പ്രതീക്ഷയോടെ കാത്തിരിക്കാം, ഈ സമയവും കടന്നു പോകും
Mail This Article
ഈ സമയവും കടന്നു പോകും (കവിത)
അൽപാഹാരത്തിനായ് കാകൻമാർ
മണൽപ്പരപ്പിൽ പരതി.
മർത്ത്യരേത്തേടി മത്സ്യങ്ങൾ
തിരകൾക്കൊപ്പം തീരത്തണഞ്ഞു.
പൂബാഹുല്യം പൂമ്പാറ്റകളേയും
തേനീച്ചകളേയും ഉന്മത്തരാക്കി.
കഥയറിയാതെ കിളികൾ
കളകളാരവങ്ങൾ മുഴക്കിപ്പറന്നു.
കിളിവാതിലിന്നരികിലുള്ള മാഞ്ചില്ലയിലിരുന്നൊരണ്ണാൻ
അകത്തളത്തിലേക്കെത്തി നോക്കി.
തൊടിയിലെ മന്ദാരം മന്ദമാരുതനോട് തിരക്കി
‘‘നിന്റെ ഗന്ധത്തിനിതെന്തു പറ്റി’’
അങ്കണത്തിലൊരു കാൽപ്പന്ത്
കാൽപ്പെരുമാറ്റത്തിനായ് കാത്തുകിടന്നു.
ഒഴിഞ്ഞ മീൻച്ചട്ടിക്കരികിലിരുന്നൊരു
മാർജ്ജാരൻ പിറുപിറുത്തു.
വാൽക്കണ്ണാടി തൻവാലാൽ
മുഖം മറച്ചു.
മൺക്കുടുക്ക വീണുടയും ഒലിക്കായ്
അമ്മ കാത്തിരുന്നു.
മുറ്റത്തെക്കണിക്കൊന്ന
നിശ്വസിച്ചൊന്നാടിയുലഞ്ഞു.
ഘടികാരത്തിന്റെ കാലുകൾ ശബ്ദിച്ചു
‘‘ഈ സമയവും കടന്നു പോകും’’
English Summary : Ee samayavum Kadannu Pokum Story By Balu D