ഇനിയെന്റെ മോഹന സ്വപ്നങ്ങളിൽ അഴകുള്ള ചായം പകർന്നീടുവാൻ; അണയുമോ സ്നേഹത്തിന് വീണമീട്ടി

വിരഹമേ നീയെന്നിൽ നിറയുന്ന നേരം

വിജനമാം വീഥിയിൽ ഉരുകുന്ന നേരം

വിളിപ്പാടകലെയായ് കേൾക്കുന്നു ഞാൻ

അലിവുള്ള ഹൃദയത്തിൻ സ്നേഹരാഗം

അറിവിലെൻ ഓർമയിൽ സ്വപ്നങ്ങളിൽ

അലിവോടെയാരും അണഞ്ഞതില്ല

നിറയുമെൻ മിഴിയിലെ നീർത്തുള്ളികൾ

കനിവോടെ ആരും തുടച്ചതില്ല

ഒരുനാളെൻ ജീവിത താളുകളിൽ

മിഴിവുള്ള ചിത്രം വരച്ചീടുവാൻ

ഇനിയെന്റെ മോഹന സ്വപ്നങ്ങളിൽ

അഴകുള്ള ചായം പകർന്നീടുവാൻ

അണയുമോ സ്നേഹത്തിന് വീണമീട്ടി

അകതാരിൽ കനിവുള്ള കൂട്ടുകാരൻ

എന്റെ  കനവിന്റെ  ശ്രുതി  മീട്ടും  പാട്ടുകാരൻ

English Summary : Pratheeksha Poem By Divya Ramesh