മഴവഴികൾ – അജേഷ്.പി എഴുതിയ കവിത

ദൂരെ

കുന്നിൻ്റെ ഉച്ചയിൽ

ഒരു പെരുമഴ

പൊട്ടിവീഴുന്നു.

നനവാർന്ന മരങ്ങൾ,

തണുപ്പേറ്റ കിളികൾ,

ക്ഷണിക ജീവന്റെ പ്രാണികൾ,

ദാഹം തീർന്ന മണ്ണ്

നിറഞ്ഞ മഴ പെയ്ത്ത്..!

അതിരു തുന്നിയ

തോട്,

മാറു തകർന്ന

ഭൂമി,

ക്ഷതമേറ്റ മഴവഴികൾ...!

പുഴയിലേക്കുള്ള

വഴി തിരഞ്ഞ്

പെരുമഴ

ഉറക്കെ കരയുന്നു.

സ്വപ്നങ്ങളിലേക്ക്

പുതുവഴി വെട്ടി

മഴ താഴോട്ട്

കുതിച്ചു പായുന്നു.

മണ്ണ്,

ഉരുളൻ പാറകൾ,

വേരറ്റ മരങ്ങൾ.

താഴ് വാരം നിറയെ

മണ്ണുപൊത്തിയ കൂരകൾ,

ശ്വാസംമുട്ടി മരിച്ച കനവുകൾ.

ഒരു നിലവിളിക്കും

കാതു നൽകാതെ

കരഞ്ഞു കലങ്ങി

അതിരുകൾ കവിഞ്ഞു

പെരുമഴ പായുന്നു

പുഴവഴികളിലേക്ക്.