ഡിസംബർ - ബെന്നി ജോൺ എഴുതിയ കവിത

ഹേ ഡിസംബർ, 

മഞ്ഞു കാലത്തിന്റെ 

പ്രണയനക്ഷത്രമേ.. 

പൂർവ്വജന്മത്തിന്റെ 

ഓർമ്മകൾ പോലെ 

വയലറ്റ് പൂവുകൾ 

പുനർജനിക്കുന്ന  

നിന്റെ താഴ്വാരങ്ങളിൽ 
 

വിസ്മൃതിയുടെ തിരകൾക്ക് 

മായ്ച്ചുകളയാനാകാത്ത 

ഒരു പ്രണയം പോലെ 

മുന്തിരിവള്ളികൾ 

കൈകൾ നീട്ടുന്ന 

നിന്റെ ഏദൻ തോട്ടങ്ങളിൽ
 

‘ഒരു മരണത്തിനും 

നിന്നെ കൊണ്ടുപോകാനാകില്ലെന്ന് ’’ 

പ്രിയമുള്ളൊരാളിന്റെ കല്ലറക്കൽ  

കണ്ണുനീരിറ്റുന്ന മെഴുതിരികൾപോലെ

നക്ഷത്രങ്ങൾ കൂടുകൂട്ടുന്ന 

നിന്റെ പൈൻമരക്കാടുകളിൽ
 

എനിക്കു നിന്നെ 

തിരഞ്ഞു പോകണം 

അനന്തമായ്..
 

Content Summary: Malayalam Poem ' December ' written by Benny John