ഉറക്കം നടിക്കുന്നവർ – പ്രവീൺ മോഹനൻ എഴുതിയ കവിത
Mail This Article
കുപ്പിച്ചില്ലുകൾ നിറഞ്ഞ വാക്കുകൾ
നിങ്ങളുടെ മുഖത്ത് തുപ്പിയിട്ടാണ്
പലരും കടന്നുപോയത്
നിങ്ങളുടെ വാതിലുകൾ
തള്ളിത്തുറന്ന്
ഒരു പ്രളയം കടന്നുപോയി
അയൽപക്കത്തെ കോഴി
നിങ്ങളുടെ ചെടി കൊത്തിയതിന്
നിങ്ങളാ കോഴിയെ ചുട്ടു തിന്നു
വസന്തങ്ങളിൽ നിറയെ നിറങ്ങളുമായി
വിഷം ഒലിച്ചിറങ്ങുന്നത് നിങ്ങളറിഞ്ഞു
മുലയുണ്ണാൻ പറ്റാതെ പോയ
ബാല്യങ്ങളോട് കുപ്പിപ്പാലിന്റെ
(അ)രുചിയെ കുറിച്ച്
നിങ്ങൾ പറഞ്ഞുകൊണ്ടിരുന്നു
നിങ്ങൾ കൊന്ന് കുഴിച്ചുമൂടിയ
നദിയുടെ മാറിൽ സ്റ്റംബ് കുത്തി
ക്രിക്കറ്റ് കളിക്കുന്ന
ഫ്രീക്കന്മാരോടൊപ്പം നിങ്ങളും കളിച്ചു
നിങ്ങൾക്കിപ്പോഴും
ജീവിതം ഒരുകളിയാണ്
നിങ്ങളിപ്പോഴും ഉറക്കം
നടിച്ചു കൊണ്ടിരിക്കുകയാണ്
എന്റെ ഇല്ലായ്മകളിൽ
നിങ്ങൾ മുറിച്ചു മാറ്റിയ ഒച്ചകൾ
മുഷ്ടി ചുരുട്ടി പ്രകമ്പനം കൊള്ളിച്ച്
ഒരു കൊടുങ്കാറ്റായി വരും
അന്ന് നിങ്ങൾ ശരിക്കും
ഉറങ്ങുകയായിരിക്കും
നിങ്ങളുടെ കലണ്ടറിലെ
ചുവന്ന അക്കങ്ങളിൽ.
Content Summary: Malayalam Poem ' Urakkam Nadikkunnavar ' written by Praveen Mohanan