തുടക്കം അന്നാണ്, 1919 ൽ. ഇറ്റാലിയൻ ഭാഷയിൽ അതിന്റെ പേര് കടിച്ചാൽ പൊട്ടില്ല. ‘ഇറ്റാലിയൻ പോരാളികൾ’ എന്നർഥം വരും. വരാനിരിക്കുന്ന വിപത്തിനെ കുറിച്ചുള്ള യാതൊരു സൂചനയും ആ പേരിലുണ്ടായിരുന്നില്ല. രണ്ടു വർഷത്തിനുള്ളിൽ കാര്യങ്ങൾക്ക് കൂടുതൽ തെളിച്ചം വന്നു, പേരും മാറി. പിൽക്കാലത്ത്, ലോകത്തിനു മുകളിൽ പലയിടത്തും പല കാലങ്ങളിലും പടർന്ന കറുപ്പു നിറത്തിന്റെ ഉദയം അവിടെ നിന്നായിരുന്നു, നാഷനൽ ഫാഷിസ്റ്റ് പാർട്ടി എന്ന ആ സംഘടനയിൽനിന്ന്. ഒരു കൊല്ലന്റെ മകനായി ജനിച്ച്, പത്രപ്രവർത്തകനായി വളർന്ന്, സോഷ്യലിസ്റ്റ് ആണെന്ന് ഭള്ള് പറഞ്ഞ്, ലോകത്തെ വിനാശത്തിന്റെ വക്കോളമെത്തിക്കുന്നതിൽ വലിയ പങ്ക് വഹിച്ച ബെനിറ്റോ മുസോളിനി രൂപീകരിച്ച ആ സംഘടനയിൽനിന്ന്. രാജാവ് എന്ന പേരിന്റെ കുടയില്ലാതെ, ഒരു ഏകാധിപതിയുടെ കീഴിലുള്ള, ഒറ്റക്കല്ലിൽ പടുത്ത, ദേശസങ്കൽപം അവിടെ തുടങ്ങുന്നു.