പിറക്കാതെ പോയവള് – കെ. ടി. ജയദേവ് എഴുതിയ കവിത
Mail This Article
അച്ഛാ എന്നുറക്കെ വിളിച്ച്
പേരറിയാത്ത ഒരു പെണ്കുട്ടി
എന്നെങ്കിലുമൊരിക്കല് വരാതിരിക്കില്ല
സ്വന്തമല്ലെന്നറിയുമ്പൊഴും
തെല്ലിട മടിച്ചുനില്ക്കാതെ
തര്ക്കമേതുമില്ലാതെ തന്നെ
അവളെ സ്വീകരിക്കണം
ചോദ്യശരങ്ങള്ക്ക് മുന്നില്
മുറിവേതുമേല്പ്പിക്കാതെ
ചുടുനെഞ്ചോട് ചേര്ത്തുനിര്ത്തണം
ചതിയാഴങ്ങളിലേക്ക്
അടിതെറ്റി വീണുപോയ്ക്കോട്ടെ
ഏതു കെണിക്കൂടൊരുക്കത്തിലും
അച്ഛാ എന്ന മറുവിളി മാത്രം മതി
അവള്ക്കൊപ്പം പങ്കിടണം
ശിഷ്ടജീവിതപ്പൊരുള്
സ്നേഹത്തിന്റെ രാക്കാറ്റുകളില്
ചതിയുടെ മേഘം പെയ്തുതീരട്ടെ
ഒടുവിലൊരുനാള്
പട്ടടയിലേക്കെടുക്കുമ്പോള്
പെയ്തുതീരാനൊരു
കുഞ്ഞുകണ്ണീര്ക്കടല്
ബലിച്ചോറുരുട്ടുമ്പോള്
വിറച്ചുവീഴാന്
ദര്ഭപ്പുല്ലണിഞ്ഞ
കുഞ്ഞുകൈവിരലുകള്
വേറൊന്നും വേണ്ട
ചിത കത്തിയെരിയുമ്പോള്
അച്ഛാ എന്നാര്ത്തുവിളിച്ച്
ഒന്നുറക്കെ കരഞ്ഞാല് മാത്രം മതി
Content Summary: Malayalam Poem ' Pirakkathe Poyaval ' written by K. T. Jayadev