എം കൃഷ്ണൻ നായരും രണ്ടു ചിറകുകളും!
Mail This Article
എം കൃഷ്ണൻ നായരും രണ്ടു ചിറകുകളും! (കവിത)
എം കൃഷ്ണൻ നായർ;
കുലപതി.
വിറക്കുന്ന കൈകളെ അതിവിദഗ്ധമായി
പുറകിൽ കൂട്ടിപ്പിടിച്ചുകൊണ്ട്
തൊട്ടു മുമ്പിൽ ഞാൻ!
'ന്താ വന്നത്?'
ഘനഗംഭീരമായ ചോദ്യം.
'എന്റെ ആദ്യത്തെ പുസ്തകമാണ്;
രണ്ടുവരി കുറിച്ചു തരണം.'
വാക്കുകൾ എങ്ങനെ പുറത്തുവന്നു എന്നറിയില്ല.
'പുസ്തകം എവിടെ?'
'അങ്ങയുടെ കാൽച്ചുവട്ടിലുണ്ട്.'
'ശരി, രണ്ടു നിമിഷം കണ്ണടയ്ക്കുക!' എന്നു മൊഴി.
ശേഷം,
കയ്യിൽ കടലാസ് സ്പർശം;
ഞെട്ടിയപ്പോൾ മൊഴി വീണ്ടും...
'കൺ തുറക്കാതെ തന്നെ വാങ്ങിക്കോളൂ.
തിരിഞ്ഞു നേരെ നടന്ന്
പുറത്തെത്തിയ ശേഷം മാത്രം എടുത്തു വായിക്കൂ.
ഉം, പോയ്ക്കോളൂ!"
ഒന്നും പറഞ്ഞില്ല, അഥവാ കഴിഞ്ഞില്ല; ശിരസാവഹിച്ചു!
തപ്പിത്തടഞ്ഞ് പുറത്തെത്തി.
പടപടാ മിടിക്കുന്ന ഹൃദയത്തെ
പാടെയവഗണിച്ചുകൊണ്ട്
കടലാസ് തുറന്നു.
അതെ,
രണ്ടു വരികൾ മാത്രം...
'പശുവിന്നു മൃഷ്ടാന്നമാകും
എന്നു കരുതീ.
അല്ല;
മഴയത്ത് ചൂടിപ്പോകാനുള്ള
കോപ്പ് ഒക്കെയുണ്ടിതിൽ!'
അതെ,
രണ്ടു വരികൾ..
രണ്ടു ചിറകുകൾ !
English Summary : Malayalam Poem written by Suresh Narayanan