ആത്മാക്കളുടെ യാത്ര – ഹസീന ആവള എഴുതിയ കവിത

മരണമില്ലാത്ത വീട്ടിലെ പച്ചയായ 

യാഥാർഥ്യം തേടി ഒരു കൂട്ടം 

ആത്മാക്കൾ യാത്ര തുടങ്ങി.... 

വെയിൽ വീണ വീട്ടുപാതയിൽ 

മണ്ണിൽ വീണുറങ്ങുന്ന പൈതലിന് 

വിശപ്പിന്റെ ഗന്ധമാണെന്നറിഞ്ഞു 

തൊഴുകൈയ്യോടെ അവർ പിൻനടന്നു 
 

വരാന്തയിലെ ചാരുകസേരയിൽ

തല പുകഞ്ഞിരിക്കുന്ന ഗൃഹനാഥന്റെ 

പ്രാരാബ്ദങ്ങൾക്ക് പലിശയും 

കൂട്ടുപലിശയും ആവരണം ചെയ്തത് 

മൗനമായി അവർ നോക്കിനിന്നു... 
 

അകത്തെ ഉയരമുള്ള കട്ടിലിൽ ഇത്തിരി 

ശുദ്ധവായുവിനായ് വെപ്രാളപ്പെടുന്ന 

വാർദ്ധക്യം പൂണ്ട മനുഷ്യക്കോലത്തെ 

നിസ്സഹായരായ് അവർ തലോടി... 
 

വിറകെരിയാത്ത അടുപ്പിനു മുകളിൽ 

ശകലം വെള്ളവുമായി കാവലിരിക്കുന്ന 

മൺചട്ടിയെ നോക്കി നെടുവീർപ്പിടുന്ന 

മാതൃത്വത്തിനു ആശ്വാസമേകാൻ 

ആവാതെ അവർ മടക്കയാത്ര തുടർന്നു.. 
 

വഴിയിലെ കാഴ്ചകൾ വീണ്ടും 

സ്വസ്ഥത കെടുത്തിയെങ്കിലോ എന്നോർത്ത് 

കണ്ണുകൾ മുറുക്കിയടച് മേലാസകലം 

വെള്ളപ്പുതപ്പണിഞ്ഞു അവർ വീണ്ടും നടന്നകന്നു....

മണ്ണിനടിയിലെ നീണ്ട നിദ്ര തേടി....
 

Content Summary: Malayalam Poem ' Athmakkalude Yathra ' written by Haseena Aavala