Manoramaonline.com no longer supports Internet Explorer 8 or earlier. Please upgrade your browser.  Learn more »

'കന്യാസ്ത്രീകൾ അവരുടെ ശക്തി സ്വയം തിരിച്ചറിയണം'; സാറാ ജോസഫ്

Nun-Protest

കന്യാസ്ത്രീകൾ അവരുടെ ശക്തി സ്വയം തിരിച്ചറിയണമെന്നും അവർ കഠിനമായി അധ്വാനിച്ചു സ്വതന്ത്രമായി സ്വന്തം സ്ഥാപനം പടുത്തുയർത്തുന്ന സ്ത്രീ സമൂഹമാണെന്നും എഴുത്തുകാരി സാറാ ജോസഫ്. കന്യാസ്ത്രീകൾക്ക് അഭിനന്ദനങ്ങൾ അറിയിച്ചുകൊണ്ടുള്ള സാറാ ജോസഫിന്റെ കുറിപ്പ് ഇങ്ങനെ–

കന്യാസ്ത്രീകൾ അവരുടെ ശക്തി സ്വയം തിരിച്ചറിയണം. അവർ കഠിനമായി അദ്ധ്വാനിച്ചു സ്വതന്ത്രമായി സ്വന്തം സ്ഥാപനം പടുത്തുയർത്തുന്ന സ്ത്രീ സമൂഹമാണ്. തൊഴിലെടുക്കുന്ന കന്യാസ്ത്രീകൾ അവരുടെ വരുമാനം സ്വന്തമായി ഉപയോഗിക്കുകയില്ല. അത് സ്വന്തം കമ്യൂണിറ്റിയുടെ വളർച്ചക്കായിട്ടാണ് ഉപയോഗിക്കുന്നത്. കന്യാമഠങ്ങളോട് ചേർന്ന് ഒരു പാട് പാവങ്ങൾക്ക് തൊഴിൽ നൽകുന്ന വിധം കൃഷി, കന്നുകാലി വളർത്തൽ, സ്കൂൾ, ആശുപത്രികൾ തുടങ്ങിയവയും കന്യാസ്ത്രീകൾ പതുക്കെ വളർത്തിക്കൊണ്ടുവരുന്നു. അനാഥാലയങ്ങൾ, വൃദ്ധമന്ദിരങ്ങൾ, തുടങ്ങി സേവനത്തിന്റെ വഴികളും ഒട്ടേറെ.

ഇതൊന്നും വിമർശനാതീതമാണെന്ന് ഞാൻ പറയുകയല്ല. സ്ത്രീകളുടെ കൂട്ടായ്മാശക്തിയുടെ മാതൃകകൾ എന്ന നിലയിൽ വിമർശനങ്ങൾക്കപ്പുറത്ത് അനേകം നിലകളിൽ കന്യാസ്ത്രീകൾ മികവ് പുലർത്തുന്നുണ്ട് എന്നു സൂചിപ്പിക്കുകയാണ്.

നിങ്ങൾ രണ്ടേക്കർ തരിശുനിലം കന്യാസ്ത്രീകൾക്ക് നൽകു. ഏതാനും വർഷങ്ങൾക്കുള്ളിൽ അവരത് പൂങ്കാവനമാക്കിയിരിക്കും. അവരോടൊപ്പം ചെടികളും മരങ്ങളും പൈക്കളും കോഴിയും താറാവും അനാഥക്കുഞ്ഞുങ്ങളും നിരാലംബ സ്ത്രീകളും വൃദ്ധരും തൊഴിലാളികളും ഒക്കെയടങ്ങിയ ഒരു ലോകവും വളർന്നു വരുന്നുണ്ടാവും.

sara-joseph സാറാ ജോസഫ്

സഹനം ശീലമാക്കിയവരെങ്കിലും, 'നീതിക്കുവേണ്ടി ദാഹിക്കുന്നവർ ഭാഗ്യവാന്മാർ' എന്ന ക്രിസ്തുവചനം പിന്തുടർന്ന് സ്വന്തം സഹോദരിക്ക് നീതിയ്ക്കായി പോരാടാൻ മുന്നോട്ടുവന്ന ആറു കന്യാസ്ത്രീകൾക്ക് അഭിവാദ്യങ്ങൾ !

ഈ ധിക്കാരത്തിന് ചിലപ്പോൾ വലിയ വില കൊടുക്കേണ്ടി വരുമെങ്കിലും ഇവർ ചരിത്രം കുറിച്ചത് ഭാവിയിലെ വലിയ വിമോചനത്തിനാണ്.

ഈ സന്ദർഭത്തിൽ സെയിൽസ് ഗേൾസിന്റെ ചരിത്രത്തിലാദ്യമായി മുതലാളിയെ വെല്ലുവിളിച്ചു കൊണ്ട് ചരിത്രം സൃഷ്ടിക്കാനിറങ്ങിയ ആറു സ്ത്രീകളെ ആദരപൂർവം ഓർക്കുന്നു. അവർ ഉണ്ടാക്കിക്കൊടുത്ത നേട്ടമാണ്, ഈയടുത്ത് കേരള സർക്കാർ കൊണ്ടുവന്ന നിയമ പരിരക്ഷ.

ഒപ്പം സിനിമാരംഗത്തെ പിടിച്ചുകുലുക്കിയ WCC യിലെ പെൺകുട്ടികളെയും ഓർക്കുന്നു അന്തസ്സോടെ, ആത്മാഭിമാനത്തോടെ, സ്ത്രീകൾ മുന്നോട്ടുവെയ്ക്കുന്ന ഓരോ ചുവടും സമൂഹത്തെ മാറ്റി മറിക്കുക തന്നെ ചെയ്യും.

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.