സൗമ്യനായ കവി; വജ്രമൂർച്ചയുള്ള കവിത: വിഷ്ണുനാരായണൻ നമ്പൂതിരിയുടെ ജീവിത വഴി
Mail This Article
സൗമ്യതയായിരുന്നു വിഷ്ണുനാരായണൻ നമ്പൂതിരിയുടെ മുഖമുദ്ര; ജീവിതത്തിലും എഴുത്തിലും. പക്ഷേ തന്റെ നിലപാടുകൾ പറയുമ്പോൾ ആ വാക്കുകൾക്കു വജ്രത്തിന്റെ കാഠിന്യമുണ്ടായിരുന്നു. ശ്രീവല്ലഭനെ പൂജിച്ച അദ്ദേഹം അതേ നിഷ്ഠയോടെ കവിതയേയും ധ്യാനിച്ചു. മനുഷ്യനെക്കുറിച്ചായിരുന്നു ആ കവിത. മനുഷ്യനെ മാത്രമല്ല, പ്രകൃതിയെയും സ്നേഹിക്കണമെന്നും അപ്പോഴാണ് ജീവിതം അർഥപൂർണമാകുന്നതെന്നും പറഞ്ഞുവച്ച വിഷ്ണുനാരായണൻ നമ്പൂതിരിയുടെ ജീവിതവഴിയിലൂടെ:
∙ ജനനം 1939 ജൂൺ രണ്ടിന് തിരുവല്ലയിൽ. പിതാവ് മേപ്രാൽ ശ്രീവല്ലി ഇല്ലത്തെ വിഷ്ണു നമ്പൂതിരി, മാതാവ് തിരുവല്ല കാരയ്ക്കൽ കലന്താറ്റിൽ ഗുരുക്കൾ ഇല്ലത്തെ അദിതി അന്തർജനം.
∙ കുട്ടിക്കാലത്ത് സാമ്പ്രദായിക രീതിയിൽ മുത്തച്ഛനിൽനിന്ന് സംസ്കൃതവും വേദവും പഠിച്ചു.
∙ കൊച്ചുപെരിങ്ങര സ്കൂളിൽ സ്കൂൾ വിദ്യാഭ്യാസം ആരംഭം.
∙ ചങ്ങനാശേരി എസ്ബി കോളജിൽ ഊർജതന്ത്രത്തിൽ ഇന്റർമീഡിയറ്റ് പഠനം. എസ്ബിയിൽ പഠിക്കുമ്പോൾ 1956 ൽകോളജ് മാഗസിനിൽ കവിത പ്രസിദ്ധീകരിച്ചു.
∙ പെരിങ്ങര സ്കൂളിൽ ഗണിതശാസ്ത്ര അധ്യാപകനായി.
∙ കോഴിക്കോട് ദേവഗിരി കോളജിൽ ഇംഗ്ലിഷ് എംഎ പഠനം.
∙ എംഎ കഴിഞ്ഞ് മലബാർ ക്രിസ്ത്യൻ കോളജിൽ ഇംഗ്ലിഷ് അധ്യാപകൻ. പിന്നീട് കൊല്ലം എസ്എൻ കോളജിലും വിവിധ സർക്കാർ കോളജുകളിലും അധ്യാപകൻ. തിരുവനന്തപുരം യൂണിവേഴ്സിറ്റി കോളജിൽനിന്ന് വകുപ്പ് അധ്യക്ഷനായി വിരമിച്ചു.
∙ 1962 ൽ വിദ്യാലോകം മാസികയിൽ കവിതകൾ പ്രസിദ്ധീകരിച്ചു. തുടർന്ന് പല പ്രസിദ്ധീകരണങ്ങളിലും കവിതകൾ പ്രസിദ്ധീകരിച്ചു.
∙ വിരമിച്ച ശേഷം മൂന്നു വർഷം തിരുവല്ല ശ്രീവല്ലഭ ക്ഷേത്രത്തിൽ ശാന്തിക്കാരനായി.
∙ കേരള ഭാഷാ ഇൻസ്റ്റിറ്റ്യൂട്ടിൽ റിസർച്ച് ഓഫിസറും ഗ്രന്ഥാലോകം മാസികയുടെ പത്രാധിപരുമായി പ്രവർത്തിച്ചിട്ടുണ്ട്.
∙ കേരള സാഹിത്യ അക്കാദമി, പ്രകൃതി സംരക്ഷണസമിതി, കേരളകലാമണ്ഡലം തുടങ്ങിയവയുടെ ഭാരവാഹിത്വം വഹിച്ചു.
പ്രധാന കൃതികൾ:
∙ സ്വാതന്ത്ര്യത്തെക്കുറിച്ച് ഒരു ഗീതം, പ്രണയഗീതങ്ങൾ, ഭൂമിഗീതങ്ങൾ, ഇന്ത്യയെന്ന വികാരം, മുഖമെവിടെ?, അതിർത്തിയിലേക്ക് ഒരു യാത്ര, ആരണ്യകം, അപരാജിത, ഉജ്ജയിനിയിലെ രാപകലുകൾ, പരിക്രമം, ശ്രീവല്ലി, ഉത്തരായനം, തുളസീദളങ്ങൾ, രസക്കുടുക്ക, വൈഷ്ണവം. ചാരുലത (കവിതാ സമാഹാരം)
∙ കവിതയുടെ ഡിഎൻഎ, അസാഹിതീയം, അലകടലുകളും നെയ്യാമ്പലുകളും (ലേഖനസമാഹാരം).
∙ ഗാന്ധി, സസ്യലോകം, ഋതുസംഹാരം (വിവർത്തനം).
∙ കുട്ടികളുടെ ഷേക്സ്പിയർ (ബാലസാഹിത്യം),
∙ പുതുമുദ്രകൾ, വനപർവം, സ്വാതന്ത്ര്യസമരഗീതങ്ങൾ, ദേശഭക്തി കവിതകൾ (സമ്പാദനം).
പുരസ്കാരങ്ങൾ
∙ പത്മശ്രീ (2014)
∙ എഴുത്തച്ഛൻ പുരസ്കാരം (2014)
∙ കേരള സാഹിത്യ അക്കാദമി അവാർഡ് (ഭൂമിഗീതങ്ങൾ–1979),
∙ കേന്ദ്ര സാഹിത്യ അക്കാദമി അവാർഡ് (ഉജ്ജയിനിയിലെ രാപ്പകലുകൾ– 1994)
∙ ആശാൻ പുരസ്കാരം (ഉജ്ജയിനിയിലെ രാപ്പകലുകൾ–1996)
∙ ഓടക്കുഴൽ അവാർഡ് (മുഖമെവിടെ– 1983)
∙ കേരള സാഹിത്യ അക്കാദമി സമഗ്രസംഭാവനാ പുരസ്കാരം (2004)
∙ മാതൃഭൂമി സാഹിത്യ പുരസ്കാരം (2010)
∙ വള്ളത്തോൾ പുരസ്കാരം (2010)
∙ വയലാർ അവാർഡ് (2010)
∙ ചങ്ങമ്പുഴ പുരസ്കാരം (1989)
∙ ഉള്ളൂർ അവാർഡ് (1993)
∙ സാഹിത്യകലാനിധി സ്വർണമുദ്ര
∙ വീണപൂവ് ശതാബ്ദി പുരസ്കാരം (2008)
English Summary : Poet Vishnu Narayanan Namboothiri Life Sketch