ഇരുമുടിയുടെ കവർ പ്രകാശനം ചെയ്തു

എഴുത്തുകാരനും പത്രപ്രവർത്തകനുമായ  രവിവർമ തമ്പുരാന്റെ ഏറ്റവും പുതിയ നോവലായ ഇരുമുടിയുടെ കവർ നോവലിസ്റ്റ് സി. രാധാകൃഷ്ണൻ പുതുതലമുറയിലെ ശ്രദ്ധേയ നിരൂപകൻ അജീഷ് ജി. ദത്തന് നൽകിക്കൊണ്ട് പ്രകാശനം ചെയ്തു. ആർട്ടിസ്റ്റ് അരുൺ ഗോകുൽ ആണ് കവർ തയാറാക്കിയത്. കൊച്ചിയിൽ സി. രാധാകൃഷ്ണന്റെ വസതിയിലായിരുന്നു പ്രകാശനം. കേന്ദ്ര സാഹിത്യ അക്കാദമിയുടെ വിശിഷ്ടാംഗത്വം ലഭിച്ച അദ്ദേഹത്തെ കൂട്ടായ്മയിൽ ആദരിച്ചു. എഴുത്തുകാരായ വി.ജയദേവ്, സുരേഷ് പനങ്ങാട്, ഗിരീഷ് ജനാർദ്ദനൻ, കേരള കൗമുദി മുൻ ന്യൂസ് എഡിറ്റർ കെ.ആർ. ജ്യോതിഷ്, ആകാശവാണി മുൻ സ്റ്റേഷൻ ഡയറക്ടർ ഡി. പ്രദീപ് കുമാർ, മനോരമ ബുക്സ് പത്രാധിപ സമിതി അംഗം രാമാനുജൻ, മലയാള മനോരമ ഫൊട്ടോഗ്രാഫർ ജോസ് കുട്ടി പനയ്ക്കൽ, നീരജ് ആർ. വർമ തുടങ്ങിയവർ സാക്ഷ്യം വഹിച്ചു.

ശബരിമലയും അയ്യപ്പനും കേന്ദ്ര പ്രമേയമാകുന്ന നോവലിൽ സമകാല സാമൂഹിക , രാഷ്ട്രീയ സാഹചര്യങ്ങളും കടന്നുവരുന്നു. നോവൽ പ്രകാശനം  ജനുവരി ആറിന് പന്തളത്ത് നടക്കും. മനോരമ ബുക്സ് ആണ് പ്രസിദ്ധീകരിക്കുന്നത്.

Content Summary: Cover Release of Malayalam Book ' Irumudi ' written by Ravi Varma Thampuran