വിൽക്കാനുണ്ട് സ്നേഹം - സിദ്ര എഴുതിയ കവിത

വിൽക്കാനുണ്ട്, സ്നേഹം.

ആർക്കും വേണ്ടാത്ത ചെമ്പു നാണയം.

മൊബൈൽ സ്‌ക്രീനിൽ പ്രിയപ്പെട്ടവൻ 

തിരഞ്ഞു കൊണ്ടിരുന്നത് .

നിന്നെ മടുത്തെന്നു പറയാതെ പറഞ്ഞത്.

ഭാര്യയുടെ സ്നേഹം.

കൂടുപൊട്ടിക്കാത്ത കിളി .

അത് വല്ലപ്പോഴും ഒക്കെ മതിയല്ലോ.

അല്ലെങ്കിലും അവൾ എവിടെ പോകാൻ .

കിളി കൂടു പൊട്ടിച്ചപ്പോഴോ? 

മൊബൈൽ സ്ക്രീൻ തിരഞ്ഞപ്പോഴോ ?

നിന്നെ കാണട്ടെ മൊത്തമായെന്ന് 

മൊബൈലിലെ ചങ്ങാതി .

അല്ലെങ്കിലും ആർക്കു വേണം 

എടുക്കാചരക്കായ 

ചെമ്പു നാണയം .

കിളി കൂട്ടിലേക്ക്‌ തന്നെ മടങ്ങി .

കാഞ്ചനക്കൂട്.

അല്ലെങ്കിലും അവൾക്ക് എന്തിന്റെ കുറവായിരുന്നു.

കഴിക്കാനില്ലേ 

കുടിക്കാനില്ലേ 

ഉടുക്കാനില്ലേ.

ചെമ്പു നാണയങ്ങൾ ഇപ്പോഴും 

പെട്ടിയുടെ ഉള്ളിൽ.

ക്ളാവ്  പിടിച്ചു 

ശ്വാസം മുട്ടി.