യുന്നത്.