വിധി പോലെ വിതച്ചു കൊയ്യുന്ന മഹാമാരി
Mail This Article
കൊറോണ (കവിത)
വന്നൊരു മാരി മഹാമാരി
വിതച്ചു കൊയ്യുകയാണത് വിധിപോലെ...
ഇന്നീയുലകിൻ ഹൃദയമിടിപ്പിൽ താളപ്പിഴകൾ
തീർക്കുകയാണതിൻ ശ്രുതിപോലെ...
പിടയും ജീവൻ പരതും ജീവശ്വാസം ഊറ്റിയെടുക്കുകയാണത്
കല്പന പോലെ...
ഉരിയാടാത്ത നോവിന്റെ ആത്മാക്കൾ സാക്ഷി
പ്രബഞ്ചം സാക്ഷി പഞ്ചഭൂതങ്ങൾ സാക്ഷി...
വൈറലാവുകയാണൊരു
വൈറസ് കൊറോണ
കലികാലത്തിൻ
അപദാനം പാടി...
ഇന്നലെയോളമില്ലാത്ത ഭയം
നാളേയ്ക്കും നീളുകയാണാ ഭയം...
വെള്ളിടി പോലെ വന്നൊരു വീരൻ
വെല്ലുവിളിയായുള്ള ഭയം...
കളിചിരിമായ്ച്ചും കണ്ട കിനാക്കൾ കരിച്ചും
നമ്മളെ ബന്ധിതരാക്കുകയാണാ ഭയം...
അഹംഭാവത്തെ കോപത്തെ നന്മയെ തിന്മയെ
സർവ്വകോമാളിയാക്കുകയാണാ ഭയം...
അമ്പലം പൂട്ടി പള്ളികൾ പൂട്ടി
ജഗത്ശക്തികൾ തൻ
പരീക്ഷണങ്ങൾ....
ഇന്നിത് ലോകമഹായുദ്ധം
കാലനില്ലാത്തൊരു കാലനുമായ്...
വഴിപാടുകൾ കൊണ്ട് ചെറുക്കാനാമോ
ആണവായുധം കൊണ്ട്
തകർക്കാനാമോ
കോടികൾ കൊണ്ട്
തടുക്കാനാമോ
സമരവീര്യം കൊണ്ട്
ജയിക്കാനാമോ
ജയിക്കട്ടെ ശാസ്ത്രം
ജയിക്കട്ടെ ഐക്യം
ജയിക്കട്ടെ മനുഷ്യത്വ
വിശ്വാസികൾ
കരുതലോടെ ചമയ്ക്കാം
കനവ് കണ്ട ചരിത്രം
കർമ്മനിരതരാകിലും
തുണ കരുതലാവേണം