അമ്മ പറഞ്ഞ ഭീകരകഥകൾ കേട്ട് വളർന്നു, ഡ്രാക്കുളയുടെ സ്രഷ്ടാവ്; ബ്രാം സ്റ്റോക്കറുടെ ജീവിതം

ഐറിഷ് എഴുത്തുകാരനും നോവലിസ്റ്റുമായ ബ്രാം സ്റ്റോക്കർ (Bram Stoker, 1847–1912) ലോകസാഹിത്യത്തിലെ ഏറ്റവും ഭീകരവും പ്രശസ്തവുമായ കഥാപാത്രങ്ങളിലൊന്നായ കൗണ്ട് ഡ്രാക്കുളയുടെ സ്രഷ്ടാവാണ്. 1897ൽ പ്രസിദ്ധീകരിച്ച 'ഡ്രാക്കുള' (Dracula) നോവൽ വാമ്പയർ ഐതിഹ്യങ്ങളെ ഒരു ആധുനിക സാഹിത്യകൃതിയാക്കി മാറ്റി, ഹൊറർ സാഹിത്യത്തിന് ഒരു പുതിയ മാനം നൽകി.  

1847 നവംബർ 8-ന് ഐർലണ്ടിലെ ഡബ്ലിനിലാണ് ബ്രാം സ്റ്റോക്കർ ജനിച്ചത്. അമ്മ ഫ്രാൻസസ് തോർണ്ടൺ, അച്ഛൻ അബ്രഹാം സ്റ്റോക്കർ.  ബാല്യത്തിൽ രോഗബാധിതനായി പലപ്പോഴും കിടപ്പിലായിരുന്ന സമയത്ത് അമ്മയുടെ ഭീകരക്കഥകൾ കേട്ടാണ് ബ്രാം സ്റ്റോക്കറിന് സാഹിത്യത്തിൽ താത്പര്യം വളർന്നത്. ട്രിനിറ്റി കോളേജ്, ഡബ്ലിനിൽ നിന്ന് ഗണിതശാസ്ത്രത്തിൽ ബിരുദം നേടിയശേഷം ആദ്യം ഡബ്ലിൻ കോടതിയിൽ ക്ലർക്കായി സർക്കാർ ജോലി ചെയ്തു. പിന്നീട് ഹെൻറി ഇർവിങ്ങിനൊപ്പം നാടകവിമർശകനും തിയേറ്റർ മാനേജറുമായി പ്രവർത്തിച്ചു. സാഹിത്യവും ചരിത്രവും സ്വയം പഠിച്ചു. 

സ്റ്റോക്കർ പല നോവലുകഴും എഴുതിരുന്നുവെങ്കിലും 1897ൽ പ്രസിദ്ധീകരിച്ച ഡ്രാക്കുളയൈണ് അദ്ദേഹത്തെ അമരത്വത്തിലെത്തിച്ചത്. റൊമാനിയൻ രാജകുമാരൻ വ്ലാഡ് ദി ഇമ്പാലർ (Vlad the Impaler) എന്ന ചരിത്രപുരുഷനെ അടിസ്ഥാനമാക്കി കത്തുകൾ, ഡയറി എൻട്രികൾ, വാർത്താക്കുറിപ്പുകൾ എന്നിവ ഉപയോഗിക്കുന്ന എപിസ്റ്റോളറി ശൈലിയിലാണ് നോവൽ രചിച്ചത്. വിക്ടോറിയൻ സമൂഹത്തിന്റെ ലൈംഗിക അടിച്ചമർത്തലിനെ വിമർശിക്കാനാണ്  ഡ്രാക്കുളയുടെ സ്ത്രീബലികളെന്ന സങ്കൽപ്പം ഉപയോഗിച്ചത്. 

ഒരു ഭീകരകഥയ്ക്കപ്പുറം, വിക്ടോറിയൻ യുഗത്തിന്റെ ആശയങ്ങൾ, ലൈംഗികത, സാമ്രാജ്യത്വം, ശാസ്ത്രം എന്നിവയെക്കുറിച്ചുള്ള ഒരു സങ്കീർണ്ണവിമർശനമാണ് ഡ്രാക്കുള. സ്റ്റോക്കറുടെ ബാല്യത്തിലെ രോഗവും അമ്മ പറഞ്ഞ ഭീകരക്കഥകളും അദ്ദേഹത്തിന്റെ സൃഷ്ടികളിൽ അന്തർലീനമാണ്.

1912 ഏപ്രിൽ 20ന് ലണ്ടനിൽ മരിച്ച സ്റ്റോക്കറുടെ കൃതികൾ ഇന്നും ഹൊറർ സാഹിത്യത്തിന്റെ പ്രതീകമാണ്. 200-ലധികം ചലച്ചിത്രങ്ങൾക്കും നാടകങ്ങൾക്കും ഡ്രാക്കുള പ്രചോദനമായി. സ്റ്റോക്കറുടെ സൃഷ്ടികൾ ഇന്നും സാഹിത്യ-സിനിമാ പ്രപഞ്ചത്തെ സ്വാധീനിക്കുന്നു.