നൂപുര നാദം തേടി – സജിത്ത് കുമാർ എൻ. എഴുതിയ കവിത

ചെമ്മാനം പൂക്കുമാ ചെമ്പകച്ചില്ലമേൽ

ചന്തമേറും ചിന്തകൾ കോർക്കവേ

ചങ്കുചോപ്പിച്ച അടിയണിചിലങ്കനാദം 

ചന്ദനക്കുളിരായ് നെഞ്ചിടത്തിൽ

മഞ്ഞിളംമഴനാദമായ് കാതിലൊഴുകീ

മജ്ജീരനാദമെൻ മധുമന്ത്രമായ്

കാലങ്ങളെത്രയോ മോഹസങ്കല്പങ്ങൾ 

കരൾത്തട്ടിങ്കൽ വാരിവിതച്ചെങ്കിലും

ആയിരമായിര സ്വപ്ന രാവുകളിൽ

ഞാൻ പറന്ന ശ്യാമനീരദത്തേരിൽ

മഴമണിയായ് കേട്ടു നിൻ നൂപരധ്വനി

കാലംമറന്നെന്നുയുരിൻ ചിലങ്കൊലി

കാണാത്ത പൂങ്കുയിൽ നാദമോ

കണ്ണിൽ വിരിഞ്ഞ വെൺനിലാ പൂക്കൾ

കിനാവിന്റെ വെള്ളിത്തൂവൽ വരച്ചതോ